NAMMUDE NAADU
മണിക്കൂറുകള് നീണ്ട തിരച്ചില്, ഇന്നലെ പീച്ചി ഡാമില് കാണാതായ വിദ്യാര്ഥിയുടെ മൃതദേഹം കണ്ടെത്തി, ഇന്ന് രാവിലെ തിരച്ചില് പുനരാരംഭിച്ചപ്പോഴാണ് മൃതദേഹം കണ്ടെത്തിയത്
3>ഇന്നലെ മൂന്ന് സുഹൃത്തുക്കള്ക്കൊപ്പം പീച്ചി ഡാമില് ഇറങ്ങിയ വിദ്യാര്ത്ഥിയുടെ മൃതദേഹം കണ്ടെത്തി. മണിക്കൂറുകള് നീണ്ട തിരച്ചിലിന് ഒടുവില് ആണ് വിദ്യാര്ത്ഥിയുടെ മൃതദേഹം കണ്ടെത്തുന്നത്.
മലപ്പുറം താനൂര് സ്വദേശി യഹിയ(25) ആണ് മരിച്ചത്. എറണാകുളം മഹാരാജാസ് കോളജ് എസ്എഫ്ഐ യൂണിറ്റ് സെക്രട്ടറിയായ യഹിയയെ ഇന്നലെ വൈകീട്ടോടെയാണ് കാണാതായത്. മഹാരാജാസ് കോളജിലെ എംഎസ്സി ബോട്ടണി വിദ്യാര്ഥിയാണ്.
മൂന്ന് സുഹൃത്തുക്കള്ക്കൊപ്പം ഇന്നലെ ഡാമില് ഇറങ്ങിയപ്പോഴാണ് യഹിയ അപകടത്തില്പ്പെട്ടത്. പീച്ചി വന ഗവേഷണ കേന്ദ്രത്തില് ഇന്റേണ്ഷിപ്പിന് എത്തിയതായിരുന്നു യഹിയ. അപകടം നടന്ന് ഉടന് തന്നെ സുഹൃത്തുക്കള് പൊലീസിനെയും അഗ്നിരക്ഷാസേനയെയും വിവരം അറിയിക്കുകയായിരുന്നു. ഇന്നലെ രാത്രി ഡാമില് തിരച്ചില് നടത്തിയെങ്കിലും കണ്ടെത്താന് സാധിച്ചില്ല. രാത്രി ഏറെ വൈകി രക്ഷാപ്രവര്ത്തനം ദുഷ്കരമായതോടെ ഇന്നലെ രാത്രി നിര്ത്തിയ തിരച്ചില് ഇന്ന് രാവിലെ പുനരാരംഭിച്ചപ്പോഴാണ് മൃതദേഹം കണ്ടെത്തിയത്. റവന്യൂ മന്ത്രി കെ രാജന് സ്ഥലത്തെത്തി തിരച്ചിലിന് നേതൃത്വം നല്കി. അഗ്നിരക്ഷാസേനയുടെ സ്കൂബ ഡൈവിങ് ടീമാണ് മൃതദേഹം കണ്ടെത്തിയത്.
മൃതദേഹം തൃശൂര് ജില്ലാ ആശുപത്രിയിലേക്ക് മാറ്റി. പോസ്റ്റ്മോര്ട്ടത്തിന് ശേഷം മൃതദേഹം ബന്ധുക്കള്ക്ക് വിട്ടുകൊടുക്കും. പീച്ചി ഡാമിന്റെ വൃഷ്ടിപ്രദേശത്താണ് വെള്ളത്തില് ഇറങ്ങിയത്.
വിമാന യാത്രക്കാരെ വലച്ച സമരം: 30 കാബിന് ക്രൂ അംഗങ്ങളെ എയര് ഇന്ത്യ എക്സ്പ്രസ് പിരിച്ചുവിട്ടു, മുന്കൂട്ടി അറിയിക്കാതെ ജോലിയില് നിന്ന് വിട്ടുനിന്നത് അംഗീകരിക്കാന് കഴിയാത്തതാണെന്ന് എയര് ഇന്ത്യ
3>വിമാന യാത്രക്കാരെ വലച്ചുകൊണ്ട് എയര് ഇന്ത്യ ക്യാമ്പിന് ക്രൂ നടത്തിയ സമരത്തില് തീരുമാനവുമായി എയര് ഇന്ത്യ എക്സ്പ്രസ്. 30 കാബിന് ക്രൂ അംഗങ്ങളെ എയര് ഇന്ത്യ എക്സ്പ്രസ് പിരിച്ചുവിട്ടതായാണ് റിപ്പോര്ട്ടുകളില് പറയുന്നത്. മുന്കൂട്ടി അറിയിക്കാത്ത ജോലിയില് നിന്ന് വിട്ടുനിന്നത് അംഗീകരിക്കാന് കഴിയാത്തതാണ് എന്ന് ചൂണ്ടിക്കാട്ടിയാണ് ജീവനക്കാരെ പിരിച്ചുവിട്ടത്.
ഇന്നലെ രാവിലെയായിരുന്നു ക്യാമ്പിന് ക്രൂ അംഗങ്ങളുടെ ഈ പ്രവര്ത്തി. ശേഷം ഇന്നലെ രാത്രി തന്നെ 30 ജീവനക്കാരെ പിരിച്ചുവിട്ട് കൊണ്ടുള്ള നോട്ടീസ് ഇ-മെയില് മുഖേന അയച്ചതായി കമ്പനി വൃത്തങ്ങള് അറിയിച്ചു.
ചൊവ്വാഴ്ച രാത്രി മുതലാണ് മുന്കൂട്ടി അറിയിക്കാതെ ജീവനക്കാര് ജോലിയില് നിന്ന് വിട്ടുനിന്നത്. മുന്കൂട്ടി നോട്ടീസ് നല്കാതെ മെഡിക്കല് ലീവ് എടുത്താണ് ജീവനക്കാര് പ്രതിഷേധിച്ചത്. ടാറ്റ ഗ്രൂപ്പിന്റെ കീഴിലുള്ള എയര് ഇന്ത്യ എക്സ്പ്രസിലെ പരിഷ്കരണ നടപടികളുമായി ബന്ധപ്പെട്ടായിരുന്നു പ്രതിഷേധം. ഇതുമൂലം നൂറ് വിമാനസര്വീസുകള് റദ്ദാക്കേണ്ടി വന്നതായും 15000ലധികം യാത്രക്കാരെ ബാധിച്ചതായുമാണ് റിപ്പോര്ട്ട്.
ന്യായമായ കാരണങ്ങളില്ലാതെയും മുന്കൂട്ടി അറിയിക്കാതെയുമാണ് ജീവനക്കാര് ജോലിയില് നിന്ന് വിട്ടുനിന്നത്. ഇത് അംഗീകരിക്കാന് കഴിയില്ല എന്ന് നോട്ടീസില് എയര്ഇന്ത്യ എക്സ്പ്രസ് പറയുന്നു. കൂട്ട അസുഖ അവധി നിയമങ്ങളുടെ ലംഘനമാണെന്ന് മാത്രമല്ല. എയര് ഇന്ത്യ എക്സ്പ്രസ് ലിമിറ്റഡ് എംപ്ലോയീസ് സര്വീസ് റൂള്സിന്റെ ലംഘനമാണെന്നും നോട്ടീസില് പറയുന്നു.
ജീവനക്കാര് സുഖമില്ലെന്ന് വിമാനം ഷെഡ്യൂള് ചെയ്ത ശേഷമാണ് അറിയിച്ചത്. പിന്നീട് മറ്റ് കാബിന് ക്രൂ അംഗങ്ങളും റിപ്പോര്ട്ട് ചെയ്തിട്ടില്ലെന്ന് മനസിലായി. ഇത് വ്യക്തമായും മുന്കൂട്ടി പ്ലാന് ചെയ്ത് ന്യായമായ കാരണങ്ങളില്ലാതെ ജോലിയില് നിന്നുള്ള വിട്ടുനില്ക്കല് ആണെന്നും നോട്ടീസില് പറയുന്നു.
എയര് ഇന്ത്യ എക്സ്പ്രസ് വിമാനങ്ങള് റദ് ചെയ്ത സംഭവം: ജീവനക്കാരുടെ സമരം നിയമവിരുദ്ധമാണെന്ന് വിശദീകരണവുമായി എയര് ഇന്ത്യ എക്സ്പ്രസ്
3>ജീവനക്കാര് മിന്നല് പണിമുടക്ക് നടത്തിയതിനെ തുടര്ന്ന് എയര് ഇന്ത്യ എക്സ്പ്രസിന്റെ വിമാനങ്ങള് റദ് ചെയ്ത സംഭവത്തില് വിശദീകരണവുമായി എയര് ഇന്ത്യ. ജീവനക്കാരുടെ സമരം നിയമവിരുദ്ധമാണെന്നും മാറ്റം അംഗീകരിക്കാനാവാത്ത ഒരു വിഭാഗമാണ് സമരത്തിന് എന്നും എയര് ഇന്ത്യ വ്യക്തമാക്കി.
സീനിയര് ക്യാബിന് ക്രൂ അംഗങ്ങളാണ് നിയമവിരുദ്ധ സമരത്തില് ഏര്പ്പെടുന്നത്. എയര് ഇന്ത്യ ഫ്ലൈറ്റ് റദ്ദാക്കല് വിഷയം പരിശോധിക്കുന്നതായി വ്യോമയാന മന്ത്രാലയം വൃത്തങ്ങളും വ്യക്തമാക്കി. ജീവനക്കാരുടെ മിന്നല് പണിമുടക്കിനേക്കുറിച്ച് രണ്ട് മണിക്കൂര് മുന്പ് മാത്രമാണ് വിവരം ലഭിച്ചതെന്ന് എയര് ഇന്ത്യ. കേരളത്തിലെ വിവിധ വിമാനത്താവളങ്ങളില് നിന്നായി ഇന്ന് നടത്താനിരുന്ന 12 സര്വ്വീസുകളാണ് മുടങ്ങിയത്. വിമാനങ്ങള് റദ്ദാക്കിയ വാര്ത്ത നേരത്തെ യാത്രക്കാരെ അറിയിക്കാതിരുന്നതിനാല് സാധാരണ രീതിയില് യാത്ര പുറപ്പെടാനായി വിമാനത്താവളത്തിലെത്തിയ ആളുകള് രൂക്ഷമായി പ്രതിഷേധിച്ചതോടെ വിമാനത്താവളത്തില് സംഘര്ഷ സമാന സാഹചര്യമാണ് കാണാന് കഴിഞ്ഞത്. കൊച്ചി നെടുമ്പാശേരിയില് നിന്നുള്ള നാലും കണ്ണൂരില് നിന്നുള്ള മൂന്നും തിരുവനന്തപുരത്ത് നിന്നുള്ള നാല് സര്വ്വീസുകളുമാണ് റദ് ചെയ്തത്.
കൊച്ചിയില് നിന്ന് ടേക്ക് ഓഫ് ചെയ്യണ്ട അബുദാബി, ഷാര്ജ, മസ്കറ്റ്, ദമാം വിമാനങ്ങളും കണ്ണൂരില് നിന്നുള്ള അബുദാബി, മസ്കറ്റ്, ഷാര്ജ വിമാനങ്ങളും കൊച്ചി വിമാനത്താവളത്തില് ഇന്ന് എത്തേണ്ടിയിരുന്ന നാല് വിമാനങ്ങളും തിരുവനന്തപുരത്ത് എത്തേണ്ട ഒരു വിമാനവും റദ് ചെയ്തിട്ടുണ്ട്. ആഭ്യന്തര സര്വ്വീസുകളേയും പണിമുടക്ക് ബാധിച്ചിരിക്കുകയാണ്.
യാതൊരു മുന്നറിയിപ്പും ഇല്ലാതെ വിമാനം റദ്ദാക്കിയതിന്റെ പ്രതിഷേധം എയര് ഇന്ത്യയുടെ സോഷ്യല് മീഡിയ യാത്രക്കാര് രേഖപ്പെടുത്തുന്നുണ്ട്. കണ്ണൂര് വിമാനത്താവളത്തില് യാത്രക്കാരുടെ പ്രതിഷേധം നടന്നു, നൂറുകണക്കിന് യാത്രക്കാരാണ് സമരം കാരണം കുടുങ്ങി. അതേസമയം യാത്ര പുനക്രമീകരിക്കുന്നതിനും ടിക്കറ്റ് തുക തിരികെ ലഭിക്കാന് അവസരമുണ്ടാകുമെന്നാണ് എയര് ഇന്ത്യയുടെ വിശദീകരണം.
മാതൃഭൂമി ന്യൂസ് പാലക്കാട് ബ്യൂറോയിലെ ക്യാമറാമാന് എ.വി മുകേഷ് കാട്ടാന ആക്രമണത്തില് മരിച്ചു, കാട്ടാനക്കൂട്ടത്തിന്റെ ദൃശ്യങ്ങള് ക്യാമറയില് പകര്ത്തുന്നതിനിടെയാണ് അപകടം
3>മാതൃഭൂമി ക്യാമറാമാന് എ.വി മുകേഷ് (34) കാട്ടാന ആക്രമണത്തില് മരിച്ചു. മാതൃഭൂമിയുടെ ന്യൂസ് പാലക്കാട് ബ്യൂറോയിലെ ക്യാമറാമാനാണ് മുകേഷ്. മലപ്പുറം പരപ്പനങ്ങാടി സ്വദേശിയായ മുകേഷിനെ കാട്ടാനാക്രമണത്തില് ഗുരുതരമായി പരിക്കേറ്റിരുന്നു. ഉടന് തന്നെ അദ്ദേഹത്തെ ആശുപത്രിയില് എത്തിച്ചെങ്കിലും ജീവന് രക്ഷിക്കാന് സാധിച്ചില്ല.
ദീര്ഘകാലം ഡല്ഹിയില് ജോലി ചെയ്തിരുന്നു. മലമ്പുഴ കൊട്ടേക്കാട് ഇന്ന് പുലര്ച്ചെയാണ് സംഭവം. കാട്ടാനക്കൂട്ടത്തിന്റെ ദൃശ്യങ്ങള് ക്യാമറയില് പകര്ത്തുന്നതിനിടെയാണ് സംഭവം നടന്നത്. കാട്ടാനക്കൂട്ടം പുഴ മുറിച്ചുകടക്കുന്നതിന്റെ ദൃശ്യം പകര്ത്തുന്നതിനിടെ പ്രകോപിതനായ കാട്ടാന മുകേഷിനെ ആക്രമിക്കുകയായിരുന്നു.
ഗുരുതരമായി പരിക്കേറ്റ മുകേഷിനെ ഉടന് തന്നെ ജില്ലാ ആശുപത്രിയില് എത്തിച്ചെങ്കിലും ജീവന് രക്ഷിക്കാന് സാധിച്ചില്ല. റിപ്പോര്ട്ട് ചെയ്യാന് പോയ സംഘത്തില് ഉണ്ടായിരുന്ന റിപ്പോര്ട്ടറും ഡ്രൈവറും ഓടി രക്ഷപ്പെടുകയായിരുന്നു.
ഹോസ്റ്റലിലെ ശുചിമുറിയില് യുവതിയുടെ പ്രസവം: ആശുപത്രിയില് പ്രവേശിപ്പിച്ച കുഞ്ഞിനെയും അമ്മയെയും ഏറ്റെടുക്കാന് തയ്യാറായി കുഞ്ഞിന്റെ പിതാവ്
3>കൊച്ചി നഗരത്തില് ഹോസ്റ്റല് മുറിയിലെ സഹവാസികള് പോലും അറിയാതെ യുവതി ശുചിമുറിയില് പ്രസവിച്ച സംഭവത്തില് യുവതിയെ വിവാഹം കഴിക്കാന് തയ്യാറായി യുവാവ്. കുഞ്ഞിന്റെ പിതാവായ കൊല്ലം സ്വദേശിയാണ് കുഞ്ഞിനെയും യുവതിയെയും ഏറ്റെടുക്കാനും യുവതിയെ വിവാഹം കഴിക്കാനും തയ്യാറായത്.
പൊലീസ് ഇന്നലെ യുവതിയുടെയും യുവാവിന്റെയും വിശദമായ മൊഴിയെടുത്തിരുന്നു. ഇരുവരും തമ്മിലുള്ള അടുപ്പം വീട്ടുകാര് അറിഞ്ഞിരുന്നില്ല. എന്നാല് യുവതിയുടെ പ്രസവത്തെ തുടര്ന്ന് പൊലീസ് രണ്ടുവീട്ടുകാരെയും സ്റ്റേഷനിലേക്ക് വിളിപ്പിച്ചു സംസാരിച്ചു. വിവാഹത്തെ വീട്ടുകാരും എതിര്ത്തില്ല. ആശുപത്രിയിലുള്ള യുവതിയെ വിട്ടയച്ചാലുടന് വിവാഹം നടത്താനുള്ള സന്നദ്ധത വീട്ടുകാര് പൊലീസിനെ അറിയിക്കുകയായിരുന്നു.
കഴിഞ്ഞ ഞായറാഴ്ച രാവിലെ ഓള്ഡ് മാര്ക്കറ്റ് റോഡിന് സമീപത്തുള്ള വനിതാ ഹോസ്റ്റലിലാണു 23 വയസ്സുകാരി പ്രസവിച്ചത്. ആറു പേരുള്ള മുറിയിലാണു പെണ്കുട്ടി കഴിഞ്ഞിരുന്നത്. യുവതി ഗര്ഭിണി ആണെന്നോ ഒന്നും കൂടെ ഉള്ളവര് അറിഞ്ഞിരുന്നില്ല.
മുന്പു പലപ്പോഴും ശാരീരികാസ്വസ്ഥതകള് പ്രകടിപ്പിക്കുന്നതു കണ്ട് ഒപ്പമുണ്ടായിരുന്നവര് കാര്യം തിരക്കിയിരുന്നെങ്കിലും ചില ആരോഗ്യപ്രശ്നങ്ങളുണ്ടെന്ന് പറഞ്ഞു യുവതി ഒഴിഞ്ഞുമാറിയിരുന്നു. ഞായര് രാവിലെ ശുചിമുറിയില് കയറിയ യുവതി ഏറെ നേരം കഴിഞ്ഞും പുറത്തിറങ്ങങ്ങാതായതോടെ സുഹൃത്തുക്കള് വിളിച്ചെങ്കിലും വാതില് തുറന്നില്ല. ഒടുവില്, ഒപ്പമുണ്ടായിരുന്നവര് വാതില് ബലംപ്രയോഗിച്ചു തുറന്ന് അകത്തു കയറിയപ്പോള് കയ്യില് നവജാതശിശുവിനെയും പിടിച്ചു നില്ക്കുന്ന നിലയില് യുവതിയെ കണ്ടെത്തുകയായിരുന്നു. തുടര്ന്നു പൊലീസില് വിവരം അറിയിക്കുകയായിരുന്നു.
ഒടുവില് വിദ്യാഭ്യാസ വകുപ്പ് പച്ചക്കൊടി കാണിച്ചു, അടുത്ത അധ്യാന വര്ഷം മുതല് ഏഴ്, ഒന്പത് ക്ലാസുകളിലെ ജീവശാസ്ത്ര പാഠപുസ്തകങ്ങളില് ലൈംഗിക വിദ്യാഭ്യാസം പാഠമാകുന്നു
3>വളരെ നാളത്തെ ആവശ്യപ്രകാരം കേരളത്തില് ലൈംഗിക വിദ്യാഭ്യാസം പാഠ്യപദ്ധതിയുടെ ഭാഗമാകുന്നു. വളരെ നാളത്തെ ആവശ്യപ്രകാരമാണ് വിദ്യാഭ്യാസ വകുപ്പ് ഈ ഒരു തീരുമാനത്തിന് പച്ചക്കൊടി കാണിച്ചിരിക്കുന്നത്.
അടുത്ത അധ്യയനവര്ഷം മുതല് ഏഴ്, ഒന്പത് ക്ലാസുകളിലെ മാറുന്ന ജീവശാസ്ത്ര പാഠപുസ്തകങ്ങളിലാണ് ഇതുമായി ബന്ധപ്പെട്ട അധ്യായങ്ങളുള്പ്പെടുത്തുക എന്നാണ് പുറത്ത് വരുന്ന വിവരം. കുട്ടികളുടെ പ്രായം പരിഗണിച്ചുകൊണ്ടാണ് പാഠഭാഗങ്ങള് ഒരുക്കിയിട്ടുള്ളത്.
ലൈംഗിക വിദ്യാഭ്യാസം പാഠ്യപദ്ധതിയിലുള്പ്പെടുത്താന് താമസിക്കുന്നത് കഴിഞ്ഞ വര്ഷം മേയില് ഹൈക്കോടതി കടുത്ത അതൃപ്തി അറിയിച്ചിരുന്നു. 15-കാരിയുടെ ഏഴുമാസം ഗര്ഭം അലസിപ്പിക്കാന് അനുമതി തേടി മാതാപിതാക്കള് സമര്പ്പിച്ച ഹര്ജിയിലായിരുന്നു കോടതി ഇടപെടല്. കൗമാരകാല ഗര്ഭധാരണമുള്പ്പെടെയുള്ള പ്രശ്നങ്ങള് അധികമായി റിപ്പോര്ട്ട് ചെയ്യപ്പെടുന്ന സാഹചര്യത്തിലാണ് ലൈംഗിക വിദ്യാഭ്യാസം പാഠപുസ്തകത്തില് ഉള്പ്പെടുന്നത്.
കൗമാരപ്രായത്തിലെ ശാരീരിക ബുദ്ധിമുട്ടുകളും മറ്റും പ്രാഥമികമായി പരിചയപ്പെടുത്തുന്ന അധ്യായമാണ് ഏഴാംക്ലാസിലെ ജീവശാസ്ത്ര പാഠപുസ്തകം രണ്ടാമത്തെ ഭാഗത്തിലുണ്ടാവുക. ഒന്പതാംക്ലാസിലെ ജീവശാസ്ത്ര പാഠപുസ്തകത്തിന്റെ രണ്ടാംഭാഗത്തിലെ 'പ്രത്യുത്പാദന ആരോഗ്യം' എന്ന അധ്യായത്തില് വിഷയം വിശദമായി പഠിപ്പിക്കും. കൗമാരകാലത്തുണ്ടാകുന്ന ഹോര്മോണ് വ്യതിയാനങ്ങള്, ആര്ത്തവകാല ശുചിത്വം, ഗര്ഭധാരണം എങ്ങനെ, ഭ്രൂണവളര്ച്ച, ഗര്ഭഛിദ്രം, ഗര്ഭനിരോധന മാര്ഗങ്ങള്, പ്രസവപ്രക്രിയ ഗര്ഭഛിദ്രത്തിന്റെ അപകടസാധ്യതകള് മുതലായവ പഠിപ്പിക്കും. ലൈംഗികാതിക്രമണത്തിനിരയായാല് എന്തുചെയ്യണം, ആരെ സമീപിക്കണം തുടങ്ങിയ അറിവുകളും ദിശ ഹെല്പ് ലൈന് നമ്പറും പാഠഭാഗത്തില് ഉള്ക്കൊള്ളിച്ചിട്ടുണ്ട്.
കൊച്ചി സ്മാര്ട്ട് സിറ്റി കെട്ടിട നിര്മ്മാണത്തിനിടെ അപകടം, പെയിന്റിങ്ങിനായി നിര്മ്മിച്ച വലിയ ഗോവണി തകര്ന്നു വീണ് അപകടത്തില് ഗുരുതരമായി പരിക്കേറ്റ തൊഴിലാളി മരിച്ചു
3>സ്മാര്ട്ട് സിറ്റിയില് കെട്ടിട നിര്മ്മാണത്തിനിടയില് അപകടം. പെയിന്റിംഗിനായി നിര്മിച്ച ഇരുമ്പ് ഫ്രെയിം തകര്ന്നുവീണ് ഗുരുതരമായി പരിക്കേറ്റ തൊഴിലാളി മരിച്ചു. ബിഹാര് സ്വദേശി ഉത്തം ആണ് മരിച്ചത്.
അഞ്ചുപേരെ പരിക്കുകളോടെ ആശുപത്രിയില് പ്രവേശിപ്പിച്ചു. രാവിലെയാണ് അപകടമുണ്ടായത്. കെട്ടിടത്തിന്റെ പെയിന്റിങ് ജോലി പുരോഗമിക്കുന്നതിനിടെയാണ് അപകടമുണ്ടായത്.
24 നില കെട്ടിടത്തിന്റെ മിനുക്ക് പണികള്ക്കായാണ് ഇരുമ്പ് ഫ്രെയിം നിര്മിച്ചത്. ഇതില്ക്കയറിനിന്ന് ജോലി ചെയ്യുകയായിരുന്നവരാണ് അപകടത്തില്പ്പെട്ടത്. ഫ്രെയിം തകര്ന്നതോടെ തൊഴിലാളികള് താഴേയ്ക്ക് പതിക്കുകയായിരുന്നു. ആശുപത്രിയില് ചികിത്സയില് കഴിയുന്നവരെല്ലാം ഇതര സംസ്ഥാന തൊഴിലാളികളാണ്.
ബീഹാര് സ്വദേശികളായ രമിത്, സിക്കന്ദര്, അമാന്, ബിബന് സിംഗ്, രാജന് മുന്ന എന്നിവരാണ് ആശുപത്രിയില് കഴിയുന്നത്. അപകടത്തില് കൂടുതല്പ്പേര്ക്ക് പരിക്കേറ്റതായും റിപ്പോര്ട്ടുകളുണ്ട്.
കൊച്ചി പനമ്പിള്ളിനഗറില് നവജാതശിശുവിന്റെ കൊലപാതകം: കുഞ്ഞിന്റെ സംസ്കാരം ഇന്ന് രാവിലെ, പൊലീസിന്റെ നേതൃത്വത്തിലാണ് സംസ്ക്കര ചടങ്ങുകള്
3>കൊച്ചിയില് പനമ്പിള്ളി നഗറില് നഗരത്തെ നടുക്കിയ സംഭവമായിരുന്നു നവജാതശിശുവിന്റെ കൊലപാതകം. ജനിച്ച് മണിക്കൂറുകള്ക്കുള്ളില് അമ്മ കൊലപ്പെടുത്തിയ കുഞ്ഞിന്റെ മൃതദേഹം ഇന്ന് സംസ്ക്കരിക്കും.
കേസില് പ്രതിയായ അമ്മയുടെ ആരോഗ്യനില മെച്ചപ്പെട്ടതിന് ശേഷം മാത്രം കസ്റ്റഡിയില് വാങ്ങാനാണ് നിലവില് പോലീസ് സ്വീകരിച്ച തീരുമാനം. അതിനിടെ ശിശുവിന്റെ ഡിഎന്എ സാമ്പിള് ഇന്ന് പരിശോധനയ്ക്ക് അയക്കും.
പനമ്പിള്ളിനഗറില് നടുറോഡിലേക്ക് കവറില് പൊതിഞ്ഞ് വലിച്ചെറിഞ്ഞ നവജാത ശിശുവിന്റെ സംസ്കാരം ഇന്ന് രാവിലെ 10 ന് പച്ചാളം ശ്മശാനത്തിലാണ് നടക്കുക. മൃതദേഹം പൊലീസാണ് സംസ്കരിക്കുന്നത്. അതിനിടെ എറണാകുളം മെഡിക്കല് ട്രസ്റ്റില് ചികിത്സയിലുള്ള പ്രതിയായ അമ്മയുടെ ആരോഗ്യനിലയില് പുരോഗതിയിയുണ്ട്. എങ്കിലും മാനസികനില പൂര്ണമായും ശരിയായതിന് ശേഷം കസ്റ്റഡിയില് വാങ്ങിയാല് മതി എന്നതാണ് പൊലീസിന്റെ തീരുമാനം.
കുഞ്ഞിന്റെ മൃതദേഹം പോസ്റ്റ്മോര്ട്ടം ചെയ്ത സമയത്ത് തന്നെ പൊലീസിന് ഡിഎന്എ പരിശോധനയ്ക്കുള്ള സാമ്പിള് കൈമാറിയിരുന്നു. ഇതും ഇന്ന് പരിശോധനയ്ക്ക് അയയ്ക്കും. യുവതിയെ വിശദമായി ചോദ്യം ചെയ്തതിന് ശേഷം ആവശ്യമെങ്കില് മാത്രം ആണ് സുഹൃത്തിനെ കസ്റ്റഡിയിലെടുക്കാനാണ് നിലവില് പൊലീസിന്റെ തീരുമാനം. കേസില് പോലീസ് അന്വേഷണം പുരോഗമിക്കുകയാണ്.
എറണാകുളം നഗരമധ്യത്തിലെ ഹോസ്റ്റലിലെ ശുചിമുറിയില് അവിവാഹിതയായ യുവതി പ്രസവിച്ചു, പൊലീസ് സ്ഥലത്തെത്തി അമ്മയേയും കുഞ്ഞിനേയും ആശുപത്രിയിലേക്ക് മാറ്റി
3>എറണാകുളത്ത് വീണ്ടും ശുചിമുറിയില് യുവതി പ്രസവിച്ചു. ഹോസ്റ്റലിലെ ശുചിമുറിയില് ആണ് യുവതി പ്രസവിച്ചത്. യുവതിയുടെ സുഹൃത്തുക്കള് പൊലീസിനെ വിവരം അറിയിച്ചതിനെ തുടര്ന്ന് നോര്ത്ത് പൊലീസ് ഉടന് സ്ഥലത്തെത്തി അമ്മയേയും കുഞ്ഞിനേയും എറണാകുളം ജനറല് ആശുപത്രിയിലേക്ക് മാറ്റി.
യുവതി അവിവാഹിതയാണ്. മറ്റ് ആറു പെണ്കുട്ടികള്ക്കൊപ്പമാണ് യുവതി താമസിച്ചിരുന്നത്. നേരത്തെ യുവതിയുടെ ക്ഷീണം കണ്ട് മുറിയിലുണ്ടായിരുന്നവര് ചോദിച്ചപ്പോള് ഗ്യാസ് കൊണ്ടുള്ള ശാരീരിക ബുദ്ധിമുട്ട് കൊണ്ടാണ് ക്ഷീണമെന്നാണ് മറുപടി നല്കിയിരുന്നത്.
ഇന്നു രാവിലെയാണ് യുവതി ഹോസ്റ്റലിലെ ശുചിമുറിയില് ആണ്കുഞ്ഞിന് ജന്മം നല്കിയത്. രണ്ടര കിലോഗ്രാം തൂക്കമുള്ള കുഞ്ഞ് ആരോഗ്യവാനാണ്. ശുചിമുറിയില് കയറി ഏറെ നേരം കഴിഞ്ഞിട്ടും യുവതി പുറത്തിറങ്ങാത്തതിനെത്തുടര്ന്ന് മുറിയില് താമസിക്കുന്നവര് വാതില് തല്ലിപ്പൊളിച്ച് അകത്തു കയറിയപ്പോഴാണ് അമ്മയേയും നവജാത ശിശുവിനേയും കണ്ടത്.
ഉടന് തന്നെ വിവരം എറണാകുളം നോര്ത്ത് പൊലീസിനെ വിവരം അറിയിക്കുകയായിരുന്നു. കാമുകനില് നിന്നാണ് ഗര്ഭം ധരിച്ചതെന്ന് യുവതി പൊലീസിന് മൊഴി നല്കി. ഇതേത്തുടര്ന്ന് കാമുകനോടും വീട്ടുകാരോടും സ്റ്റേഷനില് ഹാജരാകാന് നിര്ദേശം നല്കിയിട്ടുണ്ട്. തെക്കന് ജില്ലക്കാരിയായ യുവതി കൊച്ചിയില് ഒരു സ്വകാര്യസ്ഥാപനത്തില് ജോലി ചെയ്യുകയായിരുന്നു.
നവകേരള ബസ് സര്വ്വീസ് ആരംഭിച്ചു, കോഴിക്കോട് നിന്നും ബെംഗളൂരുവിലേക്കുള്ള ഗരുഡപ്രീമിയം നാലരയോടെയാണ് സര്വ്വീസ് ആരംഭിച്ചത്
3>കോഴിക്കോട് : 'നവകേരള ബസ്' പൊതുജനങ്ങള്ക്കായുള്ള ആദ്യത്തെ സര്വീസ് ആരംഭിച്ചു. മുഖ്യമന്ത്രി പിണറായി വിജയന്റെ നേതൃത്വത്തില് മന്ത്രിസഭ കേരളം മുഴുവന് സഞ്ചരിച്ച നവകേരള ബസ് കോഴിക്കോട് നിന്നും ബെംഗളൂരുവിലേക്കുള്ള ഗരുഡപ്രീമിയം സര്വീസാണ് ഇന്ന് നാലരയോടെ ആരംഭിച്ചത്.
യാത്ര തുടങ്ങി അല്പ്പസമയത്തിനകം തന്നെ ഹൈഡ്രോളിക് ഡോര് കേടായത് പക്ഷെ കല്ലുകടിയായി. ബസിന്റെ ഡോര് ഇടയ്ക്കിടെ തനിയെ തുറന്നു പോകുകയായിരുന്നു. ശക്തമായി കാറ്റ് അടിക്കാന് തുടങ്ങിയതോടെ കാരന്തൂര് എത്തിയപ്പോള് ബസ് നിര്ത്തി. തുടര്ന്ന് യാത്രക്കാരുടെ നേതൃത്വത്തില് ബാഗിന്റെ വള്ളി ഉപയോഗിച്ച് വാതില് കെട്ടിവച്ച് യാത്ര തുടരുകയായിരുന്നു.
4 മണിക്ക് യാത്ര തുടങ്ങുമെന്നാണ് അറിയിച്ചതെങ്കിലും നാലരയോടെയാണ് യാത്ര ആരംഭിച്ചത്. താമരശേരിയില് ബസിന് സ്വീകരണം ലഭിച്ചു. ഏപ്രില് മുപ്പതിനാണ് സീറ്റ് ബുക്കിങ്ങിന് ഓണ്ലൈന് സൗകര്യം ഒരുക്കിയത്. രണ്ട് ദിവസം കൊണ്ട് സീറ്റു മുഴുവന് ബുക്ക് ചെയ്തു. 25 യാത്രക്കാരാണ് ബസിലുള്ളത്.
26 സീറ്റുള്ളതില് ഒരു സീറ്റ് കണ്ടക്ടറുടേതാണ്. റിസര്വ് ഡ്രൈവര് കം കണ്ടക്ടര് രീതിയില് പി. ജയ്ഫര്, ഷാജി മോന് എന്നിവരാണ് ബസ് ഓടിക്കുന്നത്. 2013 മുതല് കോഴിക്കോട്-ബെംഗളൂരു മള്ട്ടി ആക്സില് ബസ് ഓടിക്കുന്നവരാണിവര്.
കോഴിക്കോട്- ബെംഗളൂരു റൂട്ടാണ് സ്ഥിരം സര്വീസെങ്കിലും മേയ് ദിനത്തില് കോഴിക്കോട്ടേക്കു ബസ് എത്തിക്കാനുള്ള യാത്ര തിരുവനന്തപുരം- കോഴിക്കോട് സര്വീസായി മാറി. ബുക്ക് ചെയ്ത 9 യാത്രക്കാരാണ് ബസ് പുറപ്പെട്ട തമ്പാനൂര് ടെര്മിനലില്നിന്നും കയറിയത്. വഴിയിലും ആളെ കയറ്റി. കോഴിക്കോട് സ്റ്റാന്ഡില് പാര്ക്ക് ചെയ്യാനുള്ള ശ്രമത്തിനിടെ ബസിന്റെ വശങ്ങള് ഉരഞ്ഞു പെയ്ന്റ് പോയി. നടക്കാവ് വര്ക്ഷോപ്പില് എത്തിച്ച് പെയ്ന്റടിച്ചു.