കേരളം രാജ്യത്ത് ഒന്നാമതെന്ന് നീതി ആയോഗ്. ആയുഷ് മേഖലയിലെ കേരളത്തിന്റെ ശ്രദ്ധേയമായ മുന്നേറ്റത്തെ അഭിനന്ദിച്ചിരിക്കുകയാണ് നീതി ആയോഗ്. ദേശീയതല അവലോകനത്തിന്റെ ഭാഗമായി ഉദ്യോഗസ്ഥരും വിദഗ്ധരും അടങ്ങുന്ന നീതി ആയോഗ് പ്രതിനിധി സംഘം ആയുഷ് ഹെല്ത്ത് ആന്റ് വെല്നസ് സെന്ററുകള് സന്ദര്ശിച്ച് സ്ഥിതി വിലയിരുത്തിയ ശേഷമുള്ള റിപ്പോര്ട്ടിലാണ് കേരളത്തെ അഭിനന്ദിച്ചത്.
ആയുഷ് രംഗത്ത് കേരളം നല്കുന്ന പ്രാധാന്യത്തിനുള്ള അംഗീകാരമാണ് നീതി ആയോഗിന്റെ അഭിനന്ദനമെന്ന് ആരോഗ്യ വകുപ്പ് മന്ത്രി വീണാ ജോര്ജ് പറഞ്ഞു. ഈ സര്ക്കാര് അധികാരത്തില് വന്ന ശേഷം കഴിഞ്ഞ രണ്ടു വര്ഷങ്ങളിലായി 532.51 കോടി രൂപയാണ് ആയുഷ് മേഖലയുടെ വികസനത്തിനായി അനുവദിച്ചത്. മുന് വര്ഷങ്ങളേക്കാള് മൂന്നിരട്ടി വര്ധനവാണ് നടത്തിയത്.
മെഡിക്കല് ക്യാമ്പുകള് സംഘടിപ്പിക്കുന്നതിലും കേരളം മുന്നിലാണ്. ഒരു ക്യാമ്പില് ഏകദേശം 600 പേര്വരെ എത്തുന്നുണ്ട്. ഇത് രാജ്യത്തെ ഏറ്റവും ഉയര്ന്ന നിരക്കാണ്. ആയുഷ് മെഡിക്കല് സേവനങ്ങളോടുള്ള ജനങ്ങളുടെ പൊതു മുന്ഗണനയിലും കേരളം ഒന്നാമതാണ്.
ആയുഷ് സേവനങ്ങള്ക്കായുള്ള ഒ.പി. വിഭാഗത്തില് രാജ്യത്ത് ഏറ്റവും കൂടുതല് സേവനം നല്കുന്നത് കേരളത്തിലാണെന്ന് നീതി ആയോഗ് വിലയിരുത്തി. ദിവസേന ആയുഷ് ഒ.പി. വിഭാഗത്തിലെത്തുന്ന രോഗികളുടെ എണ്ണത്തിലെ വര്ധനവ് ഈ രംഗത്തെ സ്വീകാര്യതയും മുന്ഗണനയും സൂചിപ്പിക്കുന്നതാണ്. മെഡിക്കല് ക്യാമ്പുകള് സംഘടിപ്പിക്കുന്നതില് കേരളം മികവ് പുലര്ത്തുന്നതായി നീതി ആയോഗ് സംഘം അഭിപ്രായപ്പെട്ടു. ഒരു ക്യാമ്പില് ഏകദേശം 600 പേര്വരെ എത്തുന്നുണ്ട്. ഇത് രാജ്യത്തെ തന്നെ ഏറ്റവും ഉയര്ന്നതാണ്.