മലയാളി നഴ്സുമാർക്ക് യുകെയിൽ വരുംവർഷങ്ങളിലും തൊഴിലവസരങ്ങളുടെ സുവർണ്ണകാലം തന്നെയായിരിക്കും. ഇക്കാര്യം വ്യക്തമാക്കുന്നതാണ് വെയിൽസിലെ നഴ്സുമാരുടെ പ്രമുഖ സംഘടനയായ റോയൽ കോളേജ് ഓഫ് വെയിൽസിന്റെ പുതിയ വെളിപ്പെടുത്തൽ.
കേരള സർക്കാരുമായി വെയിൽസ് ആരോഗ്യമന്ത്രി കഴിഞ്ഞദിവസം ഒപ്പുവച്ച നഴ്സസ് റിക്രൂട്ട്മെന്റ് കരാറിനെക്കുറിച്ച് പ്രതികരിക്കവേയാണ് വെയിൽസ് ആർസിഎൻ ചീഫ് ഇക്കാര്യം വ്യക്തമാക്കിയത്. പുതിയ കരാർ അനുസരിച്ച് നോർക്കവഴി കേരളത്തിൽ നിന്ന് 250 നഴ്സുമാരേയും ഡോക്ടർമാരേയുമാണ് ആദ്യഘട്ടത്തിൽ വെയിൽസ് സർക്കാർ രാജ്യത്തെ എൻഎച്ച്എസ് സ്ഥാപനങ്ങളിൽ എത്തിക്കുക.
എന്നാലിത് നിലവിലെ നഴ്സുമാരുടെ കുറവും അതുവഴി കരാർ ജീവനക്കാരുടെ ചിലവ് കുറയ്ക്കാനും ഒട്ടും പര്യാപ്തമല്ലെന്ന് ആർസിഎൻ യൂണിയൻ മേധാവി ചൂണ്ടിക്കാണിച്ചു.
കഴിഞ്ഞവർഷത്തെ എൻഎച്ച്എസ് കണക്കുകൾ കാണിക്കുന്നത് ഏകദേശം 4,300 ഒഴിവുകൾ വെയിൽസിൽ മാത്രമുണ്ടെന്നാണ്. അതിൽ 2,300 ഒഴിവുകൾ നഴ്സിംഗ്, മിഡ്വൈഫറി, ഹെൽത്ത് അസിസ്റ്റന്റ്സ് എന്നിവയിലേതാണ്.
എന്നാൽ ഏറ്റവും പുതിയ കണക്കനുസരിച്ച് ഇപ്പോൾ മൂവായിരത്തോളം നഴ്സുമാരെ അടിയന്തരമായി ആവശ്യമുണ്ടെന്ന് വെയിൽസിലെ റോയൽ കോളേജ് ഓഫ് നഴ്സിംഗ് ഡയറക്ടർ ഹെലൻ വൈലി അറിയിച്ചു.
ഇത് മനസ്സിലാക്കി വെയിൽസിലെ ഹെൽത്ത് ബോർഡുകൾ നിലവിലെ ജീവനക്കാരുടെ കുറവ് നികത്താൻ വിദേശത്ത് നിന്ന് സ്വന്തം നിലയിൽ ജീവനക്കാരെ ഇപ്പോൾ റിക്രൂട്ട് ചെയ്യുന്നു.
കേരളത്തിൽ നിന്ന് 900 നഴ്സുമാരെ റിക്രൂട്ട് ചെയ്യാനുള്ള പദ്ധതി സ്വാൻസീ ഹെൽത്ത് ബോർഡ് അടുത്തിടെ പ്രഖ്യാപിച്ചിരുന്നു. അടുത്ത നാല് വർഷത്തിനുള്ളിൽ വിവിധ റിക്രൂട്ട്മെന്റുകളിലായി 900 നഴ്സുമാരെ വെയിൽസിൽ എത്തിക്കാനാണ് സ്വാൻസി ഹെൽത്ത് ബോർഡിന്റെ പദ്ധതി.
നഴ്സുമാരിൽ നല്ലൊരുവിഭാഗത്തെ കേരളത്തിൽ നിന്ന് റിക്രൂട്ട് ചെയ്യും. വിവിധ അംഗീകൃത ഏജൻസികളുമായി സഹകരിച്ച് അതിനുള്ള പ്രാരംഭ നടപടികൾ ആരംഭിച്ചതായും സ്വാൻസീ ബേ ഹെൽത്ത് ബോർഡിലെ നഴ്സിംഗ് ഡയറക്ടറും പേഷ്യൻ്റ് എക്സ്പീരിയൻസ് ഡയറക്ടറുമായ ഗാരെത് ഹോവെൽസ് പറഞ്ഞു
സ്വാൻസി ഹെൽത്ത് ബോർഡിൽ ഏകദേശം 4,200 നഴ്സുമാരും മിഡ്വൈഫുമാരും ഇപ്പോൾ ജോലിചെയ്യുന്നു. നിലവിൽ 51 വയസ്സിന് മുകളിലുള്ള 1,322 നഴ്സുമാരും മിഡ്വൈഫുമാരും വളരെവേഗം അല്ലെങ്കിൽ അടുത്ത കുറച്ച് വർഷങ്ങളിൽ വിരമിക്കുമെന്നതും നഴ്സുമാരുടെ കുറവുകൂട്ടുമെന്ന് റിപ്പോർട്ടിൽ ചൂണ്ടിക്കാണിക്കുന്നു.
ഇന്ത്യയ്ക്കുപുറമെ ഫിലിപ്പീൻസ്, ആഫ്രിക്ക, കരീബിയൻ എന്നിവിടങ്ങളിൽ നിന്നുമാണ് വെയിൽസ് ഹെൽത്ത് ബോർഡുകൾ കൂടുതൽ ഹെൽത്ത് പ്രൊഫഷണലുകളെ റിക്രൂട്ടുചെയ്യുന്നത്.
കേരളത്തിൽ നിന്നുള്ള നഴ്സുമാരുടെ നേരിട്ടുള്ള റിക്രൂട്ട്മെന്റിനായി വെൽഷ് ആരോഗ്യമന്ത്രി എലുനെഡ് മോർഗനാണ് കഴിഞ്ഞദിവസം കേരള സർക്കാരുമായി കരാറിൽ ഒപ്പുവച്ചത്. കരാർ ഒപ്പിട്ട ശേഷം സംസാരിച്ച വെയിൽസ് ആരോഗ്യ മന്ത്ര, പുതിയ കരാർ ഏജൻസികൾ വഴി തൊഴിലാളികളെ കണ്ടെത്തുന്നതിനുള്ള ചെലവ് കുറയ്ക്കുമെന്നും പറഞ്ഞു.
എന്നാൽ ആയിരക്കണക്കിന് നഴ്സിംഗ് ഒഴിവുകൾ നികത്താൻ വെൽഷ് സർക്കാർ കൂടുതൽ നടപടി സ്വീകരിക്കണമെന്നും അല്ലാത്തപക്ഷം ഏജൻസികളുടെ റിക്രൂട്ട്മെന്റ് നിർബാധം തുടരുമെന്നും ആർസിഎൻ ബോസ് മിസ് വൈലി പറഞ്ഞു.