ലണ്ടൻ: സ്വന്തം ലേഖകൻ

ഇന്ത്യ - പാക്ക് പോര് യുദ്ധമായി മാറുന്നതിനുമുമ്പേ, ലണ്ടനിലെ ഇന്ത്യൻ - പാക്കിസ്ഥാൻ ഏംബസികൾക്കുമുന്നിൽ, ഇന്ത്യൻ അനുകൂലികളും പാക്കിസ്ഥാൻ അനുകൂലികളും തമ്മിൽ പ്രതിഷേധ പ്രകടനങ്ങൾ നടത്തി പരസ്‌പരം  ഏറ്റുമുട്ടിയിരുന്നു. 

പഹൽഗാം കൂട്ടക്കുരുതിയ്ക്ക് ശേഷമായിരുന്നു ഈ ഏറ്റുമുട്ടലുകൾ.  അതിനിടയിൽ ഒരു പാക്കിസ്ഥാൻ ഏംബസി  ഉദ്യോഗസ്ഥൻ തന്നെ ഇന്ത്യൻ പ്രതിഷേധക്കാരുടെ തലവെട്ടും എന്ന്  കൈകൊണ്ട് ആംഗ്യം കാണിച്ചത് ഏറെ മാധ്യമശ്രദ്ധ പിടിച്ചുപറ്റുകയും ചെയ്തു.

ഇരുരാജ്യങ്ങളും തമ്മിലുള്ള സംഘർഷം കൂടുതൽ രൂക്ഷമായതോടെ, സോഷ്യൽ മീഡിയ പോസ്റ്റുകളിലൂടെയും ഇരുരാജ്യക്കാർ തമ്മിൽ ഏറ്റുമുട്ടി. അതിനിടെ ചില ഇന്ത്യൻ വംശജർ സോഷ്യൽ മീഡിയ പോസ്റ്റുകളിലൂടെ  പാകിസ്താനെ അനുകൂലിക്കുന്നതും കണ്ടു.

എന്നാൽ യുകെയിൽ താമസിക്കുന്ന ഇന്ത്യക്കാർ, തമാശയ്ക്കുപോലും ഇന്ത്യൻ നടപടികളെ വിമർശിക്കുകയും പാക്കിസ്ഥാനെ അനുകൂലിക്കുകയും ചെയ്യരുതെന്ന മുന്നറിയിപ്പ് നൽകുകയാണ് ഇപ്പോൾ വെസ്റ്റ്മിൻസ്റ്റർ സർവകലാശാലയിലെ പ്രൊഫസ്സറും ഗവേഷകയും ഇന്ത്യൻ വംശജയുമായ നിതാഷ കൗൾ.

ഇന്ത്യാവിരുദ്ധ പ്രവർത്തനങ്ങളിൽ ഏർപ്പെട്ടതിന് ഇന്ത്യൻ സർക്കാർ അവരുടെ ഓവർസീസ് സിറ്റിസൺഷിപ്പ് ഓഫ് ഇന്ത്യ (OCI) പദവി റദ്ദാക്കിയതായി യുകെയിലെ ഇന്ത്യൻ വംശജയായ പ്രൊഫസർ നിതാഷ കൗൾ പറയുന്നു. 

മെയ് 18 ന് ഒസിഐ പദവി റദ്ദാക്കിയതിനെക്കുറിച്ച് ഇന്ത്യൻ സർക്കാർ അയച്ച അറിയിപ്പ് കൗൾ സോഷ്യൽ മീഡിയയിൽ പങ്കുവെച്ചു. ഇന്ത്യാ സർക്കാരിന്റെ ഔദ്യോഗിക കത്തിന്റെ ഒരു ഭാഗത്തിന്റെ ചിത്രവും അവർ  അറ്റാച്ചുചെയ്തു.

"പ്രധാനപ്പെട്ട കുറിപ്പ് - ഇന്ന് നാട്ടിലെത്തിയതിന് ശേഷം എന്റെ #OCI (ഓവർസീസ് സിറ്റിസൺഷിപ്പ് ഓഫ് #ഇന്ത്യ) റദ്ദാക്കൽ ലഭിച്ചു. #മോദി ഭരണത്തിന്റെ ന്യൂനപക്ഷ വിരുദ്ധ, ജനാധിപത്യ വിരുദ്ധ നയങ്ങളെക്കുറിച്ചുള്ള പണ്ഡിതോചിതമായ പ്രവർത്തനത്തിന് എന്നെ ശിക്ഷിച്ച #TNR (ട്രാൻസ്നാഷണൽ അടിച്ചമർത്തൽ) ഒരു മോശം പ്രതികാരവും, ക്രൂരവുമായ ഉദാഹരണമാണിത്," കൗൾ എക്‌സിൽ എഴുതി.

കൗൾ പങ്കുവെച്ച ഇന്ത്യൻ സർക്കാർ അയച്ച നോട്ടീസിന്റെ ഭാഗം ഇങ്ങനെയായിരുന്നു,  "വിവിധ അന്താരാഷ്ട്ര വേദികളിലും സോഷ്യൽ മീഡിയ പ്ലാറ്റ്‌ഫോമുകളിലും നിങ്ങളുടെ നിരവധി ശത്രുതാപരമായ രചനകൾ, പ്രസംഗങ്ങൾ, പത്രപ്രവർത്തന പ്രവർത്തനങ്ങൾ എന്നിവയിലൂടെ, ഇന്ത്യയുടെ പരമാധികാരവുമായി ബന്ധപ്പെട്ട കാര്യങ്ങളിൽ നിങ്ങൾ ഇന്ത്യയെയും അതിന്റെ സ്ഥാപനങ്ങളെയും വിമർശിക്കൽ പതിവായി ലക്ഷ്യം വയ്ക്കുന്നു," 

വെസ്റ്റ്മിൻസ്റ്റർ സർവകലാശാലയിലെ പൊളിറ്റിക്സ് ആൻഡ് ഇന്റർനാഷണൽ റിലേഷൻസ് വിഭാഗത്തിൽ ഫാക്കൽറ്റി അംഗമാണ് നിതാഷ കൗൾ. ഡൽഹി സർവകലാശാലയിലെ ശ്രീറാം കോളേജ് ഓഫ് കൊമേഴ്‌സിൽ (SRCC) നിന്ന് ബിരുദം നേടിയ കൗൾ, യുകെയിലെ ഹൾ സർവകലാശാലയിൽ നിന്ന് ബിരുദാനന്തര ബിരുദവും പിഎച്ച്ഡിയും നേടി.

എന്നാൽ ഇതാദ്യമല്ല ഇന്ത്യാ  സർക്കാർ തനിക്കെതിരെ പ്രതികാര നടപടികൾ കൈക്കൊള്ളുന്നതെന്നാണ് കൗളിന്റെ വാദം. കഴിഞ്ഞ വർഷം ബെംഗളൂരു വിമാനത്താവളത്തിൽ ലാൻഡ് ചെയ്ത് മണിക്കൂറുകൾക്കുള്ളിൽ തന്നെ നാടുകടത്തിയ സംഭവത്തെക്കുറിച്ച് പരാമർശിച്ച അവർ , തന്നെ ക്ഷണിച്ച ബിജെപി ഇതര കർണാടക സംസ്ഥാന സർക്കാരിനോടുള്ള അപമാനമാണിതെന്ന് വിശേഷിപ്പിച്ചു.

"ജനാധിപത്യപരവും ഭരണഘടനാപരവുമായ മൂല്യങ്ങളെക്കുറിച്ച് സംസാരിച്ചതിന് ഇന്ത്യയിലേക്കുള്ള പ്രവേശനം നിഷേധിച്ചു. കർണാടക സർക്കാർ (കോൺഗ്രസ് ഭരിക്കുന്ന സംസ്ഥാനം) എന്നെ ഒരു സമ്മേളനത്തിലേക്ക് ക്ഷണിച്ചു, പക്ഷേ (കേന്ദ്രം) എനിക്ക് പ്രവേശനം നിഷേധിച്ചു. എന്റെ എല്ലാ രേഖകളും സാധുവായിരുന്നു, നിലവിലുള്ളവയും (യുകെ പാസ്‌പോർട്ടും ഒസിഐയും) ആയിരുന്നു," കശ്മീരി പണ്ഡിറ്റ് കമ്മ്യുണിറ്റിയിൽ നിന്നുള്ള അക്കാദമിഷ്യൻ കഴിഞ്ഞ വർഷം പോസ്റ്റ് ചെയ്തു.

കഴിഞ്ഞ വർഷം കൗളിന്റെ ആരോപണങ്ങൾക്ക് മറുപടിയായി ബിജെപിയുടെ കർണാടക യൂണിറ്റ് അവർക്കെതിരെയും കോൺഗ്രസ് നേതൃത്വത്തിലുള്ള കർണാടക സർക്കാരിനെതിരെയും രൂക്ഷ വിമർശനം ഉന്നയിച്ചിരുന്നു.

"ഇന്ത്യയുടെ വിഘടനം ആഗ്രഹിക്കുന്ന ഒരു പാകിസ്ഥാൻ അനുഭാവിയെ ക്ഷണിച്ചുകൊണ്ട് കോൺഗ്രസ് പാർട്ടി ഇന്ത്യൻ ഭരണഘടനയെ അപമാനിച്ചു," എന്ന് അവർ അന്ന് എക്‌സിൽ പോസ്റ്റ് ചെയ്തു.

എന്നാൽ പുതിയ സംഭവത്തിൽ നിതാഷ കൗളിന്റെ  ഒസിഐ കാർഡ് കട്ടുചെയ്തത് പെട്ടെന്നുള്ള ഒരു നടപടിയല്ലെന്നും കേന്ദ്ര വിദേശകാര്യ മന്ത്രാലയം അറിയിക്കുന്നു. കഴിഞ്ഞ ഏതാനും വർഷങ്ങളായി അവർ സോഷ്യൽ മീഡിയകളിലൂടെയും മറ്റും ഇന്ത്യാ  വിരുദ്ധ പ്രവർത്തനം നടത്തുകയാണെന്നും കേന്ദ്ര സർക്കാർ ആരോപിക്കുന്നു. 

ഇന്ത്യൻ വംശജ എന്ന പദവി ദുരുപയോഗംചെയ്ത്, ഇന്ത്യയിൽ വരികയും താമസിക്കുകയും ഇവിടുത്തെ ആനുകൂല്യങ്ങൾ പറ്റുകയും ചെയ്‌തുകൊണ്ട്‌, ഇന്ത്യാ വിരുദ്ധ  പ്രവർത്തനം നടത്താൻ ആരേയും അനുവദിക്കില്ല. ഒസിഐ കാർഡ് റദ്ദാക്കിയ നടപടിയെ അനുകൂലിച്ച് സർക്കാർ വൃത്തങ്ങൾ പ്രതികരിച്ചു.