വിദ്യാഭ്യാസ മേഖലയില് മാറ്റങ്ങള് വരുന്നതിനെ കുറിച്ചുള്ള വിവരങ്ങള് നേരത്തെ തന്നെ പുറത്തു വന്നിരുന്നു. ഇപ്പോഴിതാ ആ മാറ്റങ്ങള് അടുത്ത് തന്നെ പ്രാഭല്യത്തില് വരുമെന്നാണ് പുറത്ത് വരുന്ന റിപ്പോര്ട്ടുകളില് പറയുന്നത്.
വിദേശ നാടുകളില് വിജയകരമായി നടപ്പാക്കിയ നാലുവര്ഷം നീളുന്ന ബിരുദ കോഴ്സുകള് അടുത്ത് തന്നെ കേരളത്തിലെ വിവിധ കാമ്പസ്സുകളില് ആരംഭിക്കും. വിദ്യാര്ത്ഥികള്ക്ക് വലിയ പ്രതീക്ഷയും അതേസമയം ആശങ്കയും നല്കുന്നതാണ് ഈ മാറ്റം. വൈകിയാണെങ്കിലും നാലുവര്ഷ ബിരുദ കോഴ്സുകള് കേരളത്തില് ആരംഭിക്കുമ്പോള് പ്രതീക്ഷകള് അനവധിയാണ്.
മറ്റ് രാജ്യങ്ങളില് ബിരുദ കോഴ്സുകളുടെ ദൈര്ഘ്യം നാലുവര്ഷമാണ്. ഈ രീതിയാണ് കേരളത്തിലും വരുന്നത്. ഇതോടെ വിദേശത്ത് പഠനത്തിന് പോകുന്ന മലയാളി വിദ്യാര്ത്ഥികള്ക്ക് തിരിച്ചടിയായിരുന്നു. പുതിയ പഠനസംവിധാനം ഇതിനു പരിഹാരമാണ്. ഗവേഷണത്തിന് ഇന്ത്യയില് ബിരുദാനന്തര ബിരുദമാണ് മാനദണ്ഡം. നാലുവര്ഷ ഓണേഴ്സ് കോഴ്സുകള് കഴിഞ്ഞവര്ക്ക് നേരിട്ട് ഗവേഷണത്തിന് ചേരാം.
നൈപുണ്യ വികസനം, തൊഴില് ക്ഷമത വര്ധന, മള്ട്ടി ഡിസ്സിപ്ലിനറി വിദ്യാഭ്യാസം എന്നിവ ഉറപ്പാക്കല് കൂടിയാണ് ലക്ഷ്യം. ഒരു സര്വകലാശാലയില് നിന്ന് മറ്റൊന്നിലേക്ക് മാറാനുള്ള അവസരവും ഉണ്ട്. നാലുവര്ഷ ബിരുദ കോഴ്സുകള് ആരംഭിക്കാന് സര്വകലാശാലകളില് അടിസ്ഥാനസൗകര്യ വികസനം ഉടന് നടപ്പാക്കണം. ക്യാമ്പസുകള് വിദ്യാര്ത്ഥി സൗഹൃദമാകുകയും അധ്യാപകര് സജ്ജരാവുകയും ചെയ്താല് കേരളത്തിലെ ഉന്നതവിദ്യാഭ്യാസ മേഖല പുതിയ ഉയരങ്ങളില് എത്തും.