ലൂട്ടണില് അന്തരിച്ച ജിജി മാത്യൂ(56)സിന്റെ പൊതുദര്ശനം ഇന്ന് (തിങ്കളാഴ്ച) രാവിലെ 11 മണി മുതല് ഉച്ചയ്ക്ക് രണ്ടു മണി വരെ സെന്റ് മാര്ട്ടിന് ഡി പോര്സ് കാത്തലിക് ചര്ച്ചില് നടക്കും. 19ന് രാവിലെ 10 മണിക്ക് സെന്റ് തോമസ് ഇന്ത്യന് ഓര്ത്തഡോക്സ് ചര്ച്ച് ഹെമല് ഹെംസ്റ്റെഡില് സംസ്കാര ശുശ്രൂഷകള് നടത്തും. ഇന്ത്യന് ഓര്ത്തഡോക്സ് സഭ യുകെ, യൂറോപ്പ് ആന്ഡ് ആഫ്രിക്ക ഭദ്രസനാധിപന് എബ്രഹാം മാര് സ്തേഫാനോസ് മെത്രാപ്പൊലീത്താ സംസ്കാര ശുശ്രൂഷകള്ക്ക് നേതൃത്വം നല്കും.
ബെക്കിങ്ഹാംഷെയറിലെ സ്റ്റോക് മണ്ടേവില്ലേ എന്എച്ച്എസ് ഹോസ്പിറ്റലിലെ ജീവനക്കാരനും ലൂട്ടന് കേരളൈറ്റ് അസോസിയേഷന്റെ സ്ഥാപക പ്രവര്ത്തകരില് ഒരാളുമായിരുന്ന ജിജിയുടെ മരണം യുകെ മലയാളികള്ക്ക് ഏറെ വേദനാജനകമായിരുന്നു. ഡിസംബര് 26 ന് രാത്രി ഉറങ്ങാന് കിടന്ന ജിജിക്ക് 27 ന് പുലര്ച്ചെ ഒരു മണിയോടെ ശാരീരിക അസ്വസ്ഥത അനുഭവപ്പെടുകയായിരുന്നു. ഭാര്യയുടെ കണ്മുന്നിലാണ് ജിജിയുടെ മരണം സംഭവിച്ചത്. അര്ദ്ധ രാത്രിയോടെ എന്തോ അസ്വസ്ഥത തോന്നിയ ജിജി ഉറക്കത്തില് എഴുന്നേറ്റു വെള്ളം കുടിക്കാന് താഴെ അടുക്കളയില് എത്തുക ആയിരുന്നു. ജിജി മുകളിലേക്ക് കയറി വരാതിരുന്നതോടെ താഴേക്ക് വന്ന ഭാര്യ കണ്ടത് പ്രയാസപ്പെടുന്ന ഭര്ത്താവിനെയാണ്. നെഞ്ചു വേദനയെ തുടര്ന്ന് സ്ഥിതി വഷളാകുന്നത് മനസ്സിലാക്കിയ ഉടന് വീട്ടുകാര് ആംബുലന്സ് സേവനം തേടി. ആംബുലന്സ് ജീവനക്കാര് നിമിഷ നേരത്തിനുള്ളില് ആശുപത്രിയില് എത്തിച്ചെങ്കിലും മരണം സംഭവിച്ചു.
22 വര്ഷങ്ങള്ക്കു മുന്പാണ് ജിജിയും കുടുംബവും യുകെയില് എത്തിയത്. ഐയ്ല്സ്ബറി എന്എച്ച്എസ് ഹോസ്പിറ്റലിലായിരുന്നു ജിജി ജോലി ചെയ്തിരുന്നത്. യുകെയിലെ സാമൂഹിക പ്രവര്ത്തന രംഗത്തും ഇന്ത്യന് ഓര്ത്തഡോക്സ് സഭയുടെ പ്രവര്ത്തനങ്ങളിലും ഏറെ സജീവമായിരുന്നു ജിജി. ഗ്ലോസ്റ്ററില് ഈ അടുത്ത് നടന്ന രണ്ട് കാര് അപകടങ്ങളില് പെട്ടവര്ക്ക് സാമ്പത്തിക സഹായം എത്തിക്കുന്നതിനും ജിജി അക്ഷീണം പ്രവര്ത്തിച്ചിരുന്നു. ലണ്ടന് സെന്റ് തോമസ് ഇന്ത്യന് ഓര്ത്തഡോക്സ് പള്ളി രൂപീകരിച്ചവരില് പ്രധാനിയും നിലവില് പള്ളിയുടെ സെക്രട്ടറിയുമായിരുന്നു. മലയാളികളുടെ എല്ലാ പ്രശ്നങ്ങളിലും സജീവമായി ഇടപെടുന്ന അദ്ദേഹം, സംഘടനയുടെ പ്രസിഡന്റ്, യുക്മയുടെ പല പരിപാടികളിലും സജീവ പങ്കാളിത്വം വഹിച്ചിട്ടുണ്ട്.
ലൂട്ടന് എല് ആന്ഡ് ഡി യൂണിവേഴ്സിറ്റി ഹോസ്പിറ്റലില് നഴ്സായ ഷേര്ലി കോശി ആണ് ഭാര്യ. മക്കള്: ഡോ. നിക്കി ജിജി (എന്എച്ച്എസ്), നിഖില് ജിജി, നോയല് ജിജി. മരുമകന്: ഡെന്നിസ് വര്ഗീസ്.
പൊതുദര്ശനം നടക്കുന്ന ദേവാലയത്തിന്റെ വിലാസം
St. Martin De Porres CatholicChurch, 366, Leagrave High tSreet, Luton, LU4 0NG
സംസ്കാര ശുശ്രൂഷകള് നടക്കുന്ന ദേവാലയത്തിന്റെ വിലാസം
St. Thomas Indian Orthodox Church, St. Agnells Lane, Hemel Hempstead, HP2 7AY