ഓസ്ട്രേലിയയിലെ ക്വീന്സ്ലാന്ഡ് എന്ന സംസ്ഥാനം അതിന്റെ മനോഹാരിത കൊണ്ട് മാത്രമല്ല പ്രസിദ്ധമായത്. വിവിധ തരത്തിലുള്ള പ്രകൃതിയുടെ അനുഗ്രഹമെന്നും മാജിക്കെന്നും വിശേഷിപ്പിക്കാവുന്ന ഒരുപാട് കാര്യങ്ങള് ഇവിടെ ഉണ്ട്.
വൈവിധ്യങ്ങളാര്ന്ന ജൈവസമ്പത്തിന്റെ പേരില് പേരുകേട്ട ഇവിടത്തെ ഏറ്റവും പ്രധാന വരുമാന മാര്ഗ്ഗം അതുകൊണ്ട് തന്നെ ടൂറിസമാണ്. പ്രതിവര്ഷം 8.8 ബില്യണ് ഡോളറാണ് ടൂറിസത്തിലൂടെ രാജ്യത്തിന് ലഭിക്കുന്നത്. വിവിധ രാജ്യങ്ങളില് നിന്ന് ഇങ്ങോട്ടേക്ക് സന്ദര്ശകര് എത്താറുണ്ട്. നേരത്തെ പറഞ്ഞ പ്രകൃതിയുടെ യഥാര്ത്ഥ മാജിക്ക് എന്ന് പറയുന്നത് ഇവിടുത്തെ കൗതുകങ്ങളില് ലോകപ്രശസ്തമായ ഒന്നായ കിരീടം ചൂടിയ ആമകളാണ്. ഈ ആമകളെ കാണാന് വേണ്ടി മാത്രം എത്തുന്നവര് നിരവധിയാണ്. മേരി റിവര് ടര്ട്ടില് അത്രയും പ്രസിദ്ധമായ ഒരു ആമയാണ്.
ക്വീന്സ്ലാന്ഡിന്റെ വടക്കു കിഴക്കന് പ്രദേശത്തായാണ് മേരി ടര്ട്ടില് ആമ കാണപ്പെടുന്നത്. എന്നാല് ഇവ ഇപ്പോള് വംശനാശ ഭീഷണി നേരിടുകയാണ്. തലയില് പച്ചനിറത്തിലുള്ള കിരീടം ചൂടിയ ഈ ആമ സഞ്ചാരികളില് കൗതുകമാണ്. ഓസ്ട്രേലിയയിലെ തന്നെ ഏറ്റവും വലിയ ആമയാണ് മേരി റിവര് ടര്ട്ടില്. വേറെയും നിരവധി പ്രത്യേകതകളാണ് ഈ ആമയ്ക്കുള്ളത്. തലയില് വളരുന്ന പച്ചനിറത്തിലുള്ള മുടിയാണ് ഇവയെ മറ്റു ആമകളില് നിന്ന് വ്യത്യസ്തമാക്കുന്നത്. അതുകൊണ്ടാണ് ഇവ പച്ച കിരീടമുള്ള ആമ എന്നറിയപ്പെടുന്നത്. ഒറ്റനോട്ടത്തില് കാണാന് തലയില് കിരീടം ചൂടിയത് പോലെത്തന്നെ ഉണ്ട്.