സ്വന്തം ലേഖകൻ

പൊതുവേ ഭര്‍ത്താക്കന്മാര്‍ മദ്യപിക്കുന്നതിന് ഭാര്യമാര്‍ എതിരായിരിക്കും. പക്ഷെ ഈ ആഡംബര മദ്യം വാങ്ങാന്‍ ചിലപ്പോള്‍ ഭാര്യമാര്‍ എതിര് നില്‍ക്കില്ല. കാരണം വലിയൊരു ഓഫറാണ് ഈ മദ്യം വാങ്ങുമ്പോള്‍ ലഭിക്കുന്നത്.

ഏകദേശം 11 ലക്ഷം (13,000 ഡോളര്‍) രൂപ വില വരുന്ന ഒരു ആഡംബര കോക്ടെയില്‍ ആണ് ഇത്. ഇതിന്റെ പ്രത്യേകത ഇതിന്റെ രുചിയില്‍ മാത്രമല്ല. ഇതിന്റെ വില തന്നെയാണ്. യുഎസിലെ തന്നെ ഏറ്റവും വിലയേറിയ ഈ മദ്യം വിളമ്പുന്നത് ചിക്കാഗോയിലെ അഡലീന എന്ന ആഡംബര ഹോട്ടലിലാണ്.

മാരോ മാര്‍ട്ടിനി എന്ന് പേര് നല്‍കിയിരിക്കുന്ന ഈ കോക്ടയില്‍ ഒരു സാധാരണ മദ്യം അല്ല. വീഞ്ഞുകളെക്കുറിച്ച് അറിവുള്ള കോളിന്‍ ഹോഫര്‍ എന്നയാളാണ് ഈ മദ്യം കണ്ടുപിടിച്ചത്.

വാറ്റിയെടുത്ത മദ്യം ,തക്കാളിയുടെ നീര്, നാരക തുളസി, ഒലിവ് ഓയില്‍ എന്നിവയാണ് ഇതില്‍ പ്രധാനമായും അടങ്ങിയിരിക്കുന്നത്. എന്നാല്‍ ഈ മദ്യത്തെ ഇത്രയും വിലപിടിപ്പുള്ളതാക്കുന്നത് എന്താണെന്നായിരിക്കും ഇപ്പോള്‍ നിങ്ങള്‍ ചിന്തിക്കുന്നത്. ലോകപ്രശസ്തമായ മാരോ ഫൈന്‍ ജ്വല്ലറി ഹൗസ് രൂപകല്‍പ്പന ചെയ്ത 14 കാരറ്റ് സ്വര്‍ണ്ണത്തില്‍ 150 വജ്രങ്ങള്‍ കൊണ്ട് അലങ്കരിച്ച ഒരു ടെന്നീസ് നെക്ലേസും ഇത് വാങ്ങുന്ന ആളുകള്‍ക്ക് ലഭിക്കും. അതുകൊണ്ട് കൂടിയാണ് ഈ മദ്യത്തിന് ലക്ഷങ്ങള്‍ വില വരുന്നത്. ഈ ആഡംബര മദ്യം ആദ്യമായി വാങ്ങിയ ആളെക്കുറിച്ചും വിവരം ലഭിച്ചിട്ടുണ്ട്.

മാരോ ഫൈനിന്റെ ആരാധകനായ ഒരാള്‍ തന്റെ ഭാര്യയ്ക്ക് സര്‍പ്രൈസ് നല്‍കാനായി ഇത് വാങ്ങിയിരുന്നു എന്നാണ് സിബിഎസ് റിപ്പോര്‍ട്ട് ചെയ്യുന്നത് . ഗോള്‍ഡ് കോസ്റ്റ് ആസ്ഥാനമായുള്ള മാരോ ഫൈന്‍ ജ്വല്ലറി ബ്രാന്‍ഡിന്റെ സ്ഥാപകനായ ജിലിയന്‍ സാസോണ്‍ ഇക്കാര്യം സ്ഥിരീകരിക്കുകയും ചെയ്തു.