കുട്ടികള് കുസൃതി കാണിക്കുമ്പോള് പൊലീസിനെ വിളിക്കുമെന്ന് പറയുന്നത് സ്വാഭാവികമാണ്. എന്നാല് നമ്മള് തമാശയ്ക്ക് പറയുന്ന കാര്യം ഇവിടെ ഒരു സ്ത്രീ ചെയ്തിരിക്കുകയാണ്. വടക്കന് ലണ്ടനിലെ ഹാരോയില് നിന്നുള്ള 56 കാരിയായ സോണിയ നിക്സണ് ആണ് ഇത്തരത്തില് പൊലീസിനെ വിളിച്ചത്.
2021 നും 2023 നും ഇടയില് ആണ് ഇവര് എമര്ജന്സി നമ്പറായ 999 ലേക്ക് വിളിച്ചത്. 17 വ്യത്യസ്ത മൊബൈല് നമ്പറുകളില് നിന്നാണ് ഇവര് വിളിച്ചതെങ്കിലും ആകെ വിളിച്ചത് 2000 തവണയായിരുന്നു എന്നതാണ് ഞെട്ടിക്കുന്ന കാര്യം. 2023-ല് മാത്രം 1,194 തവണ ലൈനിലേക്ക് വിളിച്ചു. ആ വര്ഷം പൊലീസ് സേനയിലേക്ക് ആവര്ത്തിച്ചുള്ള ആദ്യത്തെ മൂന്ന് കോളര്മാരില് ഒരാളായി ഇതോടെ ഈ സ്ത്രീ മാറുകയായിരുന്നു.
കമ്മ്യൂണിക്കേഷന്സ് ആക്ട് 2003ന്റെ 668 ലംഘനങ്ങള്ക്ക് ജനുവരിയില് നിക്സണെ അറസ്റ്റ് ചെയ്യുകയും കുറ്റങ്ങള് ചുമത്തുകയും ചെയ്തു. അറസ്റ്റിനുശേഷവും ഇവര് ഒരു ഉദ്യോഗസ്ഥനെ വംശീയമായി അധിക്ഷേപിക്കുകയും ചെയ്തു, ഇങ്ങനെ പലതരത്തില് പ്രശ്നങ്ങള് ഉണ്ടാക്കി ക്രിമിനല് നാശനഷ്ടത്തിന് അറസ്റ്റ് ചെയ്യുകയും ചെയ്തു. എന്തായാലും ഒടുവില് ഇവര്ക്ക് ജയില് തടവ് വിധിച്ചിരിക്കുകയാണ്. ഇപ്പോള് 22 ആഴ്ച തടവിന് ശിക്ഷിക്കപ്പെട്ടിരിക്കുകയാണ്.
ഭക്ഷണമെവിടെ എന്നും പെന്ഷന് ഡിപ്പാര്ട്മെന്റിന്റെ നമ്പര് ഏതാണ് എന്നും, പറഞ്ഞ സാധനം എത്തിക്കാത്തതെന്ത് എന്നുമൊക്കെ ചോദിച്ചാണ് ഇവര് വിളിച്ച് ശല്യം ചെയ്തിരുന്നത്. ഇവരുടെ കോളുകള് കാരണം, പലര്ക്കും കൃത്യസമയത്ത് സഹായമെത്തിക്കാന് പോലും പറ്റിയിട്ടില്ല എന്നും പോലീസ് വ്യക്തമാക്കി.