ലീഡ്സിലെ സെന്റ് ജെയിംസ് ആശുപത്രിയില് ബോംബ് ആക്രമണം നടത്താനെത്തിയ 27-കാരനെ പോലീസ് അറസ്റ്റ് ചെയ്തു. വെള്ളിയാഴ്ച രാവിലെ അഞ്ചുമണിയോടെ ആശുപത്രിയുടെ മെറ്റേണിറ്റി വിംഗിന് സമീപത്തുനിന്നാണ് ഇയാളെ കണ്ടെത്തിയത്. ബോംബ് സ്ക്വാഡിലെ അംഗത്തിന്റെ സമയോചിതമായ ഇടപെടല് മൂലമാണ് വന് ദുരന്തം ഒഴിവായത്. ആശുപത്രിയില് തീവ്രവാദ പ്രവര്ത്തനങ്ങള് നടക്കാന് സാധ്യതയുണ്ടെന്നും സംശയാസ്പദമായ സാഹചര്യത്തില് ഒരാളെ പിടികൂടിയിട്ടുണ്ടെന്നുമാണ് സംഭവത്തില് വെസ്റ്റ് യോര്ക്ക്ഷയര് പോലീസ് പറയുന്നത്. ഇന്നലെ രാവിലെയാണ് ആശുപത്രിയിലുള്ളവരെയും നാട്ടുകാരെയും ഒന്നടങ്കം നടുക്കിയ സംഭവം. ഭീകരാക്രമണത്തിന്റെ കുറ്റങ്ങള് ചുമത്തിയാണ് ഇയാളെ പോലിസ് അറസ്റ്റ് ചെയ്തത്.
27 കാരനെ പിടികൂടിയതിന് പിന്നാലെ ആശുപത്രിയിലെ ഭൂരിഭാഗം പേരെയും ഒഴിപ്പിച്ച് പരിശോധന നടത്തി. ഇയാളെ 2000ത്തിലെ ടെററിസം ആക്ട് പ്രകാരം സെക്ഷന് 41 ചുമത്തി വീണ്ടും അറസ്റ്റ് ചെയ്തു. ഇന്നലെ രാവിലെയാണ് ബ്രിട്ടീഷ് പോലിസ് യുവാവിനെ അറസ്റ്റ് ചെയ്ത വിവരം പുറത്ത് വിട്ടത്. സായുധനായ അക്രമി അടുത്ത് കൂടെ നടന്നുപോയ ആളോട് സംശയാസ്പദമായി പെരുമാറിയതാണ് അക്രമം തടഞ്ഞതെന്നാണ് റിപ്പോര്ട്ട്. ഇയാള് പോലീസില് വിവരം അറിയിക്കുകയും, അക്രമണം തകര്ക്കുകയുമായിരുന്നു.
പ്രതിയെ കുറിച്ച് പോലീസിന് മുന് അറിവുകളില്ല. ഇയാളെ ചോദ്യം ചെയ്തുവരുകയാണ്. 'രാവിലെ അറസ്റ്റിലായ 27-കാരന് പോലീസ് കസ്റ്റഡിയില് തുടരുകയാണ്. വൈകുന്നേരം ടെററിസം ആക്ട് 2000-ലെ സെക്ഷന് 41 പ്രകാരം വീണ്ടും അറസ്റ്റ് രേഖപ്പെടുത്തി. തീവ്രവാദ പ്രവര്ത്തനത്തിന് തയ്യാറെടുപ്പ് നടത്തുകയും, നടപ്പാക്കാന് ശ്രമിക്കുകയും ചെയ്തെന്ന സംശയത്തിലാണ് ഇത്', കൗണ്ടര് ടെററിസം പോലീസിംഗ് നോര്ത്ത് ഈസ്റ്റ് വ്യക്തമാക്കി.
വിദഗ്ധരുടെ സഹായം ഉള്പ്പടെ സ്വീകരിച്ചാണ് നിലവില് അന്വേഷണം മുന്പോട്ട് പോകുന്നത്. ഉച്ചമുതല് തന്നെ അഗ്നിശമന സേനാംഗങ്ങളും, ബോംബ് നിര്വീര്യമാക്കുന്ന യൂണിറ്റും സംഭവസ്ഥലത്ത് നിലയുറപ്പിച്ചിട്ടുണ്ട്. 2021-ല് ലിവര്പൂള് വുമണ്സ് ഹോസ്പിറ്റലിന് പുറത്തുവെച്ച് വെച്ച് നടന്ന ബോംബ് സ്ഫോടനത്തിനെ അനുസ്മരിപ്പിക്കുന്ന സംഭവമാണ് ഇപ്പോള് നടന്നിരിക്കുന്നത്.