കഴിഞ്ഞ ഒരുദശകമായി യുകെയിൽ വീട്ടുവാടക കുതിച്ചുയർന്നിരുന്നു. കോവിഡിനുശേഷം കുതിപ്പിന് ചെറിയൊരു കുറവ് വന്നെങ്കിലും ചില പ്രദേശങ്ങളെ കേന്ദ്രീകരിച്ച് വാടക ഉയർന്നുതന്നെ നിൽക്കുന്നു.
പ്രമുഖ സിറ്റികളോട് ചേർന്നുകിടക്കുന്ന ചെറു നഗരങ്ങളിലാണ് കോവിഡിനുശേഷം വാടക കുത്തനെ ഉയർന്നിട്ടുള്ളത് എന്നതാണ് ശ്രദ്ധേയമായ ഒരുകാര്യം.
പ്രധാന നഗരങ്ങളിൽ നിന്നും യാത്രാ ദൂരത്തിലുള്ള പട്ടണങ്ങളിൽ കഴിഞ്ഞ മൂന്ന് വർഷത്തിനിടയിലെ ഏറ്റവും വലിയ വാടക വർധനവുണ്ടായതായി പുതിയ പഠനങ്ങൾ സൂചിപ്പിക്കുന്നു.
2020 നും 2023 നും ഇടയിൽ ബോൾട്ടൺ, ന്യൂപോർട്ട് തുടങ്ങിയ മേഖലകളിൽ പുതിയ വാടക വീടുകളുടെ നിരക്ക് മൂന്നിലൊന്നിലധികം വർദ്ധിച്ചതായി പ്രമുഖ പ്രോപ്പർട്ടി പോർട്ടൽ സൂപ്ലയുടെ സർവേ റിപ്പോർട്ടിൽ പറയുന്നു.
ഗ്ലാസ്ഗോ, ലണ്ടൻ, മാഞ്ചസ്റ്റർ, എഡിൻബർഗ് എന്നിവിടങ്ങളിൽ വീട്ടുവാടകയ്ക്ക് വലിയ ഉയർച്ചയുണ്ടായെങ്കിലും വാടക്കാരുടെ ആവശ്യത്തിനുള്ള പുതിയ മാറ്റം പരിധിവിട്ടുയരാതെ നിർത്താൻ സ്വാധീനം ചെലുത്തിയിട്ടുണ്ട്.
കോവിഡിനുശേഷമുള്ള ഹോം വർക്കിങ് അഥവാ വീട്ടിലിരുന്ന് ജോലിചെയ്യുന്ന സിസ്റ്റം ചിലർക്ക് നഗരങ്ങളിൽ നിന്നുമാറി അടുത്തുള്ള ചെറുപട്ടണങ്ങളിൽ കൂടുതൽ വലിയ വീടുകൾ വാടകയ്ക്ക് എടുക്കാൻ അനുവദിച്ചു.
വലിയ നഗരങ്ങളിലേക്ക് വളരെയെളുപ്പം ഗതാഗത സൗകര്യമുള്ള പ്രദേശങ്ങളിൽ അമ്പരപ്പിക്കുന്ന തരത്തിലുള്ള മത്സരം ഉണ്ടായിട്ടുണ്ടെന്ന് ഏജൻ്റുമാർ പറഞ്ഞു.
യുകെയിലെ 65 നഗരങ്ങളിൽ നടത്തിയ പഠനത്തിൽ. പ്രധാന നഗരങ്ങളായ ലണ്ടൻ, ലീഡ്സ്, കാർഡിഫ് എന്നിവിടങ്ങളിലേക്ക് താരതമ്യേന എളുപ്പത്തിൽ പ്രവേശനമുള്ള പ്രദേശങ്ങളിലാണ് ഏറ്റവും വലിയ വർദ്ധനവുള്ള 10 നഗരങ്ങളിൽ ആറെണ്ണം.
അവയിൽ വിഗാൻ, ന്യൂപോർട്ട്, ബ്രാഡ്ഫോർഡ്, റോച്ച്ഡെയ്ൽ, ലൂട്ടൺ എന്നിവ ഉൾപ്പെടുന്നു.
എന്നാൽ ഇവയെയെല്ലാം ബഹുദൂരം പിന്നിലാക്കിയത് ബോൾട്ടൺ നഗരമാണ്. അവിടെ 2023 അവസാനം വരെയുള്ള മൂന്ന് വർഷങ്ങളിൽ പുതിയ വീടുകളുടെ വാടക ഏകദേശം 39% വർദ്ധിച്ചു
കഴിഞ്ഞ മൂന്ന് വർഷങ്ങളിൽ വരുമാനത്തേക്കാൾ ഇരട്ടി വേഗത്തിൽ വാടക വർധിച്ചു (ഗ്ലാസ്ഗോ, മാഞ്ചസ്റ്റർ, ലണ്ടൻ, എഡിൻബർഗ്, വിഗാൻ എന്നിവിടങ്ങളിൽ ഇത് വ്യക്തമാണ്. ഇവിടങ്ങളിൽ വാടക പ്രതിമാസം 100 പൗണ്ട് എന്ന നിലയിലാണ് ഉയരുന്നത്.
ബോൾട്ടൻ്റെ ഒരു ആകർഷണം, പുതിയ വാടകവീടുകളുടെ ശരാശരി വാടക ഇപ്പോഴും അയൽ പ്രദേശങ്ങളായ റോച്ച്ഡെയ്ൽ, വാറിംഗ്ടൺ, മാഞ്ചസ്റ്റർ എന്നിവയേക്കാൾ കുറവാണ് എന്നതാണ്.
ആവശ്യക്കാർ ഉയർന്നതാണെങ്കിലും, ലഭ്യമായ പ്രോപ്പർട്ടികളുടെ അഭാവമാണ് വാടക കൂടാൻ വലിയ ഘടകമെന്ന് ചൂണ്ടിക്കാണിക്കപ്പെടുന്നു. 2016 മുതൽ വാടകവീടുകളുടെ എണ്ണത്തിൽ കാര്യമായ മാറ്റമുണ്ടായിട്ടില്ല, കഴിഞ്ഞ രണ്ട് വർഷങ്ങളായി അസാധാരണമായ ഡിമാൻഡിനൊപ്പം പുതിയ വീടുകളുടെ നിർമ്മാണ വേഗത നിലനിർത്തുന്നതിൽ പരാജയപ്പെട്ടു.
കുടിയേറ്റം, താരതമ്യേന ശക്തമായ തൊഴിൽ വിപണി, കോവിഡ് മഹാമാരി മുതൽ യുകെയിലേക്കുള്ള വിദേശ വിദ്യാർത്ഥികളുടെ തിരിച്ചുവരവ് എന്നിവ നഗരങ്ങളിൽ ഡിമാൻഡിലേക്ക് നയിച്ചു, ഇത് ചില വാടകക്കാരെ കൂടുതൽ ദൂരെയുള്ള സ്ഥലങ്ങൾ നോക്കാൻ പ്രേരിപ്പിച്ചുവെന്നും സർവ്വേ റിപ്പോർട്ടിൽ പറയുന്നു.
ആവശ്യക്കാരുടെ എണ്ണം കുത്തനെ കൂടിയ ഈ ഘട്ടത്തിൽ വാടക ക്യൂവിൻ്റെ മുൻവശത്ത് എങ്ങനെ എത്തിച്ചേരാം എന്നതിനുള്ള ചില വഴികൾ അറിയുക:
ഒരു വാടകക്കരാർ അവസാനിക്കുന്നതിന് മുമ്പുതന്നെ പുതിയതിനായി നന്നായി തിരയാൻ ആരംഭിക്കുക. ഒന്നിലധികം ഏജൻ്റുമാരുമായി സൈൻ അപ്പ് ചെയ്യുക
പേസ്ലിപ്പുകൾ, ഒരു ജോലി റഫറൻസ്, മുൻ കെട്ടിട ഉടമയിൽ നിന്നുള്ള ഒരു റഫറൻസ് എന്നിവ കൈവശം വയ്ക്കുക
പ്രദേശത്തെ ഏജൻ്റുമാരുമായി ഒരു നല്ലബന്ധം സ്ഥാപിക്കുക.
വീടിനായുള്ള തിരച്ചിൽ ഏതെങ്കിലും ഒരുപ്രദേശത്ത് കേന്ദ്രീകരിക്കാതെ വിശാലമാക്കാൻ തയ്യാറാകുക
നിങ്ങളുടെ ബജറ്റ് ഉറപ്പാക്കുക, നിങ്ങൾക്ക് എത്ര തുക മുൻകൂറായി നൽകാമെന്ന് കണക്കാക്കുക
ലിസ്റ്റുചെയ്യുന്നതിന് മുമ്പ് ചില ഏജൻ്റുമാർ സോഷ്യൽ മീഡിയൽ പ്രോപ്പർട്ടികൾ അവതരിപ്പിക്കാറുള്ളത് പരിശോധിക്കുക.