യുകെയില്‍ ജോലിക്കെത്തി, ഓഫര്‍ ചെയ്ത ജോലിയോ ശമ്പളമോ ലഭിക്കാതെ ഭക്ഷണം പോലും കഴിക്കാന്‍ പണമില്ലാതെ നരകിക്കുന്ന 400 ഓളം മലയാളി യുവാക്കളുടെ ദുരിത വാര്‍ത്തയില്‍ സ്വമേധയാ ഇടപെടല്‍ തുടങ്ങിതായി ഏജന്‍സിക്കെതിരെ അന്വേഷണത്തിന് കത്ത് നല്‍കിയതായും നോര്‍ക്ക റൂട്ട്‌സ് റസിഡന്റ് വൈസ് ചെയര്‍മാന്‍ പി. ശ്രീരാമകൃഷ്ണന്‍. പ്രശ്‌നത്തില്‍ ഇടപെടണമെന്ന് ചൂണ്ടിക്കാട്ടി കേന്ദ്ര വിദേശകാര്യ മന്ത്രാലയത്തിനും, യു.കെ യിലെ ഇന്ത്യന്‍ ഹൈക്കമ്മീഷനും നോര്‍ക്ക കത്ത് നല്‍കിയിട്ടുണ്ട്. ഒപ്പം ആരോപണം നേരിടുന്ന സ്വകാര്യ റിക്രൂട്ടിങ് ഏജന്‍സിക്കെതിരെ അന്വേഷണം നടത്താനും ആരോപണം ശരിയെന്ന് കണ്ടെത്തിയാല്‍ കര്‍ശന നടപടി സ്വീകരിക്കണമെന്ന് നിര്‍ദ്ദേശിച്ച് ഡിജിപിക്കും കത്തു നല്‍കിയതായും വിഷയം മുഖ്യമന്ത്രിയെ ധരിപ്പിച്ചിട്ടുണ്ടെന്നും പി. ശ്രീരാമകൃഷ്ണന്‍ വ്യക്തമാക്കി.
അതേ സമയം കേരളത്തിലെ റിക്രൂട്ടിങ് ഏജന്‍സികളുടെ തട്ടിപ്പിന് ഇരയായി ഉദ്യോഗാര്‍ഥികള്‍ യുകെയില്‍ ദുരിതം അനുഭവിക്കുന്നെന്ന പരാതിയില്‍ നടപടിയുമായി യുകെയിലെ ഇന്ത്യന്‍ ഹൈക്കമ്മീഷന്‍ രംഗത്തെത്തി. ഇതു സംബന്ധിച്ച് പരാതി നല്‍കിയ പ്രവാസി ലീഗല്‍ സെല്‍ യുകെ ചാപ്റ്റര്‍ അംഗങ്ങളുമായി ഹൈക്കമ്മീഷന്‍ കത്തിടപാടുകള്‍ ആരംഭിച്ചിട്ടുണ്ട്. കോഓര്‍ഡിനേഷന്‍ മിനിസ്റ്റര്‍ ദീപക് ചൗധരിയുമായി കൂടിക്കാഴ്ചയ്ക്ക് സമയം അനുവദിച്ച് ഇമെയില്‍ അയച്ചിട്ടുണ്ട്. 19ന് ഉച്ചയ്ക്കു മൂന്നു മണിക്ക് നേരില്‍ കണ്ട് വിഷയം ബോധിപ്പിക്കുന്നതിനാണ് ആവശ്യപ്പെട്ടിരിക്കുന്നത്.
യുകെയില്‍ തൊഴില്‍ തട്ടിപ്പിന് ഇരയായവരുടെ അനുഭവങ്ങള്‍ സൂചിപ്പിച്ചുകൊണ്ടുള്ള വിശദമായ പരാതി യുകെയിലെ സര്‍ക്കാര്‍ പ്രതിനിധികള്‍ക്ക് മലയാളി സംഘടനയായ കൈരളി യുകെ നല്‍കിയതായി നാഷണല്‍ സെക്രട്ടറി കുര്യന്‍ ജേക്കബ്, പ്രസിഡന്റ് പ്രിയ രാജന്‍ എന്നിവര്‍ പറഞ്ഞു. മലയാളി സമൂഹത്തിനിടയില്‍ റിക്രൂട്ട്‌മെന്റ് തട്ടിപ്പിനെ പറ്റിയുള്ള വ്യക്തമായ ബോധവല്‍ക്കരണമാണ് ഇനി വേണ്ടതെന്നും മറ്റൊരു രാജ്യത്തില്‍ അജ്ഞാതമായ തൊഴിലിടങ്ങളില്‍ ചതിക്കപ്പെട്ടു നരകിച്ചു കഴിയേണ്ടവരല്ല പുതുതലമുറയെന്നും കൈരളി യുകെ ഭാരവാഹികള്‍ പറഞ്ഞു.
കെയറര്‍ വിസയ്ക്കായി 14 ലക്ഷത്തോളം രൂപ നല്‍കി, വഞ്ചിതനായ മലയാളി മെയില്‍ നഴ്സിന്റെ പരാതിയില്‍ ഇപ്പോള്‍ കേരള പോലീസ് അന്വേഷണം ഊര്‍ജിതമാക്കിയിരിക്കുകയാണ്. ജോലിയും വാഗ്ദാനം ചെയ്ത വേതനവും ലഭിക്കാതെ ഭക്ഷണം പോലും കഴിക്കാന്‍ പണമില്ലാതെ ഇംഗ്ലണ്ടിലെ ഡെവണ്‍ കൗണ്ടിയില്‍ കുടുങ്ങിക്കിടക്കുന്ന ജോഷിയെന്ന മലയാളി നഴ്സിന്റെ പരാതിയിലാണ് പോലീസ് നടപടി.
കൊച്ചിയിലെ പാലാരിവട്ടത്തുള്ള അഫിനിക്സ് ഏജന്‍സി മുഖാന്തരമാണ് കെയര്‍ ഹോമിലെ ഹെല്‍ത്ത് കെയറര്‍മാരുടെ ജോലി നല്‍കാമെന്ന വാഗ്ദാനത്തില്‍ വിശ്വസിച്ച് 14 ലക്ഷം രൂപ നല്‍കി മൂന്നരമാസം മുമ്പ് ജോഷി യുകെയിലെത്തിയത്. ഓട്ടിസം ബാധിതരായ കുട്ടികളെ പരിരക്ഷിക്കുന്ന കെയര്‍ ഹോമില്‍ ജോലി നല്‍കാമെന്നായിരുന്നു വാഗ്ദാനം. എന്നാല്‍ ഇവിടെയെത്തിയപ്പോള്‍ പറഞ്ഞിരുന്ന ജോലി ലഭിച്ചില്ലെന്ന് മാത്രമല്ല, 450 പൗണ്ട് മാത്രമാണ് പ്രതിമാസ ശമ്പളം നല്‍കിയത്. വാടക കൊടുക്കാന്‍ പോലും അത് തികയാത്തതിനാല്‍, ഭക്ഷണത്തിനായി ആപ്പിള്‍ തോട്ടം അടക്കമുള്ള സ്ഥലങ്ങളില്‍ ജോലിചെയ്യുന്നു.
ഏകദേശം 400 ഓളം യുവാക്കളെ ഈ രീതിയില്‍ യുകെയില്‍ കൊണ്ടുവന്ന് ഏജന്‍സി വഞ്ചിച്ചിട്ടുണ്ടെന്ന് യുവാവ് പറയുന്നു. ഭക്ഷണം പോലുമില്ലാതെ മരിച്ചുപോകും എന്ന് കാണിച്ച് യുവാവ് അയച്ച ഇമെയിലിന്റെ അടിസ്ഥാനത്തിലാണ് ഇപ്പോള്‍ പോലീസ് അന്വേഷണം വിപുലമാക്കിയിട്ടുള്ളത്.
പാലാരിവട്ടത്തെ അഫിനിക്സ് ഏജന്‍സിയുടെ തൃശ്ശൂര്‍ സ്വദേശിയായ ഉടമ പോലീസ് അന്വേഷണം ആരംഭിച്ചതോടെ വിദേശത്തേക്ക് മുങ്ങിയെന്ന് പറയുന്നു. ഇവര്‍ക്കുപുറമെ യുകെയിലെ മറ്റ് രണ്ട് ഏജന്‍സികള്‍ക്കും പണം നല്‍കിയതായി യുവാവ് പരാതിപ്പെടുന്നു.
More Latest News
ഗ്രേറ്റ് ബ്രിട്ടന്‍ രൂപത ബൈബിള്‍ കലോത്സവം നവംബര്‍ 16ന് സ്‌കന്തോര്‍പ്പില്‍; നിയമാവലി പ്രകാശനം ചെയ്ത് മാര്‍ ജോസഫ് സ്രാമ്പിക്കല്‍
സൗത്ത് ഇന്ത്യന്‍ മലയാളി അസോസിയേഷന്‍ സൈമാ പ്രെസ്റ്റണിന്റെ ആഭിമുഖ്യത്തില്‍ സ്നേഹ സംഗീത രാവ്, ഈമാസം 31ന് വൈകിട്ട് ആറു മണിക്ക് പ്രെസ്റ്റണ്‍ ക്രൈസ്റ്റ് ചര്‍ച്ചില്‍
ഇറാന്‍ പ്രസിഡന്റ് ഇബ്രാഹിം റെയ്‌സിയുടെ മരണം സ്ഥിരീകരിച്ചു, ഇബ്രാഹിം റെയ്‌സി സഞ്ചരിച്ച ഹെലികോപ്റ്ററിന്റെ അവശിഷ്ടങ്ങള്‍ കണ്ടെത്തി
'ഹാപ്പി ബര്‍ത്ത് ഡേ സുധി ചേട്ടാ, നിങ്ങളെ ഞാന്‍ ആഴത്തില്‍ മിസ്സ് ചെയ്യുകയാണ്' കൊല്ലം സുധിക്ക് പിറന്നാള്‍ ആശംസകള്‍ നേര്‍ന്ന് ഭാര്യ രേണു
പാല്‍ ചായ അധിക നേരം തിളപ്പിക്കുന്ന പതിവുണ്ടോ? ഇനി അത് നിറുത്തുന്നതാണ് നല്ലതെന്ന് ആരോഗ്യവിദഗ്ധര്‍
Most Read
British Pathram Recommends
