ഇന്ന് എന്തും ഓണ്ലൈനായി വാങ്ങുന്നതാണ് ശീലം. കടകളില് പോയി ഓരോന്ന് തിരഞ്ഞെടുക്കുന്ന ബുദ്ധിമുട്ട് ഒഴിവാക്കാനും നല്ല സാധനങ്ങള് മകച്ച ഓഫറുകളില് ലഭിക്കാനും തുടങ്ങി നിരവധി ലാഭം ഇതിലുണ്ട്. നിരവധി ഓണ്ലൈന് ആപ്പുകള് ഉണ്ടെങ്കിലും ആമസോണ് ഫ്ലിപ്കാര്ട്ട് തുടങ്ങിയ ആപ്പുകള് സാധാരണക്കാര് ഏറെയും ആശ്രയിക്കുന്ന ഒന്നാണ്.
ഉപ്പ് തൊട്ട് കര്പ്പൂരം വരെ ഓണ്ലൈനില് ലഭ്യമാകുമ്പോള് മാര്ക്കറ്റിങ്ങിന്റെ പുതിയ തന്ത്രവുമായി എത്തിയിരിക്കുകയാണ് ആമസോണ്. ഇനി വീടുകള് വരെ ആമസോണ് വഴി ഹോം ഡെലിവറി'യായ് എത്തിക്കും.
'പ്രീ-ഫാബ്രിക്കേറ്റഡ് ഹോമുകള്' എന്നറിയപ്പെടുന്ന, കൂട്ടിയോജിപ്പിച്ച് താമസിക്കാന് കഴിയുന്ന വീടുകളാണ്, കമ്പനി ഓര്ഡര് അനുസരിച്ച് ഉപയോക്താക്കളുടെ വീട്ടില് എത്തിക്കുന്നത്. ഏകദേശം 10,37,494 രൂപ മുതല് 24,89,986 രൂപ വരെ വിലമതിക്കുന്ന വീടുകളാണ് കമ്ബനി തങ്ങളുടെ സൈറ്റില് ഒരുക്കിയിരിക്കുന്നത്.
19x20 അടി വലുപ്പത്തില്, 2 കിടപ്പുമുറികളും 1 സ്വീകരണമുറിയും 1 കുളിമുറിയും അടുക്കളയും അടങ്ങിയ വീടിന് 22,40,987 രൂപയാണ് കമ്പനി ഈടാക്കുന്നത്. എന്നാല് വീടുകള് നിലവില് യുഎസ്എ പോലുള്ള തിരഞ്ഞെടുത്ത രാജ്യങ്ങളില് മാത്രമാണ് ലഭ്യമാകുക.