ലണ്ടൻ: സ്വന്തം ലേഖകൻ

കുറ്റകൃത്യങ്ങള്‍ അമര്‍ച്ച ചെയ്‌തെന്ന ലണ്ടന്‍ മേയര്‍ സാദിഖ് ഖാന്റെ പ്രചാരണത്തെ പ്രതിരോധിക്കാന്‍ പുറത്തിറക്കിയ ഓണ്‍ലൈന്‍ വീഡിയോ കണ്‍സര്‍വേറ്റീവുകള്‍ പിന്‍വലിച്ചു. ലണ്ടനില്‍ നടന്ന സംഭവം എന്ന പേരില്‍ പ്രചരിപ്പിക്കപ്പെട്ടത് ന്യൂയോര്‍ക്ക് സബ്വേ സ്റ്റേഷനില്‍ നടന്ന സംഭവമായിരുന്നു എന്ന കണ്ടെത്തലിനും തുടര്‍ന്നുണ്ടായ വ്യാപക വിമര്‍ശനത്തിനും പിന്നാലെയാണ് നീക്കം. പെന്‍ സ്റ്റേഷനിലൂടെ ഓടുന്ന പരിഭ്രാന്തരായ ജനക്കൂട്ടത്തിന്റെ ദൃശ്യങ്ങളാണ് തെറ്റായ രീതിയില്‍ പ്രചരിപ്പിക്കപ്പെട്ടത്.  

ലണ്ടന്‍ മേയറല്‍ ഖാന്റെ എതിരാളിയായ സൂസന്‍ ഹാളിനെ പിന്തുണച്ച് എക്സില്‍ പോസ്റ്റുചെയ്ത ആക്രമണ വീഡിയോ, 2017-ല്‍ ഒരു വെടിവയ്പ്പിനെക്കുറിച്ചുള്ള തെറ്റായ റിപ്പോര്‍ട്ടുകളെത്തുടര്‍ന്ന് ആളുകള്‍ പരിഭ്രാന്തരായി ന്യൂയോര്‍ക്കിലെ പെന്‍ സ്റ്റേഷനിലൂടെ ഓടുന്നതാണ്. 

വീഡിയോയിലെ അടിക്കുറിപ്പ് 'ലണ്ടന്‍ ലോകത്തിന്റെ ഒരു കുറ്റകൃത്യ തലസ്ഥാനമായി മാറിയിരിക്കുന്നു' എന്നായിരുന്നു. കൂടാതെ ലേബര്‍ പാര്‍ട്ടിയുടെ പ്രതീകമായ ചുവന്ന റോസാപ്പൂവിന്റെ ഒരു ഇമോജി അതിന്റെ ദളങ്ങള്‍ വാടുകയും കൊഴിയുകയും ചെയ്യുന്നതായും വീഡിയോയില്‍ കാണാം. 

ബ്ലാക്ക് ആന്റ് വൈറ്റ് നിറത്തില്‍ കാണിച്ചിരിക്കുന്ന പെന്‍ സ്റ്റേഷനില്‍ നിന്നുള്ള ദൃശ്യങ്ങളില്‍ യുഎസ് ഉച്ചാരണത്തിലുള്ള ഒരു ആഖ്യാതാവ് 'ലേബര്‍ മേയര്‍ അധികാരത്തില്‍ വന്നതിന് ശേഷം കത്തി കുറ്റകൃത്യങ്ങളില്‍ 54% വര്‍ദ്ധനവ് ഉണ്ടായെന്നും മെട്രോപോളിസ് അരാജകത്വത്തിന്റെ വക്കിലാണെന്നും വിശദീകരിക്കുകയുമാണ്. അരാജകത്വത്തില്‍നിന്നും ആളുകള്‍ ഒരു ആശ്വാസം തേടുന്നെന്നും വീഡിയോയില്‍ പറയുന്നു. 

അതേസമയം, ഇംഗ്ലണ്ടിലെയും വെയില്‍സിലെയും ക്രൈം സര്‍വേ പ്രകാരം, ലണ്ടനില്‍ കുറ്റകൃത്യങ്ങള്‍ക്ക് ഇരയാകാനുള്ള സാധ്യത രാജ്യത്തുടനീളമുള്ളതിനേക്കാള്‍ കുറവാണ് എന്നാണ് കണക്കുകള്‍. തലസ്ഥാനത്ത്, 2023 സെപ്റ്റംബറില്‍ അവസാനിക്കുന്ന വര്‍ഷത്തില്‍ ലണ്ടനില്‍ 14.9% ആളുകള്‍ കുറ്റകൃത്യം നേരിട്ടപ്പോള്‍ ദേശീയതലത്തില്‍ ഇത് 15.7% ആണ്.

കൂടുതല്‍ വിശകലനം പ്രകാരം ലണ്ടനില്‍ സാമൂഹ്യവിരുദ്ധ പെരുമാറ്റം ഏറ്റവും കുറവാണ്. കഴിഞ്ഞ മൂന്ന് മേയര്‍മാരുടെ കീഴിലും തലസ്ഥാനത്ത് കൊലപാതക നിരക്ക് കുറഞ്ഞിട്ടുണ്ട്. തോക്ക് ആക്രമണത്തെ തുടര്‍ന്നുള്ള ആശുപത്രി പ്രവേശനവും കഴിഞ്ഞ വര്‍ഷം കുറഞ്ഞു. തലസ്ഥാനത്ത് തോക്ക് കുറ്റകൃത്യങ്ങളും മറ്റ് കുത്തേറ്റ സംഭവങ്ങളും ഇതൊടൊപ്പം തന്നെ കുറവാണ്.