ജീവിച്ചിരിക്കുന്നവരില് ലോകത്തെ ഏറ്റവും പ്രായമേറിയ മനുഷ്യനെന്ന റെക്കോഡ് സ്വന്തമാക്കി ഇംഗ്ലണ്ടില് നിന്നുള്ള 111 വയസ്സുകാരന്. 1912-ല് ജനിച്ച ജോണ് ആല്ഫ്രഡ് ടിന്നിസ്വുഡ് എന്ന ഈ മുതുമുത്തച്ഛന് ലിവര്പൂളിലാണ് ജനിച്ചത്. ഇപ്പോള് സൗത്ത്പോര്ട്ടിലെ ഒരു കെയര് ഹോമിലാണ് താമസിക്കുന്നത്. എല്ലാ വെള്ളിയാഴ്ചയും മത്സ്യവും ചിപ്സും കഴിക്കുന്നുവെന്നത് മാത്രമാണ് താന് പിന്തുടരുന്ന ഭക്ഷണക്രമത്തിന്റെ ആകെയുള്ള പ്രത്യേകത എന്ന് അദ്ദേഹം പറയുന്നു. ടൈറ്റാനിക് മുങ്ങിയ അതേ വര്ഷം ജനിച്ച തന്റ ദീര്ഘായുസ്സിന്റെ രഹസ്യം വെറും ഭാഗ്യം മാത്രമാണെന്നാണ് അദ്ദേഹത്തിന്റെ വാദം.
ജപ്പാനില് നിന്നുള്ള 112 കാരനായ ഗിസാബുറോ സോനോബ് മാര്ച്ച് 31 ന് മരിച്ചുവെന്ന് സ്ഥിരീകരിച്ചതിന് ശേഷമാണ് ലോകത്തിലെ ഏറ്റവും പ്രായം കൂടിയ മനുഷ്യന് എന്ന പദവി അദ്ദേഹത്തിന് ലഭിച്ചത്.
തന്റെ ദീര്ഘായുസ്സിനെക്കുറിച്ച് പ്രതികരിച്ചുകൊണ്ട് ടിന്നിസ്വുഡ് ഗിന്നസ് വേള്ഡ് റെക്കോര്ഡിനോട് പറഞ്ഞു: 'ഒന്നുകില് നിങ്ങള് ദീര്ഘനേരം ജീവിക്കുന്നു അല്ലെങ്കില് നിങ്ങള് ഹ്രസ്വമായി ജീവിക്കുന്നു. ഇക്കാര്യത്തില് നിങ്ങള്ക്ക് കൂടുതലൊന്നും ചെയ്യാന് കഴിയില്ല.' എല്ലാ വെള്ളിയാഴ്ചയും കെയര് ഹോമില് നിന്നും മീന് കൂട്ടിയുള്ള അത്താഴം ലഭിക്കുമെന്ന് അദ്ദേഹം പറഞ്ഞു: ''അവര് എനിക്ക് നല്കുന്നത് ഞാന് കഴിക്കുന്നു, എനിക്ക് പ്രത്യേക ഭക്ഷണക്രമമില്ല.''
''നിങ്ങള് അമിതമായി കുടിക്കുകയോ അമിതമായി ഭക്ഷണം കഴിക്കുകയോ അമിതമായി നടക്കുകയോ ചെയ്താല്, നിങ്ങള് അമിതമായി എന്തെങ്കിലും ചെയ്താല്, ഒടുവില് നിങ്ങള് കഷ്ടപ്പെടേണ്ടിവരുമെന്നും അദ്ദേഹം മുന്നറിയിപ്പേകുന്നു.
2020-ല് യുകെയിലെ ഏറ്റവും പ്രായം കൂടിയ മനുഷ്യനായി മാറിയ ടിന്നിസ്വുഡ്, ലോകത്തിലെ ഏറ്റവും പ്രായം കൂടിയ മനുഷ്യന് എന്ന തന്റെ പുതിയ നേട്ടത്തില് അമിതമായി ആഹ്ലാദം പ്രകടിപ്പിക്കുകയോ അത്ഭുതപ്പെടുകയോ ചെയ്യുന്നില്ല.
''ഇത് എന്നില് ഒരു വ്യത്യാസവും വരുത്തുന്നില്ല, അത് എന്താണെങ്കിലും ഞാന് അത് സ്വീകരിക്കുന്നു എന്ന മാത്രം'. അദ്ദ്ഹം പറയുന്നു.
2012-ല് 100 വയസ്സ് തികഞ്ഞത് മുതല്, അദ്ദേഹത്തിന് തന്നേക്കാള് 14 വയസ്സ് പ്രായക്കുറവുള്ള എലിസബത്ത് രാജ്ഞിയില് നിന്ന് എല്ലാ വര്ഷവും ജന്മദിന കാര്ഡ് ലഭിച്ചിരുന്നു. യുവതലമുറകള്ക്ക് ഉപദേശം നല്കിക്കൊണ്ട് അദ്ദേഹം പറഞ്ഞു: ''നിങ്ങള് എന്തെങ്കിലും പഠിക്കുകയാണെങ്കിലും അല്ലെങ്കില് ആരെയെങ്കിലും പഠിപ്പിക്കുകയാണെങ്കിലും നിങ്ങള്ക്ക് കഴിയുന്ന ഏറ്റവും മികച്ചത് എപ്പോഴും ചെയ്ത് കൊണ്ടിരിക്കുക''
ടിന്നിസ്വുഡിന് ഇപ്പോഴും ദൈനംദിന മിക്ക ജോലികളും സ്വതന്ത്രമായി ചെയ്യാന് കഴിയും. പരസഹായമില്ലാതെ കിടക്കയില് നിന്ന് എഴുന്നേല്ക്കുന്നു, വാര്ത്തകള് അറിയാന് റേഡിയോ കേള്ക്കുന്നു, ഇപ്പോഴും സ്വന്തം സാമ്പത്തികം കൈകാര്യം ചെയ്യുന്നു.
രണ്ട് ലോകമഹായുദ്ധങ്ങളിലൂടെയും ജീവിച്ച അദ്ദേഹം, ആര്മി പേ കോര്പ്സിന്റെ ഭരണപരമായ റോളില് പ്രവര്ത്തിച്ചതിനാല്, രണ്ടാം ലോക മഹായുദ്ധത്തില് ജീവിച്ചിരിക്കുന്ന ലോകത്തിലെ ഏറ്റവും പ്രായം കൂടിയ പുരുഷന് കൂടിയാണ്.
അക്കൗണ്ടുകള്ക്കും ഓഡിറ്റിങ്ങിനും പുറമേ, ഒറ്റപ്പെട്ട സൈനികരെ കണ്ടെത്തുക, ഭക്ഷണ വിതരണം സംഘടിപ്പിക്കുക തുടങ്ങിയ ലോജിസ്റ്റിക് ജോലികള് അദ്ദേഹത്തിന്റെ ജോലിയില് ഉള്പ്പെട്ടിരുന്നു.
ആജീവനാന്ത ലിവര്പൂള് എഫ്സി ആരാധകനായ ടിന്നിസ്വുഡ് 1892-ല് ക്ലബ് സ്ഥാപിതമായി 20 വര്ഷത്തിനുശേഷമാണ് ജനിച്ചത്. കൂടാതെ തന്റെ ക്ലബ്ബിന്റെ എട്ട് എഫ്എ കപ്പ് വിജയങ്ങള്ക്കും 19 ലീഗ് കിരീടങ്ങള്ക്കും അദ്ദേഹം സാക്ഷിയാണ്.
തന്റെ ജീവിതത്തിലുടനീളം ചുറ്റുമുള്ള ലോകം എങ്ങനെ മാറിയെന്ന് ചോദിച്ചപ്പോള്, ടിന്നിസ്വുഡ് പറഞ്ഞു: ''ലോകം, അതിന്റെ രീതിയില്, എപ്പോഴും മാറിക്കൊണ്ടിരിക്കുന്നു. ഇത് ഒരുതരം തുടര്ച്ചയായ അനുഭവമാണ് ... ഇത് കുറച്ചുകൂടി മെച്ചപ്പെടുന്നു, അത് ശരിയായ വഴിക്ക് പോകുന്നു. '
ലിവര്പൂളിലെ ഒരു നൃത്ത പരിപാടിയില് വെച്ചാണ് അദ്ദേഹം തന്റെ ഭാര്യ ബ്ലഡ്വെനെ കണ്ടുമുട്ടി,യത്. 986-ല് മരിക്കുന്നതിന് മുമ്പ് ദമ്പതികള് 44 വര്ഷം ഒരുമിച്ച് ജീവി്ച്ചു.
ഏറ്റവും പ്രായം കൂടിയ പുരുഷന് ജപ്പാനില് നിന്നുള്ള ജിറോമോന് കിമുറയാണ്, അദ്ദേഹം 116 വയസ്സ് 54 ദിവസം വരെ ജീവിച്ചു. 2013-ല് മരിച്ചു. ലോകത്തിലെ ഏറ്റവും പ്രായം കൂടിയ സ്ത്രീയും ജീവിച്ചിരിക്കുന്ന ഏറ്റവും പ്രായം കൂടിയ വ്യക്തിയും സ്പെയിനിന്റെ മരിയ ബ്രാന്യാസ് മൊറേറയാണ്. അടുത്തിടെയാണ അവര് തന്റെ 117-ാം ജന്മദിനം ആഘോഷിച്ചത്.