നിരവധി പേര് ഉപയോക്താക്കളായുള്ള ട്വിറ്റര് വീണ്ടും ഹാക്ക് ചെയ്യപ്പെട്ടതായി റിപ്പോര്ട്ടുകള് പുറത്ത്. കഴിഞ്ഞ വര്ഷവും ട്വിറ്റര് ഹാക്ക് ചെയ്യപ്പെട്ടിരുന്നു. ഇപ്പോള് ഈ പുതുവര്ഷത്തിലും ട്വിറ്റര് ഹാക്ക് ചെയ്യപ്പെട്ടിരിക്കുകയാണ്.
200 ദശലക്ഷത്തിലധികം ഉപയോക്താക്കളുടെ വിശദാംശങ്ങള് ചോര്ന്നതായാണ് റിപ്പോര്ട്ടില് പറയുന്നത്. ഗൂഗിള് സിഇഒ സുന്ദര് പിച്ചൈ, ഡൊണാള്ഡ് ട്രംപ് ജൂനിയര്, സ്പേസ് എക്സ്, സിബിഎസ് മീഡിയ, എന്ബിഎ, ഡബ്ല്യുഎച്ച്ഒ തുടങ്ങിയ പ്രമുഖരുടെ സ്വകാര്യ വിവരങ്ങള് ഓണ്ലൈന് ഹാക്കിംഗ് ഫോറത്തില് പോസ്റ്റ് ചെയ്തതായി റിപ്പോര്ട്ടില് പറയുന്നു.
'സ്റ്റേ മാഡ്' എന്ന ഹാക്കര് വിവരങ്ങള് ചോര്ത്തിയെന്നാണ് റിപ്പോര്ട്ടുകള്. 2022 ഡിസംബറില് ഉണ്ടായതിന് സമാനമാണ് ഇപ്പോഴത്തെ ഹാക്കിങ്. ഡിസംബറില് റുഷി എന്ന് സ്വയം വിളിക്കുന്ന ഒരു ഹാക്കര് ഡാര്ക്ക് വെബിലെ 400 ദശലക്ഷം അക്കൗണ്ടുകളുടെ ഡാറ്റ ചോര്ത്തിയിരുന്നു. റിപ്പോര്ട്ടിനെക്കുറിച്ച് ട്വിറ്റര് പ്രതികരിച്ചിട്ടില്ല.
ഇസ്രായേലി സൈബര് രഹസ്യാന്വേഷണ സ്ഥാപനമായ ഹഡ്സണ് റോക്ക് ഇതിനെ എക്കാലത്തെയും ഏറ്റവും പ്രധാനപ്പെട്ട ചോര്ച്ച എന്ന് വിശേഷിപ്പിച്ചു. ഹൈ പ്രൊഫൈല് ഉപയോക്താക്കളുടെ ഇ-മെയിലുകളും ഫോണ് നമ്പറുകളും ഉള്പ്പെടെയുള്ള വിവരങ്ങള് ഡാറ്റാബേസില് അടങ്ങിയിരുന്നതായി ഹഡ്സണ് റോക്ക് കൂട്ടിച്ചേര്ത്തു. പോസ്റ്റിന്റെ നിരവധി സ്ക്രീന്ഷോട്ടുകള് ഹഡ്സണ് റോക്ക് ട്വിറ്ററില് പങ്കുവച്ചിട്ടുണ്ട്.