സമൂസ ഇഷ്ടപ്പെടാത്തവരായി ആരുമില്ല. ചായയും സമൂസയും ഒരു നല്ല കോംപിനേഷനായി കാണുന്നവരാണ് ഭൂരിപക്ഷം മനുഷ്യരും. എന്നാലിതാ സമൂസ കഴിച്ചാല് പണി കിട്ടുന്ന രാജ്യമായി മാറിയിരിക്കുകയാണ് ആഫ്രിക്കന് രാജ്യമായ സൊമാലിയ. ഇവിടെ സമൂസ നിരോധിച്ചിരിക്കുകയാണ്.
ഇന്ത്യയ്ക്ക് പുറമെ, ബംഗ്ലാദേശ്, പാകിസ്ഥാന്, നേപ്പാള് എന്നിവിടങ്ങളില് ഇത് ഒരു ജനപ്രിയ ലഘുഭക്ഷണമാണ്. ചില പാശ്ചാത്യ രാജ്യങ്ങളിലും സമൂസ ഇന്ന് ലഭ്യമാണ്. വെജ്, നോണ്-വെജ് രുചികളിലും ഇത് ലഭ്യമാണ് എന്ന വസ്തുത ഈ വിഭവത്തെ പ്രിയപ്പെട്ടതാക്കുന്നു.
എന്നിരുന്നാലും, ആഫ്രിക്കന് രാജ്യമായ സൊമാലിയയില് സമൂസ നിരോധിച്ചിരിക്കുകയാണ്. രാജ്യത്തെ ഏതെങ്കിലും പൗരന്മാര് ഈ വിഭവം തയ്യാറാക്കുകയോ കഴിക്കുകയോ ചെയ്താല് കടുത്ത ശിക്ഷ ലഭിക്കും. സൊമാലിയയിലെ അല് ഷബാബ് തീവ്രവാദ സംഘടനയാണ് സമൂസ നിരോധിച്ചത്. സൊമാലിയയില് നടന്നുകൊണ്ടിരിക്കുന്ന ആഭ്യന്തരയുദ്ധത്തിന് നേതൃത്വം നല്കുന്നത് ഈ സംഘടനയാണ്. 2011 മുതല് സൊമാലിയയില് സമൂസയ്ക്ക് നിരോധനമുണ്ട്.
സമൂസ നിരോധിച്ചതിന് സംഘടന ഇതുവരെ ഔദ്യോഗിക വിശദീകരണമൊന്നും നല്കിയിട്ടില്ലെങ്കിലും അതിന്റെ ത്രികോണാകൃതിയാണ് കാരണമായി ചൂണ്ടിക്കാണിക്കുന്നത്. ക്രിസ്തീയ വിശ്വാസമനുസരിച്ച് ''പരിശുദ്ധ ത്രീത്വം''(പിതാവ്, പുത്രന്, പരിശുദ്ധാത്മാവ്) എന്ന ആശയവുമായി ഇതിന് സാമ്യമുണ്ടെന്നാണ് അവരുടെ വാദം. സമൂസ പൂര്ണ്ണമായും 'പാശ്ചാത്യ' മാണെന്ന് അവര് വാദിക്കുന്നു.