ലണ്ടൻ: സ്വന്തം ലേഖകൻ

യുകെയിലെ സുഹൃത്തുക്കളേയും നാട്ടിലെ കുടുംബത്തെയും ആശങ്കയിലാഴ്ത്തി, കാണാതായിരുന്ന ചെസ്റ്റർ യൂണിവേഴ്‌സിറ്റി വിദ്യാർത്ഥിയായ മലയാളി യുവാവിനെ കണ്ടെത്തി. പോലീസിനൊപ്പം വിവിധ മലയാളി ഗ്രൂപ്പുകളും നടത്തിയ വ്യാപകമായ അന്വേഷണത്തിനൊടുവിലാണ് ഈസ്റ്റ് ഹാമിൽ നിന്ന് സൗരവ് സന്തോഷിനെ കണ്ടെത്തിയത്.

തൃശൂര്‍ ചാലക്കുടി സ്വദേശിയായ യുവാവ് സൗരവ് സന്തോഷിനെ‌, 26, ഫെബ്രുവരി മുതലാണ് കാണാതായത്.  2021 ല്‍ യുകെയിലെ ചെസ്റ്റര്‍ യൂണിവേഴ്സിറ്റിയില്‍ എംബിഎ പഠനത്തിന് എത്തിയതാണ്. പഠനം പൂര്‍ത്തിയാക്കി ഫെബ്രുവരിയില്‍ പോസ്റ്റ് സ്റ്റഡി വീസയുടെ കാലാവധി അവസാനിക്കാനിരിക്കെയാണ് സൗരവ് നാട്ടിലുള്ള മാതാപിതാക്കളെ ബന്ധപ്പെടുന്നില്ലെന്ന വിവരം ലഭിക്കുന്നത്.

മിക്ക ദിവസങ്ങളിലും മാതാപിതാക്കളുമായി ഫോണിലൂടെ ബന്ധം പുലര്‍ത്തിയിരുന്ന സൗരവ് 2024 സെപ്റ്റംബറിനുശേഷം വല്ലപ്പോഴും മാത്രമാണ് ബന്ധപ്പെട്ടിരുന്നത്. ഫെബ്രുവരിക്ക് ശേഷം സൗരവുമായി യാതൊരു വിധത്തിലും ബന്ധപ്പെടാന്‍ കഴിയാതെ വന്നത്തോടെയാണ് മാതാപിതാക്കള്‍ യുകെ മലയാളികളുടെ സഹായം തേടുന്നത്.

തുടര്‍ന്ന് യുകെ മലയാളിയും പൊതുപ്രവര്‍ത്തകനുമായ അനീഷ് എബ്രഹാം ഏപ്രില്‍ 25ന് സൗരവിന്റെ ഫോട്ടോ ഉള്‍പ്പടെ സമൂഹമാധ്യമത്തില്‍ പോസ്റ്റ്‌ ചെയ്തു അന്വേഷണം ആരംഭിക്കുകയായിരുന്നു. പിന്തുണയുമായി വിവിധ സമൂഹമാധ്യമ അക്കൗണ്ടുകളിലൂടെ റോയി ജോസഫ്, മവീഷ് വേലായുധന്‍, ജയ്സണ്‍ കല്ലട എന്നിവരും വിവരങ്ങള്‍ പങ്കുവെച്ചിരുന്നു. വിവരങ്ങള്‍ അതിവേഗം യുകെ മലയാളികള്‍ക്കിടയില്‍ വൈറലായി പരന്നതോടെ വിവിധ സംഘടനകള്‍ സൗരവിനായുള്ള തിരച്ചില്‍ നടത്താനായി രംഗത്ത് എത്തുകയായിരുന്നു.

ഏറ്റവും ഒടുവില്‍ ഇക്കഴിഞ്ഞ സെപ്റ്റംബറില്‍ ചിത്രീകരിക്കപ്പെട്ടു എന്ന് കരുതുന്ന സൗരവിന്റെ വിഡിയോ കൂടി പങ്കുവയ്ക്കപ്പെട്ടതോടെ അന്വേഷണങ്ങള്‍ ഈസ്റ്റ്‌ഹാം കേന്ദ്രീകരിച്ചു നടത്തുകയായിരുന്നു. വ്യാഴാഴ്ച വൈകിട്ടോടെ ഈസ്റ്റ്‌ഹാമിന് സമീപമുള്ള സ്റ്റാഫോര്‍ഡില്‍ വെച്ച് സൗരവിനെ കണ്ടെത്തുകയുമായിരുന്നു.

മുടിയും താടിയും നീട്ടി വളര്‍ത്തിയ നിലയില്‍ അവശനായി  കാണപ്പെട്ട സൗരവിനെ ഇപ്പോള്‍ ഒരു മലയാളി വീട്ടമ്മയുടെ  തത്കാലിക ഷെല്‍റ്ററില്‍ താമസിപ്പിച്ചിരിക്കുകയാണ്. പാസ്പോര്‍ട്ട് ഉള്‍പ്പടെയുള്ള രേഖകളുടെ ഒറജിനല്‍ നഷ്ടപ്പെട്ടുവെങ്കിലും പകര്‍പ്പുകള്‍ ഹാജരാക്കി സൗരവിനെ നാട്ടിലെത്തിക്കാനുള്ള ശ്രമത്തിലാണ് ഇപ്പോള്‍ അന്വേഷണത്തിൽ പങ്കെടുത്ത യുകെ മലയാളികൾ.

ഇതിനായി തൃശൂര്‍ എംപിയും കേന്ദ്രമന്ത്രിയുമായ സുരേഷ് ഗോപിയുടെ സഹായം തേടുകയും, സുരേഷ് ഗോപിയുടെ നിര്‍ദ്ദേശ പ്രകാരം സൗരവിനെ കണ്ടെത്താന്‍ നേതൃത്വം നല്‍കിയവരെ ലണ്ടനിലെ ഇന്ത്യന്‍ ഹൈക്കമ്മീഷന്റെ ഡപ്യൂട്ടി ഹൈക്കമ്മീഷണര്‍ രാജേന്ദ്ര പട്ടേല്‍ ഫോണില്‍ വിളിക്കുകയും ചെയ്തു.

ഫ്ലൈറ്റ് ടിക്കറ്റ് ഉള്‍പ്പടെയുള്ള യാത്രാരേഖകള്‍ നല്‍കി ചൊവ്വാഴ്ച്ചയോടെ സൗരവിനെ നാട്ടില്‍ എത്തിക്കുന്നതിനുള്ള ക്രമീകരണങ്ങള്‍ ആരംഭിക്കുമെന്ന് തിരച്ചിൽ സംഘാംഗങ്ങളായ സന്നദ്ധ സേവകർ അറിയിച്ചു.