സുരക്ഷിതമായി സുഹൃത്തുക്കളോട് ചാറ്റ് ചെയ്യാനും ചിത്രങ്ങളും വീഡിയോകളും പങ്കുവയ്ക്കാനും ഏറ്റവും പറ്റിയ ഇടം ഏതെന്ന് ചോദിച്ചാല് അദ്യം പറയുക വാട്സ്ആപ്പ് എന്നായിരിക്കും. സുരക്ഷയുടെ കാര്യത്തില് അതീവ ശ്രദ്ധ കൊടുക്കുന്നത് കൊണ്ട് തന്നെയാണ് വാട്സ്ആപ്പിന് ധാരാളം ഉപയോക്താക്കളുള്ളത്.
ഇപ്പോഴിതാ വീണ്ടും സുരക്ഷയുടെ കാര്യത്തില് ശ്രദ്ധ കൊടുക്കുകയാണ് വാട്സ്ആപ്പ്. അത്തരത്തില് ഒരു ഫീച്ചറാണ് വാട്സ്ആപ്പ് വീണ്ടും അവതരിപ്പിക്കുന്നത്. ലോക്ക് ചെയ്ത സ്ക്രീനില് പോലും ആപ്പ് തുറക്കാതെ തന്നെ സ്പാം നമ്പറുകളും സംശയാസ്പദമായ നമ്പറുകളും നേരിട്ട് ബ്ലോക്ക് ചെയ്യാന് കഴിയുന്നതാണ് ഫീച്ചര്.
ഉപയോക്താവിന് നോട്ടിഫിക്കേഷനില് നിന്ന് തന്നെ പരിചിതമില്ലാത്ത അക്കൗണ്ടുകള് ബ്ലോക്ക് ചെയ്യാം. പുതിയ വാട്ട്സ്ആപ്പ് ഫീച്ചര് ഉപയോഗിച്ച്, നോട്ടിഫിക്കേഷനിലെ ക്വിക്ക് ആക്ഷന്സ് മെനുവിലെ റിപ്ലൈ ബട്ടണിന് അടുത്തുള്ള ബ്ലോക്ക് ഓപ്ഷന് ടാപ്പ് ചെയ്യാം. ലോക്ക് സ്ക്രീനില് നോട്ടിഫിക്കേഷന് ദൃശ്യമാകാന് ഉപയോക്താവ് അനുവദിക്കുകയാണെങ്കില്, ഫോണ് തുറക്കാതെ തന്നെ ലോക്ക് സ്ക്രീനില് നിന്ന് നേരിട്ട് കോണ്ടാക്റ്റുകള് എളുപ്പത്തില് ബ്ലോക്ക് ചെയ്യാം.
വാട്ട്സ്ആപ്പിന് നേരത്തെ ബ്ലോക്ക് ആന്ഡ് റിപ്പോര്ട്ട് ഓപ്ഷന് ഉണ്ട്. അജ്ഞാത നമ്പറുകളില് നിന്നുള്ള മെസേജുകള്ക്ക് വാട്സ്ആപ്പ് ഇതിനകം തന്നെ മുന്നറിയിപ്പ് നല്കാറുണ്ട്. എന്നാല് ഈ നമ്പരുകളെ ബ്ലോക്ക് ചെയ്യണമെങ്കില് ചാറ്റ് ഓപ്പണ് ചെയ്യണമായിരുന്നു. പുതിയ ഫീച്ചര് ചാറ്റ് ഒപ്പണ് ചെയ്യാതെ തന്നെ അക്കൗണ്ടുകള് ബ്ലോക്ക് ചെയ്യാന് അനുവദിക്കും.