കേരളത്തിലെ കൊല്ലം തീരത്ത് ഇന്ധനപര്യവേക്ഷണത്തിന് യു.കെ കമ്പനി ഓയില് ഇന്ത്യ ലിമിറ്റഡുമായി കരാര് ഒപ്പിട്ടു. 2024 പകുതിയോടെ പര്യവേഷണം ആരംഭിക്കും. കമ്പനിയുമായി 154 ദശലക്ഷം ഡോളറിന്റെ (1287 കോടി) കരാറാണ് ഒപ്പിട്ടിരിക്കുന്നത്. കൊല്ലം അടക്കം മൂന്ന് ഇന്ത്യന് തീരങ്ങളിലാണ് പര്യവേക്ഷണം നടത്തുക. കൊല്ലം തീരത്തുനിന്ന് 48 കിലോമീറ്റര് ദൂരത്താണ് പര്യവേഷണം.
കൊല്ലത്തിനു പുറമേ ആന്ധ്രയിലെ അമലാപുരം, കേരള-കൊങ്കണ് മേഖല എന്നിവിടങ്ങളിലാണ് പര്യവേക്ഷണം നടത്തുക. രണ്ടിടത്തും പ്രാരംഭ നടപടികള് ഡോള്ഫിന് ഡ്രില്ലിങ് എ.എസ്. കമ്പനി നേരത്തേ പൂര്ത്തിയാക്കി. ജലനിരപ്പില്നിന്ന് ആറായിരം മീറ്റര്വരെ ആഴത്തിലാണ് പര്യവേക്ഷണത്തിനായി കൂറ്റന് കിണറുകള് നിര്മിക്കുക. 2020-ല് കൊല്ലം തീരം കേന്ദ്രമാക്കി ഓയില് ഇന്ത്യ പ്രാഥമിക പര്യവേക്ഷണം നടത്തിയിരുന്നു. ഇതിന്റെ അടിസ്ഥാനത്താണ് ഇപ്പോള് വിശദമായ പര്യവേക്ഷണം നടത്തുന്നത്. വാതക-ഇന്ധന സാധ്യതകള്കൂടി പ്രതീക്ഷിച്ചാണ് പര്യവേക്ഷണമെന്നാണ് വിവരം.
പര്യവേക്ഷണത്തിനുള്ള ഡ്രില്ലറുകള്, കൂറ്റന് പൈപ്പുകള്, മറ്റ് ഉപകരണങ്ങള് തുടങ്ങിയവ സൂക്ഷിക്കാന് കൊല്ലം പോര്ട്ട് കേന്ദ്രീകരിച്ച് ഡ്രില്ലിങ് പൈപ്പുകള് സംഭരിക്കും. ഇതിനുള്ള കൂറ്റന് യാര്ഡ്, പ്ലാന്റ്, പര്യവേക്ഷണ കപ്പലിനും ചെറുകപ്പലുകള്ക്കും ടഗ്ഗുകള്ക്കും ഇന്ധനം നിറയ്ക്കാനുള്ള സൗകര്യം, താത്കാലിക ഓഫീസ് മുറി തുടങ്ങിയ സംവിധാനങ്ങള് കൊല്ലം പോര്ട്ടില് സ്ഥാപിക്കും.