ഔദ്യോഗിക വാഹനത്തില് യാത്ര ചെയ്യുമ്ബോള് പൊലീസുകാര് സല്യൂട്ട് ചെയ്യുന്നില്ലെന്ന് പരാതി ഉന്നയിച്ച തൃശൂര് മേയര് എം.കെ. വര്ഗീസിന് സല്യൂട്ട് നല്കി പ്രതിപക്ഷ അംഗങ്ങളുടെ പരിഹാസം. ബുധനാഴ്ച ചേര്ന്ന കോര്പറേഷന് കൗണ്സില് ഹാളില് നടന്ന ചര്ച്ചക്കിടെയാണ് സംഭവം. മാസ്റ്റര് പ്ലാന് ചര്ച്ചയ്ക്കിടെ പ്രതിഷേധിച്ച് രംഗത്തെത്തിയ പ്രതിപക്ഷ അംഗങ്ങള് മേയറെ വളയുകയായിരുന്നു. ഇതിനിടെ മേയറെ പരിഹസിക്കാനായി ഇവര് സല്യൂട്ട് ചെയ്യുകയായിരുന്നു.
തുരുതുരെ സല്യൂട്ട് വന്നപ്പോള് മേയറും പതറിയില്ല. തിരിച്ചു മൂന്നുവട്ടം മേയറും സല്യൂട്ട് ചെയ്തു. ഒരു സല്യൂട്ട് നേരെയും ഒരു സല്യൂട്ട് ഹാളിന്റെ ഇടതു വശത്തേക്കും ഒരു സല്യൂട്ട് വലതു വശത്തേക്കും. അങ്ങനെ കൗണ്സില് ഹാളില് മുഴുവന് കുറച്ചു നേരത്തേക്ക് തലങ്ങും വിലങ്ങും സല്യൂട്ടുകള് പറന്നു.
കാറില് പോകുമ്ബോള് പൊലീസ് ഉദ്യോഗസ്ഥര് സല്യൂട്ട് ചെയ്യുന്നില്ലെന്നായിരുന്നു തൃശ്ശൂര് മേയര് എം.കെ. വര്ഗീസിന്റെ പരാതി. സല്യൂട്ട് തരാന് ഉത്തരവിറക്കണമെന്ന് ആവശ്യപ്പെട്ട് എം.കെ. വര്ഗീസ് ഡി.ജി.പിക്ക് പരാതി നല്കുകയും ചെയ്തിരുന്നു. പല തവണ പരാതി നല്കിയിട്ടും പൊലീസ് മുഖം തിരിക്കുകയാണെന്നായിരുന്നു മേയര് നല്കിയ പരാതിയില് പറഞ്ഞത്. എന്നാല് ഇതിനെതിരെ പൊലീസ് അസോസിയേഷന് രംഗത്തെത്തിയിരുന്നു. കേരളത്തിന്റെ തെരുവോരങ്ങളില് യൂണിഫോം ഇട്ട് കാണുന്ന പൊലീസ് ഉദ്യോഗസ്ഥര് ആരെയെങ്കിലും സല്യൂട്ട് ചെയ്യാന് വേണ്ടി നില്ക്കുന്നവരല്ല. അവര് ട്രാഫിക്ക് നിയന്ത്രണം ഉള്പ്പെടെയുള്ള ഔദ്യോഗിക കൃത്യനിര്വഹണത്തിന്റെ ഭാഗമായി നില്ക്കുന്നവരാണെന്നാണ് പൊലീസ് അസോസിയേഷന് ജനറല് സെക്രട്ടറി സി.ആര്. ബിജു മറുപടിയായി പറഞ്ഞത്. സല്യൂട്ട് നിയമാനുസരണം അര്ഹതപ്പെട്ടവര്ക്ക് മാത്രമേ നല്കാന് കഴിയൂ. അല്ലാതെ ആഗ്രഹിക്കുന്ന എല്ലാവര്ക്കും നല്കേണ്ട ഒന്നല്ലെന്നും പൊലീസ് അസോസിയേഷന് കൂട്ടിച്ചേര്ത്തു.