ലിവര്പൂളിന് സമീപം വീടിനുള്ളില് മരിച്ച നിലയില് കണ്ടെത്തിയ മലയാളി വിദ്യാര്ത്ഥി വിജിന് വര്ഗീസിന്റെ കുടുംബത്തിന് വിരാല് മലയാളി കമ്യൂണിറ്റി ശേഖരിച്ച തുകയായ 6535 പൗണ്ട് കൈമാറി. ഇന്ത്യന് തുകയായ 636320.70 രൂപയാണ് മാതാപിതാക്കളായ കൊട്ടാരക്കര കിഴക്കേത്തെരുവ് ഇരുങ്ങൂര് നീലാംവിളയില് വിവി നിവാസില് ഗീവര്ഗീസിനും ജെസിക്കും ബാങ്ക് അക്കൗണ്ട് വഴി കൈമാറിയതെന്ന് വിരാല് മലയാളി കമ്യൂണിറ്റി പ്രസിഡന്റ് ജോഷി ജോസഫ് പറഞ്ഞു.
ചെസ്റ്റര് യൂണിവേഴ്സിറ്റിയില് എംഎസ് സി എഞ്ചിനീയറിങ് മാനേജ്മെന്റ് വിദ്യാര്ത്ഥിയായിരുന്നു. വിജിന്റെ പരീക്ഷാ ഫലം മരണ ശേഷമായിരുന്നു പുറത്തുവന്നത്. മികച്ച വിജയം നേടിയിട്ടും അതറിയാന് വിജിന് കാത്തു നില്ക്കാതെയാണ് മടങ്ങിയത്. കഴിഞ്ഞ വര്ഷം സെപ്തംബറിലാണ് വിജിന് യുകെയില് എത്തിയത്. വിജിന്റെ അസ്വാഭാവിക മരണത്തില് പോലീസ് കേസെടുത്തു അന്വേഷണം നടത്തുകയാണ്. വിവരങ്ങള് മാര്ച്ച് മാസത്തോടെ പുറത്തുവിടുമെന്നാണു കരുതുന്നത്.