18
MAR 2021
THURSDAY
1 GBP = 126.53 INR
1 USD = 94.44 INR
1 EUR = 106.13 INR
തൊടുപുഴ പുഴയോര ഹൈവേയിൽ സഹോദരനൊപ്പം സ്കൂട്ടറിൽ സഞ്ചരിക്കവെ ഉണ്ടായ വാഹനാപകടത്തിൽ ഗുരുതരമായി പരുക്കേറ്റ് ചികിത്സയിലായിരുന്ന ഇരുപത്തഞ്ചുകാരിയായ സ്റ്റാഫ് നഴ്സ് അക്സ മരിയ മരണപ്പെട്ടു.
ശനിയാഴ്ച രാത്രി ഏഴോടെയായിരുന്നു നാടിനെ കണ്ണീരിലാഴ്ത്തിയ ഈ ദാരുണ സംഭവം. സഹോദരൻ അനക് ഷാജിക്കൊപ്പം (അപ്പു) യാത്ര ചെയ്യുകയായിരുന്ന അക്സ സഞ്ചരിച്ചിരുന്ന വാഹനം അബദ്ധത്തിൽ തെന്നിമറിയുകയായിരുന്നു.
അപകടത്തിൽ ഗുരുതരമായി പരുക്കേറ്റയുടൻ തന്നെ യുവതിയെ തൊടുപുഴ ബേബി മെമ്മോറിയൽ ആശുപത്രിയിൽ എത്തിക്കുകയും തീവ്രപരിചരണ വിഭാഗത്തിൽ പ്രവേശിപ്പിച്ച് വിദഗ്ധ ചികിത്സ നൽകുകയും ചെയ്തിരുന്നു.
എന്നാൽ ദിവസങ്ങളോളം നീണ്ട തീവ്രശ്രമങ്ങളും പ്രാർത്ഥനകളും വിഫലമാക്കിക്കൊണ്ട് ഇന്നലെ രാത്രിയോടെ അക്സയുടെ ജീവൻ രക്ഷിക്കാൻ കഴിഞ്ഞില്ല.
തൊടുപുഴ ബേബി മെമ്മോറിയൽ ആശുപത്രിയിലെ തന്നെ സ്റ്റാഫ് നഴ്സായി സേവനം അനുഷ്ഠിച്ചു വരികയായിരുന്നു അക്സ മരിയ. എല്ലാവർക്കും സ്നേഹം മാത്രം നൽകി കളിചിരിയോടെ ഓടിനടന്ന യുവ നഴ്‌സിന്റെ അപ്രതീക്ഷിത വിയോഗം വിശ്വസിക്കാനാകാതെ കണ്ണുകൾ തുടയ്ക്കുകയാണ് സഹപ്രവർത്തകരും സുഹൃത്തുക്കളും.
വാഴക്കുളം ആവോലി പൊരിയംകുന്നേൽ ഷാജി ജോസഫിന്റെയും ഷൈമോളിന്റെയും മകളാണ്.
വാഴക്കുളം ചവറ ഇന്റർനാഷണൽ അക്കാദമിയിലെ അധ്യാപികയാണ് മാതാവ് ഷൈമോൾ. അപ്രതീക്ഷിതമായി കടന്നുവന്ന ഈ വേർപാടിന്റെ ദുഃഖത്തിലാണ് കുടുംബാംഗങ്ങളും സഹപ്രവർത്തകരും നാടൊകെയും.
അപകടത്തെ തുടർന്ന് ആശുപത്രിയിൽ ചികിത്സയിലിരിക്കെ മരണപ്പെട്ട അക്സയുടെ സംസ്കാര ചടങ്ങുകൾ പിന്നീട് നടക്കും. യുവനഴ്സിന്റെ ആകസ്മികമായ വിയോഗത്തിൽ ആരോഗ്യമേഖലയിലെ സഹപ്രവർത്തകർ ഉൾപ്പെടെ നിരവധി പേരാണ് സമൂഹമാധ്യമങ്ങളിലൂടെയും മറ്റും ആദരാഞ്ജലികളും അനുശോചനങ്ങളും രേഖപ്പെടുത്തുന്നത്.
നോർത്തേൺ അയർലൻഡിലെ ബെൽഫാസ്റ്റിലുള്ള രാജശ്രീ ജെയ്‌സന്റെ അകാല വിയോഗമാണ് ഇന്നലെ യൂറോപ്യൻ പ്രവാസികളുട ഉള്ളുലച്ചതെങ്കിൽ, അയർലാൻഡ് റിപ്പബ്ലിക്കിൽ നിന്നുള്ള മറ്റൊരു വിയോഗവർത്തയും മനസ്സിലെ വേദനയായി മാറുന്നു.
അയർലൻഡിലെ കോർക്കിൽ കുടുംബസമേതം താമസിച്ചിരുന്ന തൃശൂർ ചാലക്കുടി സ്വദേശിയായ റോസ്മേരി ഫിലിപ്പോസ് ആണ് വിടവാങ്ങിയത്. 41 വയസ്സുമാത്രമായിരുന്നു പ്രായം.
കുറച്ചുനാളായി അസുഖബാധിതയായി ചികിത്സയിലായിരുന്നു റോസ്മേരി. കോർക്കിലെ ക്ലാസ്‍ലേക്ക്, ബാലിൻകോളിൽ മേഖലയിലായിരുന്നു റോസ്മേരിയും കുടുംബവും താമസിച്ചിരുന്നത്.
അർബുദ രോഗവുമായുള്ള പോരാട്ടത്തിനൊടുവിലാണ് വിയോഗം. തൃശൂർ ജില്ലയിലെ കൊരട്ടി കൊന്നൂരിൽ കൊച്ചുമേരിയുടെയും പരേതനായ ഫിലിപ്പോസ് കിടങ്ങന്റെയും മകളാണ് റോസ്മേരി.
നഴ്സായി ജോലി ചെയ്തിരുന്ന റോസ്മേരിയ്ക്ക്, ചുരുങ്ങിയ നാളുകൾക്കുള്ളിൽ എല്ലാവരുടേയും സൗഹൃദവും സ്നേഹവും പിടിച്ചുപറ്റാൻ കഴിഞ്ഞു. മറ്റുള്ളവരെ പരിചരിക്കുന്നതിലും സഹായിക്കുന്നതിലും എന്നും ശ്രദ്ധ പുലർത്തിയിരുന്നു. രോഗാവസ്ഥയിലും കുടുംബവും മക്കളുടെ ഭാവിയുമായിരുന്നു അവരുടെ ഏറ്റവും വലിയ കരുതലും സ്വപ്നവും. സ്നേഹവും കരുണയും നിറഞ്ഞ വ്യക്തിത്വമായിരുന്നുവെന്ന് സഹപ്രവർത്തകർ പറയുന്നു.
നിരവധി സുഹൃത്തുക്കൾ റോസ്മേരിയുടെ വളരെ വേഗത്തിലുള്ള ഈ മടക്കയാത്രയിൽ മനസ്സുനൊന്ത് ഫെയ്‌സ്ബുക്ക് അടക്കമുള്ള സോഷ്യൽ മീഡിയകളിൽ പോസ്റ്റുകളിട്ടിട്ടുണ്ട്.
സിനു തോമസ് ആണ് ഭർത്താവ്. എലാന തോമസ്, ഇവാ റോസ് എന്നിവർ മക്കളാണ്.
അയർലൻഡ് മലയാളികളെ ആകെ വേദനയിലാഴ്ത്തിയ റോസ്മേരിയുടെ പൊതുദർശനം ഇന്ന് വൈകിട്ട് 5 മുതൽ 7 വരെ ബല്ലിൻകോളിഗിലെ ക്രൗളി ഫ്യൂണറൽ ഹോമിൽ (P31 W982) നടക്കും.
സംസ്കാര ശുശ്രൂഷകൾ വെള്ളിയാഴ്ച രാവിലെ 11ന് ബല്ലിൻകോളിഗിലെ ക്രൈസ്റ്റ് അവർ ലൈറ്റ് ചർച്ചിൽ (P31 HW74) ആരംഭിക്കും. തുടർന്ന് ഓവൻസിലെ കില്ലംനി റോഡിലുള്ള സെന്റ് ജോൺ ദ ബാപ്റ്റിസ്റ്റ് ചർച്ച് സെമിത്തേരിയിൽ സംസ്കാരം നടത്തും.
Latest News
ദിനോസറുകൾ ഭൂമിയിൽ വിഹരിച്ചിരുന്ന കാലം മുതൽ ഇന്നുവരെ വലിയ മാറ്റങ്ങളൊന്നുമില്ലാതെ നിലനിൽക്കുന്ന ജീവികൾ! രൂപത്തിലും ജീവിതരീതിയിലും ചരിത്രത്തിന്റെ ശേഷിപ്പുകളെ ഓർമിപ്പിക്കുന്ന ഈ മത്സ്യങ്ങൾ ഇന്നും ശാസ്ത്രലോകത്തിന് കൗതുകമാണ്. സ്റ്റർജൻ എന്നറിയപ്പെടുന്ന ഇവയ്ക്ക് ദിനോസർ മത്സ്യം അഥവാ ‘ലിവിങ് ദിനോസർ’ എന്ന വിശേഷണവും ലഭിച്ചിട്ടുണ്ട്. ലോകത്തിന്റെ വിവിധ ഭാഗങ്ങളിൽ കാണപ്പെടുന്ന ഇവയ്ക്ക് അമേരിക്കയിലെ ഇദഹോ സംസ്ഥാനത്തുള്ള സ്നേക് റിവറിൽ പത്തടി വരെ നീളം വയ്ക്കും. അനുകൂലമായ പ്രകൃതിസാഹചര്യങ്ങളും വേട്ടയാടുന്ന ജീവികളുടെ കുറവുമാണ് ഇവിടെ ഇവയ്ക്ക് ഇത്രയും വലിയ വളർച്ച കൈവരിക്കാൻ സഹായിക്കുന്നത്.
ട്രയാസിക് കാലഘട്ടത്തിലാണ് സ്റ്റർജൻ മത്സ്യങ്ങളുടെ ആവിർഭാവമെന്നാണ് ശാസ്ത്രലോകത്തിന്റെ വിലയിരുത്തൽ. ഏകദേശം 24.5 കോടി വർഷം പഴക്കമുള്ള ഫോസിലുകൾ ഇവയുടേതായി കണ്ടെത്തിയിട്ടുണ്ട്. കോടിക്കണക്കിന് വർഷങ്ങൾ പിന്നിട്ടിട്ടും ശരീരഘടനയിൽ കാര്യമായ മാറ്റങ്ങളില്ലാതെ നിലനിൽക്കുന്നു എന്നതാണ് ഇവയുടെ ഏറ്റവും വലിയ പ്രത്യേകത. ലോകത്തിലെ ഏറ്റവും വലിയ ശുദ്ധജല മത്സ്യങ്ങളിൽ ഒന്നായ ഇവയ്ക്ക് പത്തടി വരെ നീളവും 450 കിലോഗ്രാം വരെ ഭാരവുമുണ്ടാകും. ഏകദേശം നൂറു വർഷം വരെ ജീവിക്കാൻ ശേഷിയുള്ള സ്റ്റർജൻ മത്സ്യങ്ങളുടെ ആയുസും അതിശയിപ്പിക്കുന്നതാണ്.
സ്റ്റർജൻ കുടുംബത്തിലെ ബെലൂഗ ഇനമാണ് ലോകത്തിലെ ഏറ്റവും വിലപിടിപ്പുള്ള ഭക്ഷ്യവിഭവങ്ങളിലൊന്നായ കാവിയാറിന്റെ ഉറവിടം. ബെലൂഗയുടെ മാംസത്തേക്കാൾ ആവശ്യക്കാർ ഏറെയുള്ളത് പെൺമത്സ്യങ്ങളുടെ മുട്ടകൾക്കാണ്. ബെലൂഗ കാവിയാർ എന്നറിയപ്പെടുന്ന ഈ മുട്ടകൾക്ക് വിപണിയിൽ വൻ വിലയാണ്. 100 ഗ്രാമിന് ഏകദേശം 60,000 രൂപ വരെ വില ലഭിക്കാറുണ്ട്. അമേരിക്കയിൽ കൃഷി ചെയ്യുന്ന ബെലൂഗ കാവിയാറിന്റെ ഒരു ഔൺസിന് ഏകദേശം 770 ഡോളർ അഥവാ 66,068 രൂപ വരെ വിലയുണ്ട്. അപൂർവതയും ഉൽപാദനത്തിനെടുക്കുന്ന ദീർഘകാലവുമാണ് ഇത്രയും ഉയർന്ന വിലയ്ക്ക് പ്രധാന കാരണം.
എന്നാൽ കാവിയാറിനോടുള്ള ലോകത്തിന്റെ അമിതമായ താൽപര്യം സ്റ്റർജൻ മത്സ്യങ്ങളുടെ നിലനിൽപ്പിന് വലിയ ഭീഷണിയായി മാറിയിട്ടുണ്ട്. പെൺ സ്റ്റർജൻ മത്സ്യങ്ങൾക്ക് പൂർണ വളർച്ചയെത്തി മുട്ടയിടാൻ പ്രാപ്തമാകാൻ എട്ടു മുതൽ 20 വർഷം വരെ വേണ്ടിവരും. ഇത്രയും നീണ്ട വളർച്ചാകാലവും അമിതമായ വേട്ടയാടലും ചേർന്നതോടെ ഇവയുടെ എണ്ണം ഗണ്യമായി കുറഞ്ഞു. ഇന്ന് കടുത്ത വംശനാശ ഭീഷണി നേരിടുന്ന മത്സ്യങ്ങളുടെ പട്ടികയിലാണ് സ്റ്റർജൻ ഉൾപ്പെടുന്നത്. യൂറോപ്പിൽ കാസ്പിയൻ കടലിലും കരിങ്കടൽ മേഖലയിലുമാണ് ഇവയെ പ്രധാനമായും കണ്ടുവരുന്നത്.
ബെലൂഗ കാവിയാറിന്റെ ആഗോള ജനപ്രീതി ഒരുകാലത്ത് ഈ മത്സ്യങ്ങളെ വ്യാപകമായി വേട്ടയാടുന്നതിലേക്ക് നയിച്ചു. മുട്ടകൾ ശേഖരിക്കുന്നതിനായി പെൺമത്സ്യങ്ങളെ കൊന്നൊടുക്കിയിരുന്നതും വംശനാശഭീഷണി രൂക്ഷമാക്കി. എന്നാൽ സാങ്കേതികവിദ്യയുടെ വളർച്ചയോടെ മത്സ്യങ്ങളെ കൊല്ലാതെ മുട്ടകൾ ശേഖരിക്കാനുള്ള രീതികൾ ഇന്ന് വികസിച്ചിട്ടുണ്ട്. ഇതിനു പുറമേ, നിയന്ത്രിത സാഹചര്യങ്ങളിൽ സ്റ്റർജൻ മത്സ്യങ്ങളെ വളർത്തുന്ന ഫാമുകളും വിവിധ രാജ്യങ്ങളിൽ പ്രവർത്തനം ആരംഭിച്ചു.
ഒരുകാലത്ത് ലോകത്ത് ഉപയോഗിച്ചിരുന്ന ബെലൂഗ കാവിയാറിന്റെ 80 ശതമാനവും ഇറക്കുമതി ചെയ്തിരുന്ന അമേരിക്ക 2005-ൽ ഇതിന്റെ ഇറക്കുമതി നിരോധിച്ചു. തുടർന്ന് രാജ്യത്തിനകത്തും ബെലൂഗ മത്സ്യകൃഷിയും കാവിയാർ ഉൽപാദനവും വ്യാപകമായി. കോടിക്കണക്കിന് വർഷങ്ങളുടെ ചരിത്രം പേറുന്ന ഈ മത്സ്യങ്ങൾ ഇന്ന് മനുഷ്യന്റെ ആഡംബരഭക്ഷണശീലങ്ങളുടെ പേരിൽ നിലനിൽപ്പിനായി പോരാടുകയാണ്. ലോകത്തിലെ ഏറ്റവും വിലപിടിപ്പുള്ള ഭക്ഷ്യവിഭവങ്ങളിലൊന്നായി ബെലൂഗ കാവിയാർ തുടരുമ്പോഴും, അതിന്റെ ഉറവിടമായ മത്സ്യങ്ങളെ സംരക്ഷിക്കുകയെന്നത് അതിലേറെ പ്രധാനപ്പെട്ട ഉത്തരവാദിത്തമായി മാറുന്നു.
ASSOCIATION
യുകെ മലയാളികളുടെ കലാസാംസ്കാരിക ഉത്സവമായ പതിനേഴാമത് യുക്മ ദേശീയ കലാമേളയിൽ 195 പോയിന്റുകൾ നേടി മിഡ്‌ലാൻഡ്സ് റീജിയൻ ഓവറോൾ ചാമ്പ്യൻഷിപ്പ് സ്വന്തമാക്കി. 143 പോയിന്റുകളുമായി യോർക്ക്‌ഷെയർ ആൻഡ് ഹംബർ റീജിയൻ രണ്ടാം സ്ഥാനവും 98 പോയിന്റുകളുമായി നോർത്ത് വെസ്റ്റ് റീജിയൻ മൂന്നാം സ്ഥാനവും കരസ്ഥമാക്കി.
അസോസിയേഷൻ തലത്തിൽ 89 പോയിന്റുകൾ നേടി വാർവിക് ആൻഡ് ലീമിങ്ടൺ മലയാളി അസോസിയേഷൻ ഓവറോൾ ചാമ്പ്യന്മാരായി. ഈസ്റ്റ് യോർക്ക്‌ഷെയർ കൾച്ചറൽ ഓർഗനൈസേഷൻ 55 പോയിന്റുകളുമായി രണ്ടാം സ്ഥാനത്തും ലെസ്റ്റർ കേരള കമ്മ്യൂണിറ്റി 45 പോയിന്റുകളുമായി മൂന്നാം സ്ഥാനത്തുമെത്തി.
നവംബർ ഏഴിന് ഗ്ലോസ്റ്റർഷെയറിലെ ചെൽറ്റൻഹാം ക്ലീവ് സ്കൂളിൽ പ്രത്യേകം സജ്ജീകരിച്ച സലിംകുമാർ നഗറിൽ നടന്ന കലാമേള, മത്സരങ്ങളുടെ നിലവാരത്തിലും സമയനിഷ്ഠയിലും സംഘാടനമികവിലും ശ്രദ്ധേയമായി.
കലാമേള ജേതാക്കൾ — ആദ്യ മൂന്ന് സ്ഥാനങ്ങൾ
സ്ഥാനം : (റീജിയൻ - പോയിന്റ്)
ഒന്നാം സ്ഥാനം:
മിഡ്‌ലാൻഡ്സ് റീജിയൻ - 195
രണ്ടാം സ്ഥാനം:
യോർക്ക്‌ഷെയർ ആൻഡ് ഹംബർ റീജിയൻ - 143
മൂന്നാം സ്ഥാനം:
നോർത്ത് വെസ്റ്റ് റീജിയൻ - 98
മത്സരങ്ങളുടെ തുടക്കം മുതൽ വിവിധ വിഭാഗങ്ങളിൽ മികച്ച പ്രകടനം കാഴ്ചവെച്ച മിഡ്‌ലാൻഡ്സ് റീജിയൻ, വ്യക്തമായ പോയിന്റ് വ്യത്യാസത്തോടെ ചാമ്പ്യൻഷിപ്പ് സ്വന്തമാക്കുകയായിരുന്നു.
അസോസിയേഷൻ ചാമ്പ്യൻഷിപ്പ് — ആദ്യ ആറ് സ്ഥാനങ്ങൾ
സ്ഥാനം : അസോസിയേഷൻ - പോയിന്റ്
ഒന്നാം സ്ഥാനം:
വാർവിക് ആൻഡ് ലീമിങ്ടൺ മലയാളി അസോസിയേഷൻ - 89
രണ്ടാം സ്ഥാനം: ഈസ്റ്റ് യോർക്ക്‌ഷെയർ കൾച്ചറൽ ഓർഗനൈസേഷൻ - 55
മൂന്നാം സ്ഥാനം: ലെസ്റ്റർ കേരള കമ്മ്യൂണിറ്റി - 45
നാലാം സ്ഥാനം (സംയുക്തം): മാഞ്ചസ്റ്റർ മലയാളി അസോസിയേഷൻ - 41
നാലാം സ്ഥാനം (സംയുക്തം): ഷെഫീൽഡ് കേരള കൾച്ചറൽ അസോസിയേഷൻ - 41
അഞ്ചാം സ്ഥാനം: ബ്രൈറ്റൺ മലയാളി അസോസിയേഷൻ - 32
ആറാം സ്ഥാനം: മലയാളി അസോസിയേഷൻ ഓഫ് സ്‌റ്റോക്പോർട്ട് - 31.
വാർവിക് ആൻഡ് ലീമിങ്ടൺ മലയാളി അസോസിയേഷന്റെ മത്സരാർത്ഥികൾ വിവിധ വിഭാഗങ്ങളിൽ നടത്തിയ മികച്ച പ്രകടനമാണ് അസോസിയേഷൻ ചാമ്പ്യൻഷിപ്പിലേക്ക് നയിച്ചത്.
കലാതിലകം, കലാപ്രതിഭ, നാട്യമയൂരം, ഭാഷാകേസരി പുരസ്കാരങ്ങൾ.
ദേശീയ കലാമേളയിലെ വ്യക്തിഗത മികവിനുള്ള പ്രത്യേക അംഗീകാരങ്ങളും ശ്രദ്ധേയമായി.
കലാതിലകം:
അമേയ കൃഷ്ണ നിധീഷ്: വാർവിക് ആൻഡ് ലീമിങ്ടൺ മലയാളി അസോസിയേഷൻ — 15 പോയിന്റ്.
കലാപ്രതിഭ:
കലാപ്രതിഭയായി ഒരേ പോയിൻ്റോടെ ബെഡ്ഫോർഡ് മാർസ്റ്റൻ കേരള അസോസിയേഷനിലെ കരൺ ജയശങ്കർ ഷെലിൻ, ഹെറിഫോർഡ് മലയാളി അസോസിയേഷനിലെ ആൻസൻ ബിനോയ് എന്നിവർ സംയുക്ത വിജയികളായി. 8 പോയിൻ്റ് വീതം കരസ്ഥമാക്കിയാണ് ഇവർ കലാപ്രതിഭ പട്ടം കരസ്ഥമാക്കിയത്.
നാട്യമയൂരം:
ഐശ്വര്യ വിനു നായർ (കവൻട്രി കേരള കമ്മ്യൂണിറ്റി — 13 പോയിന്റ്)
ഭാഷാകേസരി:
ഡിയോൺ ടിജു (ഐ.എം.എ. ബാൻബറി — 6 പോയിന്റ്), ആൻ ട്രീസ ജോബി (വിഗൻ മലയാളി അസോസിയേഷൻ - 6 പൊയിൻ്റ്) എന്നിവർ ഭാഷാകേസരിപ്പട്ടം കരസ്ഥമാക്കി.
വിവിധ പ്രായവിഭാഗങ്ങളിലെ വ്യക്തിഗത ചാമ്പ്യന്മാർ
വിഭാഗം : ചാമ്പ്യൻ (അസോസിയേഷൻ - പോയിന്റ്)
കിഡ്സ് :
സെറാ മരിയ ജയലേഷ്, (മാഞ്ചസ്റ്റർ മലയാളി അസോസിയേഷൻ - 6)
സബ് ജൂനിയേഴ്സ്:
അമേയ കൃഷ്ണ നിധീഷ് (വാർവിക് ആൻഡ് ലീമിങ്ടൺ മലയാളി അസോസിയേഷൻ - 15)
ജൂനിയേഴ്സ്
അമേയ അഭിഷേക് (വാർവിക് ആൻഡ് ലീമിങ്ടൺ മലയാളി അസോസിയേഷൻ - 11)
സീനിയേഴ്സ്:
ഐശ്വര്യ വിനു നായർ (കവൻട്രി കേരള കമ്മ്യൂണിറ്റി - 13)
വിവിധ പ്രായവിഭാഗങ്ങളിലെ മത്സരാർത്ഥികൾ സംഗീതം, നൃത്തം, സാഹിത്യം, മറ്റ് കലാരൂപങ്ങൾ എന്നിവയിൽ പ്രകടിപ്പിച്ച കഴിവുകൾ ദേശീയ കലാമേളയ്ക്ക് മാറ്റുകൂട്ടി.
രാവിലെ കൃത്യം 9.30ന് ഏഴ് വേദികളിലും മത്സരങ്ങൾക്ക് തുടക്കം
സംഘാടനമികവിലും സമയനിഷ്ഠയിലും ഇത്തവണത്തെ ദേശീയ കലാമേള പ്രത്യേക ശ്രദ്ധ നേടി.
നവംബർ ഏഴിന് രാവിലെ കൃത്യം 9.30ന് ഏഴ് മത്സരവേദികളിലും ഒരേസമയം മത്സരങ്ങൾ ആരംഭിച്ചു. മുൻകൂട്ടി തയ്യാറാക്കിയ മത്സരക്രമവും വേദികളുടെ ഏകോപനവും സ്റ്റേജ് മാനേജ്മെന്റ് സംവിധാനങ്ങളും മത്സരങ്ങൾ സുഗമമായി മുന്നോട്ടുകൊണ്ടുപോകാൻ സഹായിച്ചു.
യുകെയിലെ ഏഴ് റീജിയണുകളിൽ നടന്ന റീജിയണൽ കലാമേളകളിൽ ഓരോ മത്സരയിനത്തിലും ഒന്നും രണ്ടും സ്ഥാനങ്ങൾ നേടിയ പ്രതിഭകളാണ് ദേശീയ കലാമേളയിൽ മാറ്റുരയ്ക്കാനെത്തിയത്.
അഞ്ച് പ്രായവിഭാഗങ്ങളിലായി 46 മത്സരയിനങ്ങളാണ് ദേശീയ കലാമേളയിൽ സംഘടിപ്പിച്ചത്.
കേരളത്തിലെ സംസ്ഥാന സ്കൂൾ കലോത്സവത്തിന്റെ മാതൃകയിൽ മത്സരക്രമവും വിധിനിർണയ സംവിധാനങ്ങളും വേദികളുടെ പ്രവർത്തനവും ക്രമീകരിച്ച കലാമേള, പ്രവാസലോകത്ത് കേരളത്തിന്റെ കലോത്സവ പാരമ്പര്യം നിലനിർത്തുന്ന വലിയൊരു സാംസ്കാരിക സംഗമമായി മാറി.
നൂറുകണക്കിന് മത്സരാർത്ഥികളും രക്ഷിതാക്കളും അധ്യാപകരും കലാപ്രേമികളും വിവിധ റീജിയണുകളിൽനിന്ന് ചെൽറ്റൻഹാമിലെത്തിയിരുന്നു.
വൈകിട്ട് 7.15ന് പ്രധാന വേദിയിലെ പരിപാടികൾ പൂർത്തിയായി; രാത്രി എട്ടിന് സമ്മാനദാനം
രാവിലെ ആരംഭിച്ച മത്സരങ്ങളും പ്രധാന വേദിയിലെ പരിപാടികളും മുൻകൂട്ടി നിശ്ചയിച്ച സമയക്രമത്തിനനുസരിച്ച് പൂർത്തിയാക്കാൻ സംഘാടകർക്ക് കഴിഞ്ഞു. വൈകിട്ട് കൃത്യം 7.15ന് പ്രധാന വേദിയിലെ പരിപാടികൾ സമാപിച്ചു. രാത്രി എട്ടുമണിക്ക് സമ്മാനദാനച്ചടങ്ങുകൾ ആരംഭിച്ചു.
വിജയികൾക്കുള്ള ട്രോഫികളും പുരസ്കാരങ്ങളും വിതരണം ചെയ്ത് തുടങ്ങിയതോടെ കലാമേളയുടെ ആവേശം അതിന്റെ ഉച്ചസ്ഥായിയിലെത്തി.രാത്രി 11.30ഓടെ മത്സരാർത്ഥികളും രക്ഷിതാക്കളും സംഘാടകരും ഉൾപ്പെടെ എല്ലാവരും വേദിയും പരിസരവും വിട്ടുപോയി.
നൂറുകണക്കിന് മത്സരാർത്ഥികളും ആയിരക്കണക്കിന് സന്ദർശകരും പങ്കെടുക്കുന്ന വിപുലമായ പരിപാടി കൃത്യമായ സമയക്രമത്തിൽ നടത്താൻ കഴിഞ്ഞത് സംഘാടക സമിതിയുടെയും വോളണ്ടിയർമാരുടെയും കൂട്ടായ പരിശ്രമത്തിന്റെ നേട്ടമായി.
യുക്മയുടെ കൂട്ടായ്മയുടെ വിജയം
യുക്മ ദേശീയ പ്രസിഡന്റ് അഡ്വ. എബി സെബാസ്റ്റ്യൻ, ദേശീയ ജനറൽ സെക്രട്ടറി ജയകുമാർ നായർ, ട്രഷറർ ഷീജോ വർഗീസ്, ദേശീയ കലാമേള കൺവീനറും വൈസ് പ്രസിഡന്റുമായ വർഗീസ് ഡാനിയൽ, വൈസ് പ്രസിഡന്റ് സ്മിത തോട്ടം, ജോയിന്റ് സെക്രട്ടറിമാരായ സണ്ണിമോൻ മത്തായി, റെയ്മോൾ നിധീരി, ജോയിന്റ് ട്രഷറർ പീറ്റർ താണോലിൽ എന്നിവരുടെയും ദേശീയ സമിതി അംഗങ്ങളുടെയും നേതൃത്വത്തിലാണ് കലാമേള സംഘടിപ്പിച്ചത്.
ഡോ. ബിജു പെരിങ്ങത്തറ, കുര്യൻ ജോർജ്ജ്, മനോജ് പിള്ള, അലക്സ് വർഗീസ്, സുജു ജോസഫ്, ഡിക്സ് ജോർജ്ജ്, ബിജു പീറ്റർ, ഷാജി വരാക്കുടി, സുനിൽ ജോർജ്ജ്, ജോഷി തോമസ്, ബെന്നി അഗസ്റ്റിൻ, സുരേന്ദ്രൻ ആരക്കോട്ട്, ജിപ്സൺ തോമസ്, രാജേഷ് രാജ്, ജോബി പുതുക്കുളങ്ങര, ജോർജ്ജ് തോമസ്, അമ്പിളി സെബാസ്റ്റ്യൻ, ജോസ് വർഗീസ്, ജോബിൻ ജോർജ്ജ്, ജെയ്സൺ ചാക്കോച്ചൻ, എബ്രഹാം പൊന്നുംപുരയിടം, ജോബി തോമസ്, ഭുവനേഷ് പീതാംബരൻ, സാംസൺ പോൾ, ലൂയീസ് മേനാച്ചേരി, സനോജ് വർഗ്ഗീസ്, അജു തോമസ്, തേജു മാത്യൂസ്, ബേബി വർഗ്ഗീസ്, ടോംബിൽ കണ്ണത്ത്, പോൾ ജോസഫ്, ഡോ. ശീതൾ മാർക്ക് എന്നിവരുടെ നേതൃത്വത്തിൽ റീജിയണൽ ഭാരവാഹികളും ഗ്ളോസ്റ്റർഷയർ മലയാളി അസോസിയേഷൻ ഭാരവാഹികളും ഉൾപ്പെട്ട നേതൃനിര വിവിധ പ്രവർത്തനങ്ങൾക്ക് നേതൃത്വം നൽകി.
യുക്മ സൗത്ത് വെസ്റ്റ് റീജിയണിന്റെ ആതിഥേയത്വത്തിൽ നടന്ന ദേശീയ കലാമേളയുടെ വിജയത്തിനായി പ്രവർത്തിച്ച സ്റ്റേജ് മാനേജർമാർ, വിധികർത്താക്കൾ, രജിസ്ട്രേഷൻ ടീം, റിസൾട്ട് ടീം, ലൈറ്റ് ആൻഡ് സൗണ്ട് പ്രവർത്തകർ, മീഡിയ ടീം, ഫോട്ടോഗ്രാഫർമാർ, ഹോസ്പിറ്റാലിറ്റി ടീം, സുരക്ഷാ പ്രവർത്തകർ, മറ്റ് വോളണ്ടിയർമാർ എന്നിവരുടെ സേവനവും ശ്രദ്ധേയമായി.
ടൈറ്റിൽ സ്പോൺസറായ ലൈഫ്‌ലൈൻ പ്രൊട്ടക്ട്, കോ-സ്പോൺസറായ കാർഗോഫോഴ്സ്, പോൾ ജോൺ & കോ സോളിസിറ്റേഴ്‌സ്, ഐസ ലണ്ടൻ, തെരേസാസ് ലണ്ടൻ, LTC ഗ്ളോബൽ, ഏലൂർ കൺസൽട്ടൻസി, മുത്തൂറ്റ് ഗ്രൂപ്പ്, ഇൻഫിൻ ടൂർസ് & ട്രാവൽസ്, മട്ടാഞ്ചേരി ടോണ്ടൻ, വാക്ക് വിത്ത് എയ്ഞ്ചൽ, JMP സോഫ്‌റ്റ് വെയർ, കേരള ഡിലൈറ്റ്സ് എന്നിവരുൾപ്പെടെയുള്ള സ്പോൺസർമാരുടെ പിന്തുണയും കലാമേളയുടെ വിജയത്തിന് കരുത്തായി.
ഓർമ്മകളിൽ നിറഞ്ഞുനിൽക്കുന്ന കലാമാമാങ്കം
കേരളത്തിന്റെ കലയും സംസ്കാരവും പുതുതലമുറയിലേക്ക് പകർന്നുനൽകുകയെന്ന ലക്ഷ്യത്തോടെ യുക്മ സംഘടിപ്പിക്കുന്ന ദേശീയ കലാമേള, ഈ വർഷവും പ്രവാസി മലയാളികളുടെ കലാപ്രതിഭയും കൂട്ടായ്മയും പ്രകടമാക്കിയ വേദിയായി.
മത്സരാർത്ഥികളുടെ കലാമികവ്, രക്ഷിതാക്കളുടെയും അധ്യാപകരുടെയും പിന്തുണ, റീജിയണുകളുടെയും അസോസിയേഷനുകളുടെയും സജീവ പങ്കാളിത്തം, സംഘാടക സമിതിയുടെ കൃത്യമായ ആസൂത്രണം — ഇവയെല്ലാം ചേർന്നാണ് പതിനേഴാമത് യുക്മ ദേശീയ കലാമേളയെ ശ്രദ്ധേയമാക്കിയത്.
രാവിലെ 9.30ന് ഏഴ് വേദികളിലായി ആരംഭിച്ച് വൈകിട്ട് 7.15ന് പ്രധാന വേദിയിലെ പരിപാടികൾ പൂർത്തിയാക്കി, രാത്രി എട്ടിന് സമ്മാനദാനം ആരംഭിച്ച് 11.30ഓടെ എല്ലാവരും വേദി വിട്ടുപോയ കലാമേള, സമയനിഷ്ഠയുടെയും സംഘാടനമികവിന്റെയും മികച്ച ഉദാഹരണമായി.
വിജയികൾക്ക് അഭിമാനവും മറ്റ് മത്സരാർത്ഥികൾക്ക് പുതിയ പ്രചോദനവും സമ്മാനിച്ച പതിനേഴാമത് യുക്മ ദേശീയ കലാമേള, ചെൽറ്റൻഹാമിൽ ഒത്തുചേർന്ന മലയാളി കുടുംബങ്ങൾക്ക് മറക്കാനാവാത്ത ഒരു കലോത്സവദിനമായി മാറി.
ചെൽറ്റൻഹാം, നവംബർ 7: കേരളത്തിന്റെ അഭിമാനമായ രാജ്യാന്തര ചലച്ചിത്രമേളയുടെ (International Film Festival of Kerala – IFFK) മാതൃകയിൽ യുകെയിൽ ‘മിനി ഐ.എഫ്.എഫ്.കെ’ സംഘടിപ്പിക്കുന്നതിന് കേരള സർക്കാർ മുൻകൈയെടുക്കുമെന്ന് കേരള സാംസ്കാരിക, സിനിമ, ടൂറിസം വകുപ്പ് മന്ത്രി ശ്രീ. പി. സി. വിഷ്ണുനാഥ് പ്രഖ്യാപിച്ചു. ഈ വർഷം ഡിസംബറിൽ തിരുവനന്തപുരത്ത് നടക്കുന്ന ഐ.എഫ്.എഫ്.കെ.യ്ക്ക് ശേഷം യുക്മയുമായി സഹകരിച്ച് ബ്രിട്ടനിൽ മിനി ചലച്ചിത്രമേള സംഘടിപ്പിക്കുന്നതിനുള്ള നടപടികൾ ആരംഭിക്കുമെന്നാണ് മന്ത്രി അറിയിച്ചത്.
ചെൽറ്റൻഹാമിലെ ക്ലീവ് സ്കൂളിൽ പ്രത്യേകം സജ്ജീകരിച്ച സലിംകുമാർ നഗറിൽ നടന്ന പതിനേഴാമത് യുക്മ ദേശീയ കലാമേളയുടെ ഔദ്യോഗിക ഉദ്ഘാടനം നിർവഹിച്ച് സംസാരിക്കവെയാണ് യുകെയിലെ മലയാളി സമൂഹത്തിന് ഏറെ പ്രതീക്ഷ നൽകുന്ന സുപ്രധാന പ്രഖ്യാപനങ്ങൾ മന്ത്രി നടത്തിയത്. കേരളാ സർക്കാർ യുക്മയുമായി ചേർന്ന് നിരവധി സാംസ്കാരിക പരിപാടികൾ യുകെയിൽ സംഘടിപ്പിക്കുമെന്ന് മന്ത്രി തൻ്റെ ഉദ്ഘാടന പ്രസംഗത്തിൽ കലാമേളയുടെ ഉദ്ഘാടന സദസിൽ തിങ്ങിനിറഞ്ഞ കാണികളെ അറിയിച്ചു.
യുകെയിൽ മലയാള സിനിമയുടെയും ലോകസിനിമയുടെയും മികച്ച സൃഷ്ടികൾ പരിചയപ്പെടുത്താനും കേരളത്തിന്റെ ചലച്ചിത്ര സംസ്കാരത്തെ അന്താരാഷ്ട്ര തലത്തിൽ കൂടുതൽ വ്യാപിപ്പിക്കാനും ലക്ഷ്യമിടുന്ന മിനി ഐ.എഫ്.എഫ്.കെ. പദ്ധതി, കേരളവും ബ്രിട്ടനിലെ മലയാളി സമൂഹവും തമ്മിലുള്ള സാംസ്കാരിക ബന്ധത്തിൽ പുതിയൊരു അധ്യായത്തിന് വഴിയൊരുക്കും.
യുക്മ ദേശീയ കലാമേള ലോക പ്രവാസി മലയാളികൾക്ക് മാതൃകയെന്ന് മന്ത്രി
കേരളത്തിന്റെ കലയും സംസ്കാരവും പൈതൃകവും ബ്രിട്ടനിലെ പുതുതലമുറയിലേക്ക് പകർന്നുനൽകുന്നതിൽ യുക്മ നടത്തുന്ന പ്രവർത്തനങ്ങളെ മന്ത്രി പി. സി. വിഷ്ണുനാഥ് പ്രത്യേകം അഭിനന്ദിച്ചു.
കേരളത്തിൽനിന്ന് ആയിരക്കണക്കിന് കിലോമീറ്ററുകൾ അകലെ, ബ്രിട്ടന്റെ മണ്ണിൽ കേരളത്തിന്റെ തനത് കലാരൂപങ്ങളും സംഗീതവും നൃത്തവും സാഹിത്യവും ആഘോഷിക്കുന്നതിനും അവയ്ക്ക് വലിയൊരു മത്സരവേദി ഒരുക്കുന്നതിനും യുക്മ കാണിക്കുന്ന പ്രതിബദ്ധത പ്രശംസനീയമാണെന്ന് മന്ത്രി അഭിപ്രായപ്പെട്ടു.
യുക്മ ദേശീയ കലാമേള യുകെയിലെ മലയാളികൾക്ക് മാത്രമല്ല, ലോകത്തിന്റെ വിവിധ രാജ്യങ്ങളിൽ പ്രവർത്തിക്കുന്ന എല്ലാ പ്രവാസി മലയാളി സംഘടനകൾക്കും പിന്തുടരാവുന്ന മാതൃകയാണെന്നും മന്ത്രി ചൂണ്ടിക്കാട്ടി.
പ്രവാസജീവിതത്തിന്റെ തിരക്കുകൾക്കിടയിലും സ്വന്തം ഭാഷയും സംസ്കാരവും സംരക്ഷിക്കുന്നതിനും പുതുതലമുറയ്ക്ക് പകർന്നുനൽകുന്നതിനും യുക്മ നടത്തുന്ന പ്രവർത്തനങ്ങൾ കേരളത്തിന് അഭിമാനകരമാണെന്നും മന്ത്രി പറഞ്ഞു.
ഏഴ് റീജിയണുകളിൽനിന്നായി നൂറുകണക്കിന് കുട്ടികളും യുവജനങ്ങളും പങ്കെടുക്കുന്ന ദേശീയ കലാമേളയുടെ സംഘാടക മികവും കലാപ്രതിഭകളുടെ പങ്കാളിത്തവും പ്രത്യേകം പ്രശംസിച്ച മന്ത്രി, ഇത്തരം കലാസാംസ്കാരിക കൂട്ടായ്മകൾ ലോകമെമ്പാടുമുള്ള മലയാളികൾക്ക് പ്രചോദനമാകണമെന്നും അഭിപ്രായപ്പെട്ടു.
അടുത്ത ഓണക്കാലത്ത് കേരള സർക്കാരിന്റെ ഏകോപനത്തിൽ യുകെയിൽ വിപുലമായ ഓണാഘോഷം
യുകെയിലെ മലയാളികൾക്ക് സന്തോഷം പകരുന്ന മറ്റൊരു പ്രഖ്യാപനവും മന്ത്രി നടത്തി.
2027ലെ ഓണക്കാലത്ത് കേരള സർക്കാരിന്റെ ഏകോപനത്തോടെ യുകെയിൽ വിപുലമായ ഓണാഘോഷം സംഘടിപ്പിക്കുന്നതിനുള്ള നടപടികൾ സ്വീകരിക്കുമെന്ന് മന്ത്രി അറിയിച്ചു.
കേരളത്തിന്റെ ദേശീയോത്സവമായ ഓണത്തെ പ്രവാസലോകത്തും കൂടുതൽ വിപുലമായ രീതിയിൽ ആഘോഷിക്കുന്നതിനും കേരളീയ കലാരൂപങ്ങൾക്കും സാംസ്കാരിക പരിപാടികൾക്കും അന്താരാഷ്ട്ര വേദിയൊരുക്കുന്നതിനും ലക്ഷ്യമിട്ടാണ് ഈ പദ്ധതി.
കേരളത്തിന്റെ സാംസ്കാരിക പൈതൃകവും പ്രവാസി മലയാളികളുടെ കൂട്ടായ്മയും കൂടുതൽ ശക്തിപ്പെടുത്തുന്ന ഇത്തരം പരിപാടികൾക്ക് സർക്കാർ പിന്തുണ നൽകുമെന്ന മന്ത്രിയുടെ പ്രഖ്യാപനം യുകെയിലെ മലയാളി സമൂഹത്തിന് ആവേശം പകരുന്നതായി.
ലോകമെമ്പാടുമുള്ള പ്രവാസി മലയാളികൾ കേരള ടൂറിസത്തിന്റെ അംബാസഡർമാരാകണം
കേരളത്തിന്റെ ടൂറിസം മേഖലയെ അന്താരാഷ്ട്ര തലത്തിൽ കൂടുതൽ ശക്തിപ്പെടുത്തുന്നതിൽ പ്രവാസി മലയാളികൾക്ക് നിർണായക പങ്കുവഹിക്കാൻ കഴിയുമെന്നും മന്ത്രി വ്യക്തമാക്കി.
ലോകത്തിന്റെ വിവിധ രാജ്യങ്ങളിൽ ജീവിക്കുന്ന ഓരോ പ്രവാസി മലയാളിയെയും കേരളത്തിന്റെ ടൂറിസം അംബാസഡറായി മാറ്റുക എന്ന ലക്ഷ്യത്തോടെ പുതിയ പദ്ധതികൾക്ക് രൂപം നൽകുമെന്നും മന്ത്രി അറിയിച്ചു.
കേരളത്തിന്റെ പ്രകൃതിസൗന്ദര്യം, പൈതൃകം, കല, സംസ്കാരം, ആയുർവേദം, ഭക്ഷണവൈവിധ്യം, വിനോദസഞ്ചാര കേന്ദ്രങ്ങൾ എന്നിവയെ ലോകത്തിന് പരിചയപ്പെടുത്തുന്നതിൽ പ്രവാസി മലയാളികൾക്ക് വലിയ പങ്കുവഹിക്കാൻ കഴിയുമെന്ന് മന്ത്രി ചൂണ്ടിക്കാട്ടി.
കേരളത്തിലേക്ക് കൂടുതൽ അന്താരാഷ്ട്ര വിനോദസഞ്ചാരികളെ ആകർഷിക്കുന്നതിനും കേരള ടൂറിസത്തിന്റെ ആഗോള പ്രചാരണം ശക്തിപ്പെടുത്തുന്നതിനും പ്രവാസി മലയാളി സമൂഹത്തിന്റെ സഹകരണം പ്രയോജനപ്പെടുത്തുന്ന പദ്ധതികളാണ് സർക്കാർ ലക്ഷ്യമിടുന്നത്. കേരളത്തിന്റെ ടൂറിസം സാധ്യതകൾ ബ്രിട്ടനിലും മറ്റ് രാജ്യങ്ങളിലും കൂടുതൽ ഫലപ്രദമായി അവതരിപ്പിക്കുന്നതിൽ യുക്മ പോലുള്ള സംഘടനകളുടെ പങ്കാളിത്തം ഏറെ പ്രാധാന്യമുള്ളതാണെന്നും മന്ത്രി അഭിപ്രായപ്പെട്ടു.
നിലവിളക്ക് കൊളുത്തി പതിനേഴാമത് യുക്മ ദേശീയ കലാമേള ഉദ്ഘാടനം ചെയ്തു
യുകെ മലയാളികളുടെ ഏറ്റവും വലിയ കലാസാംസ്കാരിക സംഗമങ്ങളിലൊന്നായ പതിനേഴാമത് യുക്മ ദേശീയ കലാമേള മന്ത്രി പി. സി. വിഷ്ണുനാഥ് പരമ്പരാഗത നിലവിളക്ക് കൊളുത്തി ഔദ്യോഗികമായി ഉദ്ഘാടനം ചെയ്തു.
ഉച്ചയ്ക്ക് 12.30ന് കലാമേള വേദിയിലെത്തിയ മന്ത്രിയെയും സെലിബ്രിറ്റി അതിഥിയായ യുവഗായിക സൗപർണിക നായരെയും യുക്മ ദേശീയ ഭാരവാഹികളുടെ നേതൃത്വത്തിൽ ഊഷ്മളമായി സ്വീകരിച്ച് പ്രധാന വേദിയിലേക്ക് ആനയിച്ചു.
യുക്മ ദേശീയ കലാമേള കൺവീനറും ദേശീയ വൈസ് പ്രസിഡന്റുമായ വർഗീസ് ഡാനിയൽ മന്ത്രിയെ പൊന്നാട അണിയിച്ച് ആദരിച്ചു.
തുടർന്ന് നടന്ന ഔദ്യോഗിക ഉദ്ഘാടനച്ചടങ്ങിൽ യുക്മ ദേശീയ ജനറൽ സെക്രട്ടറി ജയകുമാർ നായർ ഏവരേയും സ്വാഗതം ചെയ്യുകയും,
തുടർന്ന് യുക്മ ദേശീയ പ്രസിഡന്റ് അഡ്വ. എബി സെബാസ്റ്റ്യൻ അധ്യക്ഷപ്രസംഗവും നടത്തി.
കേരളത്തിൽനിന്ന് ആയിരക്കണക്കിന് കിലോമീറ്ററുകൾ അകലെ ബ്രിട്ടന്റെ മണ്ണിൽ മലയാളത്തിന്റെ കലയും സംസ്കാരവും പുതുതലമുറയിലേക്ക് പകർന്നുനൽകുന്നതിൽ യുക്മ ദേശീയ കലാമേള വഹിക്കുന്ന പങ്കിന്റെ പ്രാധാന്യം അധ്യക്ഷപ്രസംഗത്തിൽ എടുത്തുപറഞ്ഞു.
യുകെയിലെ ഏഴ് റീജിയണുകളിൽനിന്ന് ദേശീയ വേദിയിലേക്ക് എത്തുന്ന നൂറുകണക്കിന് കലാപ്രതിഭകളുടെ പരിശ്രമവും അവരുടെ കഴിവുകൾക്ക് പിന്തുണ നൽകുന്ന മാതാപിതാക്കളുടെയും അധ്യാപകരുടെയും സമർപ്പണവും കലാമേളയുടെ യഥാർത്ഥ കരുത്താണെന്ന സന്ദേശവും അധ്യക്ഷപ്രസംഗത്തിൽ ഉയർന്നു.
ഉച്ചയ്ക്ക് ഒരു മണിയോടെ നിലവിളക്ക് കൊളുത്തി കലാമേള ഉദ്ഘാടനം ചെയ്ത മന്ത്രി, യുക്മയുടെ കലാസാംസ്കാരിക പ്രവർത്തനങ്ങളെ അഭിനന്ദിക്കുന്നതിനൊപ്പം യുകെയിലെ മലയാളി സമൂഹത്തിന് പ്രതീക്ഷ നൽകുന്ന മിനി ഐ.എഫ്.എഫ്.കെ., ഓണാഘോഷം, ടൂറിസം പദ്ധതികൾ എന്നിവയെക്കുറിച്ചുള്ള പ്രഖ്യാപനങ്ങളും നടത്തി.
സൗപർണിക നായരുടെ മധുരഗാനം ഉദ്ഘാടനച്ചടങ്ങിന് മാറ്റുകൂട്ടി
ബ്രിട്ടൻസ് ഗോട്ട് ടാലന്റ് 2020ലൂടെ അന്താരാഷ്ട്ര ശ്രദ്ധ നേടിയ യുവഗായിക സൗപർണിക നായരുടെ മനോഹരമായ ഗാനാലാപനം ഉദ്ഘാടനച്ചടങ്ങിലെ ശ്രദ്ധേയമായ മുഹൂർത്തമായി.
സെലിബ്രിറ്റി അതിഥിയായി പങ്കെടുത്ത സൗപർണിക നായർ തന്റെ സംഗീതപ്രതിഭയിലൂടെ സദസ്സിന് ഹൃദ്യമായ അനുഭവം സമ്മാനിച്ചു.
ചെറുപ്രായത്തിൽത്തന്നെ ലോകസംഗീതവേദികളിൽ ശ്രദ്ധേയമായ നേട്ടങ്ങൾ കൈവരിച്ച സൗപർണികയുടെ സാന്നിധ്യം ദേശീയ കലാമേളയിൽ പങ്കെടുക്കുന്ന നൂറുകണക്കിന് കുട്ടികൾക്കും യുവകലാപ്രതിഭകൾക്കും പ്രചോദനമായി.
തുടർന്ന് യുക്മ ദേശീയ ട്രഷറർ ഷീജോ വർഗീസ് നന്ദിപ്രകാശനം നടത്തി. വിശിഷ്ടാതിഥികൾക്കുള്ള ഉപഹാരസമർപ്പണവും ഔദ്യോഗിക ഫോട്ടോഗ്രാഫി സെഷനും നടന്നു.
ഏഴ് റീജിയണുകൾ, 750 ഓളം മത്സരാർത്ഥികൾ, 45 മത്സരയിനങ്ങൾ
കേരളത്തിലെ സംസ്ഥാന സ്കൂൾ കലോത്സവത്തിന്റെ മാതൃകയിൽ സംഘടിപ്പിക്കുന്ന പതിനേഴാമത് യുക്മ ദേശീയ കലാമേളയിൽ യുകെയിലെ ഏഴ് റീജിയണുകളിൽനിന്നായി ഏകദേശം 750 മത്സരാർത്ഥികളാണ് അഞ്ച് പ്രായവിഭാഗങ്ങളിലായി 45 മത്സരയിനങ്ങളിൽ ഏഴ് വേദികളിൽ മാറ്റുരച്ചത്.
കിഡ്സ്, സബ് ജൂനിയേഴ്സ്, ജൂനിയേഴ്സ്, സീനിയേഴ്സ്, സൂപ്പർ സീനിയേഴ്സ് എന്നീ വിഭാഗങ്ങളിലായി നടന്ന മത്സരങ്ങൾ കേരളത്തിന്റെ സമ്പന്നമായ കലാസാംസ്കാരിക പാരമ്പര്യത്തിന്റെ നേർക്കാഴ്ചയായി.
യുക്മ സൗത്ത് വെസ്റ്റ് റീജിയണിന്റെ ആതിഥേയത്വത്തിൽ തുടർച്ചയായ അഞ്ചാം വർഷമാണ് ചെൽറ്റൻഹാം ദേശീയ കലാമേളയ്ക്ക് വേദിയായത്.
ദേശീയ പ്രസിഡന്റ് അഡ്വ. എബി സെബാസ്റ്റ്യൻ, ജനറൽ സെക്രട്ടറി ജയകുമാർ നായർ, ട്രഷറർ ഷീജോ വർഗീസ്, കലാമേള കൺവീനർ വർഗീസ് ഡാനിയൽ എന്നിവരുടെ നേതൃത്വത്തിൽ ദേശീയ സമിതിയും റീജിയണൽ നേതൃത്വവും വിവിധ അസോസിയേഷനുകളും വോളണ്ടിയർമാരും ചേർന്നാണ് കലാമേളയുടെ വിപുലമായ ഒരുക്കങ്ങൾ നടത്തിയത്.
കലാമേളയുടെ ടൈറ്റിൽ സ്പോൺസറായ ലൈഫ്‌ലൈൻ പ്രൊട്ടക്ട്, കോ-സ്പോൺസറായ കാർഗോഫോഴ്സ് എന്നിവരുടെയും മറ്റ് സ്പോൺസർമാരുടെയും പിന്തുണ പരിപാടിയുടെ വിജയത്തിന് കരുത്തായി.
കേരളവും യുകെ മലയാളികളും തമ്മിലുള്ള സാംസ്കാരിക സഹകരണത്തിന് പുതിയ സാധ്യതകൾ
യുകെയിൽ മിനി ഐ.എഫ്.എഫ്.കെ., കേരള സർക്കാരിന്റെ ഏകോപനത്തിൽ ഓണാഘോഷം, പ്രവാസി മലയാളികളെ കേരള ടൂറിസത്തിന്റെ ആഗോള അംബാസഡർമാരാക്കുന്ന പദ്ധതികൾ — മന്ത്രി പി. സി. വിഷ്ണുനാഥ് നടത്തിയ ഈ മൂന്ന് പ്രധാന പ്രഖ്യാപനങ്ങളും കേരളവും ബ്രിട്ടനിലെ മലയാളി സമൂഹവും തമ്മിലുള്ള സാംസ്കാരിക, വിനോദസഞ്ചാര സഹകരണത്തിന് പുതിയ സാധ്യതകളാണ് തുറന്നിടുന്നത്.
പ്രവാസലോകത്ത് മലയാളത്തിന്റെ കലാസാംസ്കാരിക പൈതൃകം സംരക്ഷിക്കുന്നതിനും പ്രചരിപ്പിക്കുന്നതിനും യുക്മ നടത്തുന്ന പ്രവർത്തനങ്ങൾക്ക് കേരള സർക്കാരിന്റെ സഹകരണം കൂടുതൽ ശക്തമാകുമെന്ന പ്രതീക്ഷയാണ് ഈ പ്രഖ്യാപനങ്ങൾ ഉയർത്തുന്നത്.
യുക്മ ദേശീയ കലാമേളയുടെ ഉദ്ഘാടനവേദിയിൽനിന്ന് ഉയർന്ന മിനി ഐ.എഫ്.എഫ്.കെ. പ്രഖ്യാപനം, ബ്രിട്ടനിലെ മലയാളി സമൂഹത്തിനും സിനിമാപ്രേമികൾക്കും ഒരുപോലെ ആവേശകരമായ വാർത്തയായി മാറിയിരിക്കുകയാണ്.
കേരളത്തിന്റെ കലയും സിനിമയും സംസ്കാരവും ലോകവേദികളിലേക്ക് കൂടുതൽ വ്യാപിപ്പിക്കുന്നതിൽ യുക്മയ്ക്ക് പുതിയ അവസരങ്ങൾ തുറന്നുകൊടുക്കുന്ന സുപ്രധാന പ്രഖ്യാപനങ്ങൾക്കാണ് ചെൽറ്റൻഹാമിലെ സലിംകുമാർ നഗർ സാക്ഷ്യം വഹിച്ചത്.
ഉദ്ഘാടനച്ചടങ്ങിൽ യുക്മ ദേശീയ വൈസ് പ്രസിഡന്റ് സ്മിത തോട്ടം, ജോയിന്റ് സെക്രട്ടറിമാരായ സണ്ണിമോൻ മത്തായി, റെയ്മോൾ നിധീരി, ജോയിന്റ് ട്രഷറർ പീറ്റർ താണോലിൽ എന്നിവരും മറ്റ് ദേശീയ സമിതി അംഗങ്ങളും വേദിയിൽ സന്നിഹിതരായിരുന്നു.
പതിനേഴാമത് യുക്മ ദേശീയ കലാമേളയുടെ വിജയകരമായ നടത്തിപ്പിന് ഡോ. ബിജു പെരിങ്ങത്തറ, കുര്യൻ ജോർജ്ജ്, മനോജ് പിള്ള, അലക്സ് വർഗീസ്, സുജു ജോസഫ്, ഡിക്സ് ജോർജ്ജ്, സുനിൽ ജോർജ്ജ്, ബിജു പീറ്റർ, ഷാജി തോമസ് വരാക്കുടി, ജോഷി തോമസ്, ബെന്നി അഗസ്റ്റിൻ, സുരേന്ദ്രൻ ആരക്കോട്ട്, ജിപ്സൺ തോമസ്, രാജേഷ് രാജ്, ജോബി പുതുക്കുളങ്ങര, ജോർജ്ജ് തോമസ്, ജോബിൻ ജോർജ്ജ്, ജെയ്സൺ ചാക്കോച്ചൻ, അമ്പിളി സെബാസ്റ്റ്യൻ, ജോസ് വർഗ്ഗീസ്, എബ്രഹാം പൊന്നുംപുരയിടം, ജോബി തോമസ്, ഭുവനേഷ് പീതാംബരൻ, സാംസൺ പോൾ, ലൂയിസ് മേനാച്ചേരി, സനോജ് വർഗ്ഗീസ്, അജു തോമസ്, തേജു മാത്യൂസ്, ബേബി വർഗ്ഗീസ്, ടോംബിൽ കണ്ണത്ത്, പോൾ ജോസഫ്, ഷിൻ്റോ സ്കറിയ, ഡോ.ശീതൾ മാർക്ക്, ജോസഫ് മാത്യു തുടങ്ങിയവർ നേതൃത്വം നൽകി.
ഓവര്‍സീസ് ഫ്രണ്ട്‌സ് ഓഫ് ബിജെപി യുകെ കേരള ഘടകത്തിന്റെയും ബിജെപി പ്രവാസി സെല്‍ (കേരള) യുകെ യൂണിറ്റിന്റെയും സംയുക്താഭിമുഖ്യത്തില്‍ കാര്യകര്‍ത്താ ശില്‍പശാല സംഘടിപ്പിച്ചു. നവംബര്‍ ഏഴിന് ലണ്ടനിലെ വാട്‌ഫോര്‍ഡിലുള്ള ഹോളിറൂഡ് ചര്‍ച്ച് ഹാളില്‍ നടന്ന ശില്‍പശാലയില്‍ യുകെയുടെ വിവിധ ഭാഗങ്ങളില്‍ നിന്നായി എഴുപത്തഞ്ചോളം പ്രവര്‍ത്തകര്‍ പങ്കെടുത്തു.
OFBJP യുകെ നാഷണല്‍ കണ്‍വീനര്‍ ബിക്രം ബാനര്‍ജി, ബിജെപി പ്രവാസി സെല്‍ (കേരള) സംസ്ഥാന കണ്‍വീനര്‍ രമേഷ് മാണിക്കോത്ത് എന്നിവര്‍ ചേര്‍ന്ന് ശില്‍പശാല ഉദ്ഘാടനം ചെയ്തു.
വിദേശരാജ്യങ്ങളിലെ സംഘടനാ പ്രവര്‍ത്തനങ്ങള്‍ കൂടുതല്‍ കാര്യക്ഷമവും സുസംഘടിതവുമാക്കുക എന്ന ലക്ഷ്യത്തോടെയാണ് ശില്‍പശാല സംഘടിപ്പിച്ചത്. സംഘടനയുടെ ലക്ഷ്യങ്ങള്‍, പ്രവര്‍ത്തനരീതികള്‍, ആശയപരമായ അടിത്തറ, സംഘടനാ ഘടന, പ്രവര്‍ത്തകരുടെ ഉത്തരവാദിത്തങ്ങള്‍, പ്രവാസി സമൂഹത്തില്‍ നടത്തേണ്ട ഇടപെടലുകള്‍ തുടങ്ങിയ വിഷയങ്ങളില്‍ വിശദമായ ചര്‍ച്ചകള്‍ നടന്നു.
കേരളത്തില്‍ നിന്നുള്ള മുതിര്‍ന്ന ബിജെപി നേതാക്കളായ സംസ്ഥാന ജനറല്‍ സെക്രട്ടറി അഡ്വ. എസ്. സുരേഷ്, സംസ്ഥാന ജനറല്‍ സെക്രട്ടറിയും സെല്ലുകളുടെ പ്രഭാരിയുമായ അനൂപ് ആന്റണി, സംസ്ഥാന സെല്‍ കോര്‍ഡിനേറ്റര്‍ അഡ്വ. വി. കെ. സജീവന്‍, തിരുവനന്തപുരം മേയര്‍ വി. വി. രാജേഷ് എന്നിവര്‍ ശില്‍പശാലയില്‍ പങ്കുചേര്‍ന്ന് പ്രവര്‍ത്തകര്‍ക്ക് മാര്‍ഗനിര്‍ദേശങ്ങള്‍ നല്‍കി.
ബിജെപി പ്രവാസി സെല്‍ (കേരള) സംസ്ഥാന കണ്‍വീനര്‍ രമേഷ് മാണിക്കോത്ത്, OFBJP യുകെ നാഷണല്‍ കണ്‍വീനര്‍ ബിക്രം ബാനര്‍ജി, മുന്‍ നാഷണല്‍ ജനറല്‍ സെക്രട്ടറി സുരേഷ് മംഗളഗിരി എന്നിവര്‍ ശില്‍പശാലയില്‍ നേരിട്ട് പങ്കെടുത്ത് പ്രവര്‍ത്തകരുമായി സംവദിക്കുകയും അവരുടെ സംശയങ്ങള്‍ക്ക് മറുപടി നല്‍കുകയും ചെയ്തു.
പ്രവാസി മലയാളികള്‍ക്കിടയില്‍ ബിജെപിയുടെ ആശയങ്ങളും സംഘടനാ പ്രവര്‍ത്തനങ്ങളും പരിചയപ്പെടുത്തുന്നതിനുള്ള വിവിധ പ്രവര്‍ത്തനരീതികളെക്കുറിച്ച് നേതാക്കള്‍ വിശദീകരിച്ചു. അന്താരാഷ്ട്ര സമൂഹത്തില്‍ ഇന്ത്യയുടെ നേട്ടങ്ങളും വികസന പ്രവര്‍ത്തനങ്ങളും അവതരിപ്പിക്കുന്നതില്‍ പ്രവാസി സമൂഹത്തിന് വഹിക്കാനാകുന്ന പങ്കിനെക്കുറിച്ചും ചര്‍ച്ചകള്‍ നടന്നു.
യുകെയിലെ സംഘടനാ സംവിധാനം കൂടുതല്‍ ഏകോപിപ്പിക്കുന്നതിനും പ്രവര്‍ത്തനങ്ങള്‍ വിപുലീകരിക്കുന്നതിനുമുള്ള നിര്‍ദേശങ്ങളും ശില്‍പശാലയില്‍ ഉയര്‍ന്നു. വരുംദിവസങ്ങളില്‍ നടപ്പാക്കേണ്ട സംഘടനാ പ്രവര്‍ത്തനങ്ങള്‍ സംബന്ധിച്ച കര്‍മപദ്ധതികളും നേതൃത്വം വിശദീകരിച്ചു.
യുകെയിലെ വിവിധ പ്രദേശങ്ങളില്‍ നിന്നുള്ള പ്രവര്‍ത്തകരെ ശില്‍പശാലയിലേക്ക് ഏകോപിപ്പിക്കുന്നതിലും സംഘാടക പ്രവര്‍ത്തനങ്ങളില്‍ പങ്കാളികളായ മറ്റ് പ്രവര്‍ത്തകരെയും നേതൃത്വം പ്രത്യേകം അഭിനന്ദിച്ചു.
സംഘടനാ പ്രവര്‍ത്തനങ്ങള്‍ കൂടുതല്‍ ഏകോപിതമായി മുന്നോട്ടുകൊണ്ടുപോകുന്നതിനായി പതിനൊന്നംഗ കമ്മിറ്റിയെയും ശില്‍പശാലയില്‍ തിരഞ്ഞെടുത്തു.
പ്രവാസി പ്രവര്‍ത്തകര്‍ക്കിടയില്‍ ആശയവിനിമയം ശക്തിപ്പെടുത്തുന്നതിനും സംഘടനാ പ്രവര്‍ത്തനങ്ങള്‍ക്ക് വ്യക്തമായ ദിശാബോധം നല്‍കുന്നതിനും ശില്‍പശാല സഹായകമായതായി ഭാരവാഹികള്‍ അഭിപ്രായപ്പെട്ടു. യുകെയിലെ വിവിധ മേഖലകളില്‍ സംഘടനാ പ്രവര്‍ത്തനങ്ങള്‍ കൂടുതല്‍ സജീവമാക്കുന്നതിനുള്ള തുടര്‍നടപടികള്‍ സ്വീകരിക്കുമെന്നും നേതൃത്വം അറിയിച്ചു.
പ്രേക്ഷകമനസ്സുകളില്‍ ആഴത്തിലുള്ള വികാരമുദ്ര പതിപ്പിച്ച് കാര്‍ഡിഫ് നാടകവേദിയുടെ 'നിഴലുകള്‍ക്കിടയില്‍' എന്ന നാടകം മനോഹരമായി അരങ്ങേറി. മികച്ച അവതരണവും ഹൃദയസ്പര്‍ശിയായ മുഹൂര്‍ത്തങ്ങളും കൊണ്ട് കാണികളെ ഒരുപോലെ ചിന്തിപ്പിക്കുകയും വികാരഭരിതരാക്കുകയും ചെയ്ത നാടകം ശ്രദ്ധേയമായി.
ഡോ. മൈക്കിള്‍, പോള്‍ മാവേലി എന്നിവരുടെ സംവിധാനമികവ് നാടകത്തിന്റെ ഓരോ രംഗത്തും പ്രകടമായി. കഥയുടെ വൈകാരികതയും കഥാപാത്രങ്ങളുടെ മനോവ്യാപാരങ്ങളും പ്രേക്ഷകരിലേക്ക് സ്വാഭാവികമായി എത്തിക്കുന്നതില്‍ ഇരുവരുടെയും സംവിധാനമികവ് നിര്‍ണായകമായി.
ഡോ. മൈക്കിള്‍, പോള്‍ മാവേലി, ഷീന ഷൈജന്‍, ജെയ്‌സണ്‍, ജിജോ, നീനു എന്‍. പിള്ള എന്നിവര്‍ തങ്ങളുടെ കഥാപാത്രങ്ങളെ മികച്ച അഭിനയമികവോടെ അവതരിപ്പിച്ചു. സംഭാഷണങ്ങളിലെ സ്വാഭാവികതയും മുഖഭാവങ്ങളിലെ സൂക്ഷ്മതയും വൈകാരിക രംഗങ്ങളിലെ തന്മയത്വവും അവതരണത്തിന് കൂടുതല്‍ മിഴിവേകി. ഓരോ കഥാപാത്രവും പ്രേക്ഷകമനസ്സില്‍ ഇടം നേടുന്ന രീതിയിലായിരുന്നു അഭിനേതാക്കളുടെ പ്രകടനം.
വേദിയിലെ പ്രകടനങ്ങള്‍ക്കൊപ്പം തിരശ്ശീലയ്ക്ക് പിന്നിലെ അണിയറപ്രവര്‍ത്തകരുടെ കൂട്ടായ പരിശ്രമവും നാടകത്തിന്റെ വിജയത്തിന് കരുത്തായി. ഈ കലാസംരംഭത്തിന് പിന്തുണയും പ്രോത്സാഹനവും നല്‍കിയ സ്‌പോണ്‍സര്‍മാരുടെ പങ്കും പ്രത്യേകം അഭിനന്ദനാര്‍ഹമാണ്.
അഭിനേതാക്കളുടെ മികവും സംവിധായകരുടെ കാഴ്ചപ്പാടും അണിയറപ്രവര്‍ത്തകരുടെ അര്‍പ്പണബോധവും സ്‌പോണ്‍സര്‍മാരുടെ പിന്തുണയും ഒത്തുചേര്‍ന്നപ്പോള്‍ 'നിഴലുകള്‍ക്കിടയില്‍' മറക്കാനാവാത്ത നാടകാനുഭവമായി മാറി. തിരശ്ശീല വീണെങ്കിലും നാടകം സമ്മാനിച്ച വികാരനിമിഷങ്ങള്‍ പ്രേക്ഷകമനസ്സുകളില്‍ ഇനിയും മായാതെ നിലനില്‍ക്കും.
SPIRITUAL
ഗ്രേറ്റ് ബ്രിട്ടന്‍ സീറോ മലബാര്‍ രൂപതയുടെ പാസ്റ്ററല്‍ കൗണ്‍സില്‍ മീറ്റിങ് ബര്‍മിംഗ്ഹാമിലെ മേരി വെയിലിലുള്ള ഔര്‍ ലേഡി ഓഫ് അസംപ്ഷന്‍ പള്ളിയിലും മാര്‍ യൗസേഫ് പാസ്റ്ററല്‍ ഹൗസിലുമായി നടന്നു. രാവിലെ ഖുഥ്ആ (യാമപ്രാര്‍ത്ഥന) പ്രാര്‍ത്ഥനയോടെ ആരംഭിച്ച സമ്മേളനം രൂപതാധ്യക്ഷന്‍ മാര്‍ ജോസഫ് സ്രാമ്പിക്കല്‍ ഉദ്ഘാടനം ചെയ്തു.
രൂപത പ്രോട്ടോസിഞ്ചെല്ലൂസ് വെരി റെവ. ഡോ. ആന്റണി ചുണ്ടെലിക്കാട്ട്, ചാന്‍സിലര്‍ റെവ. ഡോ. മാത്യു പിണക്കാട്ട്, പാസ്റ്ററല്‍ ഹൗസ് ഡയറക്ടര്‍ റെവ. ഫാ. ജിസ്‌മോന്‍ കീരാന്‍തടത്തില്‍ എന്നിവര്‍ വിവിധ വിഷയങ്ങള്‍ അവതരിപ്പിച്ചു സംസാരിച്ചു. റെവ ഡോ. ജോണ്‍ പുളിന്താനത്ത് അടുത്ത പഞ്ചവത്സര അജപാലന പദ്ധതിയെക്കുറിച്ചുള്ള പ്രാഥമിക രേഖ അവതരിപ്പിച്ചു.
രൂപത ഫിനാന്‍സ് ഓഫീസര്‍ റെവ. ഫാ. ജോ മൂലശ്ശേരി വി.സി. കഴിഞ്ഞ ഒരു വര്‍ഷത്തെ വരവുചെലവ് കണക്കുകള്‍ അവതരിപ്പിച്ചു.പാസ്റ്ററല്‍ കൗണ്‍സില്‍ സെക്രട്ടറി റോമില്‍സ് മാത്യു മുരിങ്ങമറ്റത്തില്‍ കഴിഞ്ഞ വര്‍ഷത്തെ റിപ്പോര്‍ട്ട് അവതരിപ്പിച്ചു.
രൂപതയുടെ മുന്‍വര്‍ഷത്തെ പ്രവര്‍ത്തനങ്ങളുടെ അവലോകനവും വരുംവര്‍ഷത്തെ പ്രവര്‍ത്തനങ്ങളെക്കുറിച്ചുള്ള നിര്‍ദ്ദേശങ്ങളും സമ്മേളനത്തില്‍ ചര്‍ച്ച ചെയ്തു. പാസ്റ്ററല്‍ കൗണ്‍സില്‍ കോര്‍ കമ്മറ്റി അംഗങ്ങളുടെ നേതൃത്വത്തില്‍ നടന്ന ചര്‍ച്ചകള്‍ രൂപത സി.ഐ.ഒ. ട്രസ്റ്റി ആന്‍സി ജാക്‌സണ്‍ ക്രോഡീകരിച്ച് അവതരിപ്പിച്ചു .
തുടര്‍ന്ന് പിതാവിന്റെ കാര്‍മികത്വത്തില്‍ നടന്ന വിശുദ്ധ കുര്‍ബാന അര്‍പ്പണത്തില്‍ രൂപത കൂരിയ അംഗങ്ങളും മറ്റു വൈദികരും സഹകാര്‍മികരായി. 'നമ്മുടെ ഹൃദയവും ആത്മാവും ശരീരവും മനസ്സും എല്ലാം കര്‍ത്താവിന് നല്‍കിയാല്‍ മാത്രമേ നിത്യജീവന്‍ അവകാശമാക്കുവാന്‍ സാധിക്കുകയുള്ളൂ എന്നും, ഈശോയെ ലഭിക്കാനും അവനോട് ഒന്നാകുവാനും വേണ്ടിയാകണം വിശ്വാസിയുടെ ജീവിതം' എന്നും പിതാവ് വിശുദ്ധ കുര്‍ബാനമധ്യേ നല്‍കിയ വചനസന്ദേശത്തില്‍ ഓര്‍മ്മിപ്പിച്ചു.
ബിര്‍മിംഗ്ഹാം റീജിയണല്‍ കൗണ്‍സില്‍ സെക്രട്ടറി ദാസന്‍ നെറ്റിക്കാടന്‍ സമ്മേളനത്തിന് നന്ദി അര്‍പ്പിച്ചു. കോര്‍ കമ്മറ്റി അംഗം ജെയ്സമ്മ ബിജോ തോമസ് സമ്മേളന നടപടികള്‍ ഏകോപിപ്പിച്ചു.
സ്ലോ: സ്ലോ ഹിന്ദു ക്ഷേത്രത്തിൽ നവംബർ 21ന് അയ്യപ്പ പൂജയും ഭക്തിനിർഭരമായ വിവിധ ആചാരാനുഷ്ഠാനങ്ങളും സംഘടിപ്പിക്കുന്നു. വൈകുന്നേരം 3.30 മുതൽ ആരംഭിക്കുന്ന ചടങ്ങുകളിൽ നിരവധി ഭക്തജനങ്ങൾ പങ്കെടുക്കുമെന്ന് സംഘാടകർ അറിയിച്ചു.
കവയിത്രി മീര കമലയും, ചലച്ചിത്ര നടനും കലാകാരനും സംവിധായകനുമായ മനോജ് ശിവയും ചേർന്ന് ഭദ്രദീപം തെളിയിച്ച് ചടങ്ങുകൾക്ക് ഔദ്യോഗിക തുടക്കം കുറിക്കും.
പുരോഹിതൻ ശ്രീകാന്ത് നമ്പൂതിരിയുടെ മുഖ്യകാർമികത്വത്തിൽ നടക്കുന്ന പൂജകൾ വിനായക പൂജയോടെ ആരംഭിക്കും. തുടർന്ന് ഭജന, വിളക്ക് പൂജ, പുഷ്പാഞ്ജലി, പടിപൂജ, ദീപാരാധന എന്നീ വിശേഷാൽ ചടങ്ങുകൾ നടക്കും. ഭക്തിസാന്ദ്രമായ ചടങ്ങുകൾ അയ്യപ്പ സ്വാമിയുടെ മംഗളകരമായ ഹരിവരാസനത്തോടെ സമാപിക്കും.
പ്രശസ്ത ഗായകനും അയ്യപ്പഭക്തനുമായ സദാനന്ദന്റെ നേതൃത്വത്തിലുള്ള ഭജനസംഘമായ തത്വമസി അയ്യപ്പ ഭജൻസ് പരമ്പരാഗത അയ്യപ്പ ഭജനകൾ അവതരിപ്പിക്കും. ഭക്തിനിർഭരമായ ഈ ഭജനസന്ധ്യ ആഘോഷത്തിന്റെ പ്രധാന ആകർഷണമായിരിക്കും.
മിനി, സ്മിത, രഞ്ജിത ചോവല്ലൂർ, സതീഷ് നായർ, അഭിലാഷ് കുമാർ, മനോജ് മാധവൻ, സായി അയ്യർ, സന്തോഷ് എന്നിവരുടെ നേതൃത്വത്തിലാണ് പരിപാടിയുടെ സംഘാടനം.
അയ്യപ്പ ഭക്തിയും ആത്മീയ ചൈതന്യവും നിറഞ്ഞ ഈ ആഘോഷത്തിൽ സ്ലോയിലെയും പരിസര പ്രദേശങ്ങളിലെയും എല്ലാ അയ്യപ്പ ഭക്തരെയും കുടുംബസമേതം പങ്കുചേരാൻ സംഘാടകർ സ്നേഹപൂർവം ക്ഷണിച്ചു.
Contact: 07728544849
മലങ്കര ഓര്ത്തഡോക്സ് സുറിയാനി സഭയുടെ യു.കെ-യൂറോപ്പ് ഭദ്രാസനത്തിനു കീഴില്‍ വെയില്‍സില്‍ പരിശുദ്ധ പരുമല തിരുമേനിയുടെ നാമത്തില്‍ സ്ഥാപിതമായ ആദ്യ ദേവാലയമായ കാര്‍ഡിഫ് സെന്റ് ഗ്രിഗോറിയോസ് ഇന്ത്യന്‍ ഓര്ത്തഡോക്സ് ദേവാലയത്തിലെ പ്രഥമ പെരുന്നാള്‍ ഭക്തിനിര്‍ഭരമായി.
പെരുന്നാള്‍ ശുശ്രൂഷകള്‍ക്കു ഫാ. സിറില്‍ ബി. ജോണ്‍ മുഖ്യകാര്‍മികത്വം വഹിച്ചു. ഇടവക വികാരി ഫാ. മാത്യു എബ്രഹാം പാലത്തിങ്കല്‍ നേതൃത്വം നല്‍കി. ഫാ. രഞ്ജു കിഴക്കയില്‍ സ്കറിയ സഹകാര്‍മികത്വം വഹിച്ചു.
സമീപ ഇടവകകളായ സ്വാന്‍സി ഹോളി ഇന്നസെന്റ്‌സ് ഓര്ത്തഡോക്സ് പള്ളി, ബ്രിസ്റ്റല്‍ സെന്റ് മേരീസ് ഓര്ത്തഡോക്സ് പള്ളി എന്നിവിടങ്ങളില്‍ നിന്നുള്ള വിശ്വാസികളും ചടങ്ങുകളില്‍ പങ്കെടുത്ത് അനുഗ്രഹം പ്രാപിച്ചു.
SPECIAL REPORT
പ്രായം തെറ്റായി രേഖപ്പെടുത്തി ഇന്‍സ്റ്റഗ്രാം ഉപയോഗിക്കുന്ന കൗമാരക്കാരെ കണ്ടെത്താന്‍ എഐ അധിഷ്ഠിത സംവിധാനം ആഗോളതലത്തിലേക്ക് വ്യാപിപ്പിച്ച് മെറ്റ. 13നും 17നും ഇടയില്‍ പ്രായമുള്ള ഉപയോക്താക്കളെ തിരിച്ചറിഞ്ഞ് അവര്‍ക്ക് ഇന്‍സ്റ്റഗ്രാമിലെ പ്രത്യേക സുരക്ഷാ ക്രമീകരണങ്ങളായ 'ടീന്‍ അക്കൗണ്ട്‌സ്' ഉറപ്പാക്കുകയാണ് ലക്ഷ്യം. അക്കൗണ്ട് തുടങ്ങുമ്പോള്‍ ജനനത്തീയതി തെറ്റായി നല്‍കി മുതിര്‍ന്നവരുടെ വിഭാഗത്തില്‍ ഉള്‍പ്പെടുന്ന കൗമാരക്കാരെയും കണ്ടെത്താന്‍ പുതിയ സംവിധാനത്തിലൂടെ സാധിക്കും.
കൗമാരക്കാരുടെ ഓണ്‍ലൈന്‍ സുരക്ഷ ഉറപ്പാക്കുന്നതിനും അവര്‍ക്ക് അനുയോജ്യമല്ലാത്ത ഉള്ളടക്കങ്ങള്‍ കാണുന്നത് നിയന്ത്രിക്കുന്നതിനുമുള്ള മെറ്റയുടെ നീക്കങ്ങളുടെ ഭാഗമായാണ് നടപടി. ചില രാജ്യങ്ങളില്‍ പ്രായം തിരിച്ചറിയുന്നതിനായി കൂടുതല്‍ സംവിധാനങ്ങളും കമ്പനി അവതരിപ്പിക്കുന്നുണ്ട്. ഓസ്ട്രേലിയയില്‍ ആപ്പിളിന്റെ പ്രായപരിധി സൂചിപ്പിക്കുന്ന സംവിധാനവും ഇതിനായി ഉപയോഗിച്ചു തുടങ്ങി. അമേരിക്കയിലെ മാതാപിതാക്കള്‍ക്ക് ഈ മാസം മുതല്‍ ഇന്‍സ്റ്റഗ്രാമിന്റെ പ്രായം തിരിച്ചറിയുന്ന സംവിധാനത്തെക്കുറിച്ചും കൗമാരക്കാര്‍ക്കുള്ള സുരക്ഷാ ക്രമീകരണങ്ങളെക്കുറിച്ചും അറിയിപ്പുകള്‍ ലഭിക്കും.
ഇന്‍സ്റ്റഗ്രാം അക്കൗണ്ട് കൗമാരക്കാരന്റേതാണെന്ന് സൂചിപ്പിക്കുന്ന വിവിധ ഘടകങ്ങളാണ് മെറ്റയുടെ എഐ സാങ്കേതികവിദ്യ പരിശോധിക്കുന്നത്. അക്കൗണ്ട് ഉടമ ജനനത്തീയതി മുതിര്‍ന്ന ഒരാളുടേതായി നല്‍കിയിട്ടുണ്ടെങ്കിലും മറ്റ് സൂചനകളിലൂടെ യഥാര്‍ഥ പ്രായം തിരിച്ചറിയാന്‍ സംവിധാനത്തിന് സാധിക്കും. എന്നാല്‍ പ്രായം നിര്‍ണയിക്കാന്‍ ഉപയോഗിക്കുന്ന എല്ലാ ഘടകങ്ങളും മെറ്റ പുറത്തുവിട്ടിട്ടില്ല. തെറ്റായ പ്രായവിവരങ്ങള്‍ നല്‍കി അക്കൗണ്ട് ഉപയോഗിക്കുന്നവരെ കണ്ടെത്തി അവരെ ടീന്‍ അക്കൗണ്ട് ക്രമീകരണങ്ങളിലേക്ക് മാറ്റുകയാണ് സാങ്കേതികവിദ്യയുടെ പ്രധാന ലക്ഷ്യം.
13 മുതല്‍ 17 വയസ്സുവരെയുള്ളവര്‍ക്കായി രൂപകല്‍പ്പന ചെയ്തിട്ടുള്ളതാണ് ഇന്‍സ്റ്റഗ്രാമിലെ ടീന്‍ അക്കൗണ്ടുകള്‍. ഈ സംവിധാനത്തില്‍ കൗമാരക്കാര്‍ക്ക് ആര്‍ക്കൊക്കെ സന്ദേശമയക്കാം, അവര്‍ക്ക് ഏതുതരം ഉള്ളടക്കങ്ങള്‍ കാണാം, എത്രനേരം ആപ്പില്‍ ചെലവഴിക്കാം തുടങ്ങിയ കാര്യങ്ങളില്‍ നിയന്ത്രണങ്ങളുണ്ട്. പരിചയമില്ലാത്തവരില്‍നിന്നുള്ള സന്ദേശങ്ങള്‍ നിയന്ത്രിക്കുക, സെന്‍സിറ്റീവ് ഉള്ളടക്കങ്ങള്‍ പരിമിതപ്പെടുത്തുക, കൂടുതല്‍ സമയം ആപ്പ് ഉപയോഗിക്കുമ്പോള്‍ ഇടവേള എടുക്കാന്‍ ഓര്‍മിപ്പിക്കുക തുടങ്ങിയ സുരക്ഷാ സംവിധാനങ്ങളും ഇതിലുണ്ട്. ചില സുരക്ഷാ ക്രമീകരണങ്ങളില്‍ മാറ്റം വരുത്താന്‍ മാതാപിതാക്കളുടെ അനുമതിയും ആവശ്യമാണ്.
2024 സെപ്റ്റംബറിലാണ് ഇന്‍സ്റ്റഗ്രാം ടീന്‍ അക്കൗണ്ടുകള്‍ അവതരിപ്പിച്ചത്. കൗമാരക്കാരെ സ്വമേധയാ പ്രായത്തിന് അനുയോജ്യമായ സുരക്ഷാ ക്രമീകരണങ്ങളിലേക്ക് മാറ്റുകയായിരുന്നു ഇതിന്റെ ലക്ഷ്യം. നിലവില്‍ ഫെയ്സ്ബുക്കിലും സമാന എഐ സാങ്കേതികവിദ്യ വ്യാപിപ്പിക്കുന്നുണ്ട്. ഈ വര്‍ഷം അവസാനത്തോടെ ത്രെഡ്സിലും അവതരിപ്പിക്കാനാണ് മെറ്റയുടെ പദ്ധതി. 13 വയസ്സിന് താഴെയുള്ള കുട്ടികള്‍ക്ക് പ്ലാറ്റ്ഫോമുകള്‍ ഉപയോഗിക്കാന്‍ അനുമതിയില്ലാത്തതിനാല്‍ അത്തരം അക്കൗണ്ടുകള്‍ കണ്ടെത്താനുള്ള സാങ്കേതികവിദ്യയിലും കമ്പനി നിക്ഷേപം നടത്തുന്നുണ്ട്.
പ്രായം തിരിച്ചറിയുന്നതിനായി ഓസ്ട്രേലിയയില്‍ ആപ്പിളിന്റെ 'ഏജ് റേഞ്ച് സിഗ്‌നല്‍' സംവിധാനവും മെറ്റ ഉപയോഗിച്ചു തുടങ്ങി. ഉപയോക്താവിന്റെ കൃത്യമായ ജനനത്തീയതിക്ക് പകരം അയാള്‍ ഏത് പ്രായപരിധിയിലാണ് ഉള്‍പ്പെടുന്നതെന്ന് തിരിച്ചറിയാന്‍ സഹായിക്കുന്ന സംവിധാനമാണിത്. മാതാപിതാക്കള്‍ കൗമാരക്കാര്‍ക്കുവേണ്ടി സ്മാര്‍ട്ട്ഫോണ്‍ സജ്ജീകരിക്കുമ്പോള്‍ ആപ്പ് സ്റ്റോറിന് ഉപയോക്താവിന്റെ പ്രായപരിധി സ്ഥിരീകരിക്കാനുള്ള അനുമതി നല്‍കാം. തുടര്‍ന്ന് ആപ്പ് ഡൗണ്‍ലോഡ് ചെയ്യുമ്പോള്‍ അയാളുടെ പ്രായപരിധി ആപ്പ് നിര്‍മാതാവിന് കൈമാറാന്‍ ആപ്പിളിന് സാധിക്കും. ഇതിലൂടെ ആപ്പ് ഉപയോഗിക്കുന്നതിനുള്ള പ്രായപരിധി പാലിക്കുന്നുണ്ടോയെന്ന് പരിശോധിക്കാനാകും.
നിലവില്‍ സ്വമേധയാ ആണ് മെറ്റ ഈ സംവിധാനം ഉപയോഗിക്കുന്നത്. എന്നാല്‍ ആപ്പ് സ്റ്റോറുകളും ആപ്പ് നിര്‍മാതാക്കളും പ്രായവിവരങ്ങള്‍ പങ്കുവെക്കുന്നത് നിര്‍ബന്ധമല്ലാത്തിടത്തോളം വിവിധ പ്ലാറ്റ്ഫോമുകളിലെ പ്രായപരിശോധനാ സംവിധാനങ്ങളില്‍ ഏകീകൃത രീതി ഉണ്ടാകില്ലെന്നാണ് മെറ്റയുടെ വിലയിരുത്തല്‍. ഇതിനായി ആപ്പ് സ്റ്റോറുകള്‍ ഉപയോക്താക്കളുടെ പ്രായം സ്ഥിരീകരിക്കുകയും കുട്ടികളുടെ കാര്യത്തില്‍ മാതാപിതാക്കളുടെ അനുമതി ഉറപ്പാക്കുകയും ചെയ്യുന്നത് നിര്‍ബന്ധമാക്കുന്ന നിയമനിര്‍മാണം വേണമെന്നും മെറ്റ ആവശ്യപ്പെട്ടിട്ടുണ്ട്. ഒരിക്കല്‍ സ്ഥിരീകരിച്ച പ്രായവിവരം വിവിധ ആപ്പുകളുമായി പങ്കുവക്കാന്‍ കഴിഞ്ഞാല്‍ ഓരോ പ്ലാറ്റ്ഫോമും പ്രത്യേകം പ്രായപരിശോധന നടത്തേണ്ട സാഹചര്യം കുറയുമെന്നും കമ്പനി ചൂണ്ടിക്കാട്ടുന്നു.
അതേസമയം, ആപ്പ് സ്റ്റോറുകളില്‍നിന്ന് ലഭിക്കുന്ന പ്രായവിവരങ്ങളില്‍ പിഴവുണ്ടെങ്കില്‍ അവ കണ്ടെത്താന്‍ പ്ലാറ്റ്ഫോമുകളുടെ സ്വന്തം എഐ സംവിധാനങ്ങള്‍ സഹായിക്കുമെന്നും മെറ്റ പറയുന്നു. ഇത്തരത്തില്‍ കണ്ടെത്തുന്ന തിരുത്തലുകള്‍ ആപ്പ് സ്റ്റോറുകളുമായി പങ്കുവെക്കുന്നതിലൂടെ വിവിധ ആപ്പുകളിലെ പ്രായവിവരങ്ങളുടെ കൃത്യത മെച്ചപ്പെടുത്താനും സാധിക്കും. വിവിധ രാജ്യങ്ങളില്‍ പ്രായം സ്ഥിരീകരിക്കുന്നതിനുള്ള നിയമങ്ങളും വ്യത്യസ്തമാണ്. ചില രാജ്യങ്ങളില്‍ സര്‍ക്കാര്‍ തിരിച്ചറിയല്‍ രേഖകള്‍ ഉള്‍പ്പെടെയുള്ള സെന്‍സിറ്റീവ് വിവരങ്ങള്‍ ശേഖരിച്ചാണ് പ്രായം പരിശോധിക്കുന്നത്.
ഓരോ പ്ലാറ്റ്ഫോമും പ്രത്യേകം ഇത്തരം വിവരങ്ങള്‍ ശേഖരിക്കാതെ തന്നെ ഉപയോക്താക്കളുടെ പ്രായം സ്ഥിരീകരിക്കാന്‍ കഴിയുന്ന സംവിധാനങ്ങളെയാണ് മെറ്റ പിന്തുണയ്ക്കുന്നത്. കുട്ടികളുടെ സോഷ്യല്‍ മീഡിയ ഉപയോഗം നിയന്ത്രിക്കുന്നതിനും ഓണ്‍ലൈന്‍ സുരക്ഷ ശക്തമാക്കുന്നതിനും ലോകമെമ്പാടുമുള്ള സര്‍ക്കാരുകള്‍ നടപടി കടുപ്പിക്കുന്നതിനിടെയാണ് മെറ്റയുടെ നീക്കം.
CINEMA
നല്ല ഹ്യൂമർ സെൻസുള്ള ആളാണ് താനെന്ന് ആരാധകർക്ക് മുൻപിൽ പലപ്പോഴും തെളിയിച്ചിട്ടുള്ള നടനാണ് ഷാരുഖ് ഖാൻ. പൊതുവേദികളിലടക്കം പൊട്ടിച്ചിരിയുടെ മാലപടക്കത്തിന് ഷാരുഖ് തിരികൊളുത്തിയിട്ടുണ്ട്. തന്റെ ഭാര്യ ഗൗരി ഖാനെയും മക്കളെക്കുറിച്ചുമൊക്കെ ഷാരുഖ് പറഞ്ഞ കാര്യമാണിപ്പോൾ ആരാധകരിൽ ചിരി പടർത്തുന്നത്.
മുംബൈയിലെ തന്റെ വസതിയായ 'മന്നത്ത്' ആയാലും ദുബൈയിലെ പുതിയ ആഡംബര പെന്റ്ഹൗസ് പ്രോജക്റ്റായാലും, ഭാര്യ ഗൗരി ഖാന്റെ ഇന്റീരിയർ ഡിസൈൻ തിരഞ്ഞെടുപ്പുകളിൽ തനിക്ക് യാതൊരു അഭിപ്രായ സ്വാതന്ത്ര്യവുമില്ലെന്ന് ഷാരുഖ് പറയുന്നു. ദുബൈ മാരിടൈം സിറ്റിയിൽ ഡാന്യൂബ് പ്രോപ്പർട്ടീസ് നിർമിക്കുന്ന 60 നിലകളുള്ള 'ഷാരുഖ്‌സ് റെസിഡൻസസ്' ലോഞ്ച് ചടങ്ങിൽ സംസാരിക്കുകയായിരുന്നു അദ്ദേഹം.
ഗൗരി ഖാനാണ് ഈ ടവറിലെ എക്സ്ക്ലൂസീവ് വാട്ടർഫ്രണ്ട് പെന്റ്ഹൗസുകളും അപ്പാർട്ട്മെന്റുകളും രൂപകൽപ്പന ചെയ്തിരിക്കുന്നത്. കരൺ ജോഹർ ആണ് പരിപാടിയിൽ അവതാരകനായെത്തിയത്. സ്വന്തം വീട്ടിൽ ഇപ്പോഴും ചെയ്യാൻ അനുവാദമില്ലാത്ത ഒരു കാര്യത്തെക്കുറിച്ച് പറയാനായിരുന്നു ഷാരുഖിനോട് പറഞ്ഞത്.
തന്റെ സ്വന്തം വീട്ടിൽ തനിക്കൊന്നും ചെയ്യാൻ അനുവാദമില്ലെന്ന ഷാരുഖിന്റെ മറുപടി വലിയ ചിരിയാണ് കാണികളിൽ ഉയർത്തിയത്. "ഞങ്ങളുടെ വീട്ടിൽ, ഗൗരിയുടെ വീടിനെതിരെ ഞങ്ങൾക്ക് ഒരക്ഷരം പോലും മിണ്ടാൻ കഴിയില്ല. വൈ-ഫൈയെക്കുറിച്ചോ നിറങ്ങളെക്കുറിച്ചോ പരാതിപ്പെടാനോ, കിടക്കയിൽ ഇരുന്ന് ഭക്ഷണം കഴിക്കാനോ അനുവാദമില്ല. പെയിന്റിംഗുകൾ, ടെറസ്, സീലിങ്, പടികൾ, എന്തിനേറെ ലിഫ്റ്റിനെക്കുറിച്ചു പോലും അഭിപ്രായം പറയാൻ ഞങ്ങൾക്ക് അവകാശമില്ല.
നിശബ്ദമായി ഇരുന്ന് 'വൗ ഗൗരി, നീ എന്ത് ഗംഭീര വീടാണ് നിർമിച്ചിരിക്കുന്നത്' എന്ന് പുകഴ്ത്തുക മാത്രമാണ് ഞങ്ങളുടെ ജോലി. വീടിന് പുറത്ത് ഞാനും ആര്യനും സുഹാനയും അബ്രാമും അടിച്ചുപൊളിക്കുമെങ്കിലും വീടിനുള്ളിൽ ഗൗരിയാണ് കാര്യങ്ങൾ തീരുമാനിക്കുന്നത്". - ഷാരുഖ് പറഞ്ഞു. സ്വന്തമായി ഒരു വീടില്ലാതിരുന്ന ഭൂതകാലത്തെക്കുറിച്ചും ഷാരുഖ് ചടങ്ങിൽ വികാരാധീനനായി.
മാതാപിതാക്കൾ നേരത്തെ മരിച്ചുപോയ തനിക്ക് ജീവിതത്തിലെ ഏറ്റവും വലിയ ആഗ്രഹം സ്വന്തമായൊരു വീടായിരുന്നുവെന്നും, ഗൗരിയെ വിവാഹം കഴിക്കുന്നത് വരെ തനിക്ക് സ്വന്തമായി വീടുണ്ടായിരുന്നില്ലെന്നും നടൻ ഓർത്തെടുത്തു. "നിങ്ങൾ ഒരു വീടിനായി പ്രാർഥിച്ചാൽ (മന്നത്ത് ചെയ്താൽ), ജീവിതത്തിലെ ഏറ്റവും മനോഹരമായ വീട് നിങ്ങൾക്ക് ലഭിക്കും. വലുതായി ചിന്തിക്കുക, വലുതായി വിശ്വസിക്കുക".- എന്നും ഷാരുഖ് പറഞ്ഞു.
ഈയ്യടുത്താണ് താന്‍ വിവാഹിതയാകാന്‍ പോകുന്നതായി ഗായിക റിമി ടോമി അറിയിച്ചത്. വരന്‍ ലിബിന്‍ മാത്യുവിനെ പരിചയപ്പെടുത്തുകയും ചെയ്തു. അന്ന് മുതല്‍ റിമിയുടെ കല്യാണത്തിനായി കാത്തിരിക്കുകയാണ് ആരാധകര്‍. കല്യാണത്തിനായി കുടുംബത്തോടൊപ്പം മുംബൈയിലെത്തിയതിന്റെ വിഡിയോ നേരത്തെ റിമി പങ്കുവെക്കുകയും ചെയ്തിരുന്നു.
ഇതിനിടെ, റിമി ടോമിയുമായുള്ള വിവാഹത്തിന്റെ സന്തോഷം പങ്കിടുകയാണ് വരന്‍ ലിബിന്‍. റിമിയ്‌ക്കൊപ്പമുള്ള, എഐ നിര്‍മിത ചിത്രത്തോടൊപ്പം പങ്കുവച്ച കുറിപ്പിലൂടെയാണ് ലിബിന്‍ സന്തോഷം പങ്കിട്ടത്. പുതിയ തുടക്കത്തിനായി ദിവസങ്ങള്‍ എണ്ണിക്കാത്തിരിക്കുകയാണെന്നാണ് ലിബിന്‍ പറയുന്നത്.
'ദൈവം ഞങ്ങളുടെ കഥ എഴുതി, സ്നേഹം ഞങ്ങളെ ഒന്നിപ്പിച്ചു; വൈകാതെ ഞങ്ങള്‍ ഞങ്ങളുടെ എന്നെന്നേക്കുമുള്ള ജീവിതം ആരംഭിക്കും. അവന്‍റെ സമയക്രമത്തില്‍ വിശ്വസിച്ചും അവന്‍റെ അനുഗ്രഹങ്ങള്‍ ഹൃദയപൂര്‍വം സ്വീകരിച്ചും മനോഹരമായ ആ പുതിയ തുടക്കത്തിലേക്കുള്ള ദിവസങ്ങള്‍ എണ്ണി കാത്തിരിക്കുന്നു.' എന്നാണ് ലിബിന്‍ കുറിച്ചിരിക്കുന്നത്.
പിന്നാലെ ആശംസകളുമായി നിരവധി താരങ്ങളാണെത്തുന്നത്. ജ്യോത്സന, രമേശ് പിഷാരടി, കൃഷ്ണപ്രഭ, ദീപ്തി വിധുപ്രതാപ് തുടങ്ങിയവര്‍ കമന്റ് ചെയ്തിട്ടുണ്ട്. അതേസമയം, നവംബര്‍ 16 നാണ് റിമിയുടേയും ലിബിന്റേയും കല്യാണം. മുംബൈയില്‍ വച്ചാണ് വിവാഹം നടക്കുന്നത്. മുംബൈ സ്വദേശിയായ മലയാളിയാണ് ലിബിന്‍. ജിം ട്രെയ്‌നറാണ് ലിബിന്‍.
ഛായാഗ്രാഹകൻ ഷാജികുമാറിന്റെ ആകസ്മിക മരണവുമായി ബന്ധപ്പെട്ട് നടൻ സിദ്ദിഖ് പങ്കുവെച്ച ഫേസ്ബുക്ക് കുറിപ്പ് ചർച്ചയാകുന്നു. മരണവീട്ടിലെ ചർച്ചകൾ കേട്ട് മരിക്കാൻ തന്നെ ഭയമാകുന്നു എന്നാണ് സിദ്ദിഖ് പറയുന്നത്. മരണപ്പെട്ടയാളെ എന്തിനാണ് ഇങ്ങനെ കുറ്റപ്പെടുത്തി സംസാരിക്കുന്നതെന്നും സിദ്ദിഖ് ചോദിക്കുന്നു.
സിദ്ദിഖിന്റെ ഫേസ്ബുക്ക് കുറിപ്പ് വായിക്കാം:
മരണ ഭയം
എവിടെയോ
വായിച്ച ഒരു ഓർമ്മ,,
മരണ വീട്ടിലേക്ക് നമ്മൾ ഓടിയെത്തുന്നത്, നഷ്ടപ്പെട്ട ബന്ധുവിനെയോ സുഹൃത്തിനെയോ ഓർത്തുള്ള ദുഃഖത്തോടെ മാത്രമല്ല, മറിച്ച്, മരിച്ചത് താൻ അല്ലല്ലോ എന്ന, ചെറിയ ഒരു ആശ്വാസത്തോടും കൂടിയാണ്.
ഓരോരുത്തരും ഈ ലോകത്തോട് യാത്ര പറഞ്ഞു പോകുമ്പോഴും, നമ്മൾ ഇവിടെ തന്നെ ഉണ്ടല്ലോ എന്ന സന്തോഷം അനുഭവിക്കുന്നുണ്ട് നമ്മളിൽ പലരും. ആ സന്തോഷത്തിന്റെ അളവ്, മരിച്ച വ്യക്തിയും നമ്മളും തമ്മിലുള്ള ബന്ധത്തിന്റെ ആഴം അനുസരിച്ച് കൂടിയും കുറഞ്ഞുമിരിക്കും. അതിൽ ആരെയും തെറ്റു പറയാനോ കുറ്റപ്പെടുത്താനോ ആവില്ല. എന്നാൽ ഒരു മരണവീട്ടിൽ വന്നു നിന്ന്, മരിച്ച വ്യക്തിയെ, അയാളുടെ മരണത്തിന്റെ പേരിൽ കുറ്റപ്പെടുത്തുന്നത് കേൾക്കുമ്പോൾ, ദുഃഖമോ ദേഷ്യമോ അല്ല,ഒരുതരം ഞെട്ടലാണ് അനുഭവപ്പെടുന്നത്. നാളെ ഞാനും ഇതുപോലെ വെള്ള പുതച്ചു കിടക്കുമ്പോൾ, എന്റെ അടുത്ത സുഹൃത്തുക്കളും ബന്ധുക്കളുമാണെന്ന് അവകാശപ്പെടുന്നവർ വന്നു നിന്ന്, എന്നെക്കുറിച്ചും ഇതുപോലെ പറഞ്ഞു രസിക്കില്ലേ??
കഴിഞ്ഞദിവസം എന്റെ ഒരു സുഹൃത്ത് (പേര് പറയുന്നില്ല നിങ്ങൾക്കൊക്കെ അറിയാം) ഞങ്ങളെയൊക്കെ ഞെട്ടിച്ചുകൊണ്ട്, യാത്ര പോലും പറയാതെ പെട്ടെന്ന് അങ്ങ് പോയിക്കളഞ്ഞു. അവസാനമായി ആ ഭൗതികശരീരം ഒന്ന് കാണാൻ ഞാനും പോയി. പ്രശസ്തരും, പ്രഗൽഭരുമായ ഒരുപാട് പേർ കൂടി നിൽപ്പുണ്ട്. എന്താണ് സംഭവിച്ചത് എന്ന ചോദ്യങ്ങളും, ഓരോരുത്തരുടെയും ഭാവനയ്ക്കനുസരിച്ചുള്ള ഉത്തരങ്ങളും കേട്ടു.
ഷുഗർ ഉണ്ടായിരുന്നോ? പിന്നെ… 400 മുകളിലായിരുന്നു. 510 ആണെന്നാ ഞാൻ കേട്ടത്.!! പ്രഷർ 220, ആയിരുന്നെന്നും 300 ആയിരുന്നെന്നും പറയുന്നുണ്ട്. തടി വല്ലാതെ കൂടുതലായിരുന്നു… വ്യായാമൊന്നും ഇല്ലല്ലോ??? മാത്രമല്ല ചോറ് ഒരുപാട് കഴിക്കും.
അയ്യയ്യോ… ഞാനൊക്കെ രണ്ടുനേരവും ചപ്പാത്തിയാ… കഴിഞ്ഞ ആഴ്ച കണ്ടപ്പോൾ ഞാൻ പറഞ്ഞതാ ചെക്കപ്പ് ചെയ്യണേ… എന്ന്,
കേട്ടില്ല.. നമുക്ക് പിന്നെ, ദൈവം സഹായിച്ച് പ്രഷറും ഷുഗറും ഒന്നുമില്ല…
പുള്ളി മദ്യപിക്കുമായിരുന്നോ???
ഏയ്‌..അതില്ല.
അതുകൊണ്ട് കാര്യമില്ല.ഞാൻ ദിവസവും രണ്ടെണ്ണം അടിക്കും.
പക്ഷേ രാവിലെ ഒരു പത്ത് കിലോമീറ്റർ നടക്കും. അതുകൊണ്ടല്ലേ ഇപ്പോഴും ഇങ്ങനെ കുട്ടപ്പൻ ആയിട്ട് ഇരിക്കുന്നത്.!!!
പ്രായം എത്രയായിന്നാ വിചാരം????
50 കഴിഞ്ഞോ???
ഹഹഹ…62!!!!
ദൈവമേ!!!ദൈവം പോലും പറയില്ലല്ലോ!!!
NAMMUDE NAADU
കോടമഞ്ഞും പച്ചപ്പണിഞ്ഞ തേയിലത്തോട്ടങ്ങളും മാത്രമല്ല, കണ്ണിന് വിരുന്നൊരുക്കുന്ന മറ്റൊരു കാഴ്ചകൂടി സഞ്ചാരികളെ കാത്തിരിക്കുന്നുണ്ട് മൂന്നാറിൽ. മഞ്ഞപ്പൂക്കൾ വിരിഞ്ഞ് സ്വർണനിറമണിഞ്ഞിരിക്കുകയാണ് മൂന്നാർ–വട്ടവട പാതയിലെ എല്ലപ്പെട്ടി. വഴിയോരങ്ങളിൽ കൂട്ടത്തോടെ പൂത്തുനിൽക്കുന്ന ‘റാറ്റിൽ പോഡ്’ അഥവാ ‘കിലുകിലുക്കി’ പൂക്കളാണ് ഇപ്പോൾ ഇവിടുത്തെ പ്രധാന ആകർഷണം. മഞ്ഞപ്പൂക്കൾക്കിടയിൽ നിന്ന് മനോഹരമായ ചിത്രങ്ങളും റീലുകളും പകർത്താൻ ദിവസവും നിരവധി സഞ്ചാരികളാണ് ഇവിടേക്ക് എത്തുന്നത്.
കാഴ്ചയിൽ അതിമനോഹരമായ മഞ്ഞപ്പൂക്കൾ മാത്രമല്ല, ഈ ചെടിയുടെ പേരിനു പിന്നിലുള്ള കൗതുകവും സഞ്ചാരികളെ ആകർഷിക്കുന്നതാണ്. പൂക്കൾ കൊഴിഞ്ഞശേഷം ചെടിയിൽ ഉണ്ടാകുന്ന കായ്കൾ ഉണങ്ങുമ്പോൾ അതിനുള്ളിലെ വിത്തുകൾ പരസ്പരം ഉരസിയാണ് പ്രത്യേക ശബ്ദമുണ്ടാകുന്നത്. ചെറിയ കാറ്റിൽപ്പോലും കായ്കൾ ഇളകുമ്പോൾ കുട്ടികളുടെ കിലുക്കാംപെട്ടിയിൽനിന്ന് കേൾക്കുന്നതുപോലെയുള്ള ‘കിലുകിലു’ ശബ്ദം ഉയരും. ഈ പ്രത്യേകതയിൽനിന്നാണ് ചെടിക്ക് ‘കിലുകിലുക്കി’ എന്ന പേര് ലഭിച്ചത്.
കണ്ണൻ ദേവൻ ഹിൽസ് പ്ലാന്റേഷൻസിന്റെ (KDHP) കീഴിലുള്ള സ്ഥലത്താണ് ഈ പൂക്കാഴ്ച ഒരുക്കിയിരിക്കുന്നത്. ഇവിടേക്ക് പ്രവേശിക്കുന്നതിന് ഒരാൾക്ക് 100 രൂപയാണ് നിരക്ക്. പൂക്കൾക്കിടയിൽ നിന്ന് ചിത്രങ്ങളെടുക്കാനും പ്രകൃതിഭംഗി ആസ്വദിക്കാനും സഞ്ചാരികൾക്ക് അവസരമുണ്ട്.
മൂന്നാർ ടൗണിൽനിന്ന് വട്ടവടയിലേക്കുള്ള പാതയിലൂടെ ഏകദേശം 24 കിലോമീറ്റർ സഞ്ചരിച്ചാൽ എല്ലപ്പെട്ടിയിലെത്താം. മാട്ടുപ്പെട്ടി, കുണ്ടള ഡാം, ടോപ് സ്റ്റേഷൻ തുടങ്ങിയ വിനോദസഞ്ചാര കേന്ദ്രങ്ങളിലേക്ക് പോകുന്നവർക്ക് യാത്രാമധ്യേ ഈ മനോഹരമായ പൂക്കാഴ്ച ആസ്വദിക്കാം.
ഫോട്ടോകളും റീലുകളും പകർത്തുമ്പോൾ പൂക്കളും ചെടികളും നശിപ്പിക്കാതിരിക്കാൻ പ്രത്യേകം ശ്രദ്ധിക്കണം. ചെടികൾ ചവിട്ടിമെതിക്കാതെയും പൂക്കൾ പറിക്കാതെയും പ്രകൃതിഭംഗി അതേപടി നിലനിർത്തണം. സഞ്ചാരികളുടെ ഉത്തരവാദിത്തപരമായ പെരുമാറ്റമാണ് ഈ മനോഹര കാഴ്ച വരുംകാലത്തും സംരക്ഷിക്കാൻ സഹായിക്കുക.
കോടമഞ്ഞും തേയിലത്തോട്ടങ്ങളും ആസ്വദിച്ചുള്ള മൂന്നാർ യാത്രയിൽ ഇത്തവണ മഞ്ഞപ്പൂക്കളുടെ ഈ വസന്തവും ചേർക്കാം. വട്ടവടയിലേക്കോ ടോപ് സ്റ്റേഷനിലേക്കോ യാത്ര തിരിക്കുന്നവർക്ക് വഴിയിലൊരുങ്ങുന്ന മനോഹരമായൊരു ഫോട്ടോ സ്പോട്ടാണ് എല്ലപ്പെട്ടിയിലെ കിലുകിലുക്കി പൂക്കളുടെ ലോകം.
അമേരിക്കയില്‍ വൈറ്റ് ഹൗസിന് സമീപം ലോഗന്‍ സര്‍ക്കിളിലുണ്ടായ വെടിവെപ്പില്‍ ഒരാള്‍ കൊല്ലപ്പെട്ടു. അഞ്ച് പേര്‍ക്ക് പരിക്കേറ്റു. വൈറ്റ് ഹൗസില്‍ നിന്ന് ഏകദേശം ഒന്നര കിലോമീറ്റര്‍ അകലെയാണ് വെടിവെപ്പുണ്ടായ പ്രദേശം. വ്യാഴാഴ്ച്ച രാവിലെയാണ് സംഭവം. വെടിവെപ്പ് നടത്തിയെന്ന് സംശയിക്കുന്നയാള്‍ ഒരു കെട്ടിടത്തിനുള്ളില്‍ ഒളിച്ചിരിക്കുകയാണെന്നും അക്രമിയുള്ള കെട്ടിടം പൊലീസ് വളഞ്ഞതായുമായാണ് അധികൃതര്‍ അറിയിച്ചിരിക്കുന്നത്. എന്നാലിയാളെ ഇതുവരെ പിടികൂടാനായിട്ടില്ലെന്നാണ് പൊലീസ് പറയുന്നത്.
വെടിവെപ്പുണ്ടായ കൃത്യമായ സ്ഥലങ്ങളും അധികൃതര്‍ വ്യക്തമാക്കിയിട്ടില്ല. എന്നാല്‍ 15-ാം സ്ട്രീറ്റിലേക്ക് ആളുകള്‍ എത്തരുതെന്ന് പൊലീസ് നിര്‍ദേശം നല്‍കിയിട്ടുണ്ട്. സുരക്ഷാ മുന്‍കരുതലിന്റെ ഭാഗമായി സമീപത്തെ സ്‌കൂളുകള്‍ അടച്ചു.
രാവിലെ എട്ട് മണിയോടെ അഞ്ച് തവണ വലിയ ശബ്ദങ്ങള്‍ കേട്ടതായി സമീപവാസികള്‍ പറഞ്ഞു. ആദ്യം നിര്‍മ്മാണ പ്രവര്‍ത്തനങ്ങളുടെ ശബ്ദമാണെന്ന് കരുതിയെങ്കിലും പുറത്തേക്ക് നോക്കിയപ്പോള്‍ പ്രദേശമാകെ പൊലീസ് സന്നാഹമെത്തി. തുടര്‍ന്ന് അടുത്തുള്ള അപ്പാര്‍ട്ട്‌മെന്റുകളിലെ താമസക്കാര്‍ക്ക് അധികൃതര്‍ മുന്നറിയിപ്പ് നല്‍കുകയായിരുന്നു.
Channels
ബിഗ്ബോസിൽ പിആർ നൽകിയതുമായി ബന്ധപ്പെട്ട്, സീസൺ 7 ലെ വിജയി അനുമോൾക്കെതിരെയുള്ള ചർച്ചകൾ അടുത്തിടെ വീണ്ടും സജീവമായിരുന്നു. ഇപ്പോഴിതാ ഇതിനെല്ലാമുള്ള പരോക്ഷ മറുപടിയുമായി രംഗത്തെത്തിയിരിക്കുകയാണ് അനുമോൾ. ബിഗ്ബോസ് വിജയിയായതിന്റെ ഒന്നാം വാർഷികത്തിലാണ് അനുമോൾ കുറിപ്പ് പങ്കുവെച്ചത്.
''2025 നവംബർ 9-നാണ് ബിഗ് ബോസ് സീസൺ 7 വിജയി എന്നെ Announce ചെയ്തത്. ഓഗസ്റ്റ് 2 മുതൽ നവംബർ 9 വരെയുള്ള ആ 100 ദിവസങ്ങൾ… ചിരിച്ചും കരഞ്ഞും വഴക്കിട്ടും ഒരുപാട് സാഹചര്യങ്ങളിലൂടെ കടന്നുപോയ ദിവസങ്ങൾ. ഇതെല്ലാം ഇന്ന് ഓർക്കുമ്പോൾ ഒരുപാട് സന്തോഷവും സങ്കടവും അഭിമാനവും തോന്നുന്നുണ്ട്. ഞാൻ ആ ഹൗസിൽ എന്താണ് ചെയ്തതെന്നും എങ്ങനെയാണ് നിന്നതെന്നും എനിക്ക് നന്നായിട്ടറിയാം. 24 മണിക്കൂറും ലൈവ് കണ്ടവർക്കും അറിയാം. ഒന്നും പ്രീ പ്ലാന്ഡ ചെയ്തോ പഠിച്ചോ ആയിരുന്നില്ല ഞാൻ അവിടെ പോയത്. നന്നായിട്ട് നിൽക്കണം, എന്റെ പരമാവധി കൊടുക്കണം എന്നൊരു ആഗ്രഹം മാത്രമായിരുന്നു.
ഒരു വർഷം കഴിഞ്ഞിട്ടും എന്റെ വിജയത്തെക്കുറിച്ചും PR-നെക്കുറിച്ചും ചിലർ ഇപ്പോഴും സംസാരിക്കുന്നുണ്ട്. ആരെന്ത് പറഞ്ഞാലും എനിക്കൊരു പ്രശ്നവുമില്ല. എനിക്ക് കിട്ടേണ്ടത് എനിക്ക് കിട്ടി. എന്നെ സ്നേഹിച്ച് വിശ്വസിച്ച് വോട്ട് ചെയ്ത ഒരുപാട് ആളുകളുണ്ട്. അവരുടെ സ്നേഹമാണ് എന്റെ ഏറ്റവും വലിയ സന്തോഷം. ആദ്യം ദൈവത്തിന് നന്ദി. എന്റെ ഫാമിലിക്ക്, എന്നെ സ്നേഹിച്ചവർക്കും വോട്ട് ചെയ്ത് എന്നെ കൂടെ നിന്ന ഓരോരുത്തർക്കും ഒരുപാട് നന്ദി.
ഈ വലിയ പ്ലാറ്റഫോം തന്ന ഏഷ്യാനെറ്റിനും സ്പോൺസേഴ്സിനും പ്രത്യേകം നന്ദി. ഈ യാത്രയിൽ എന്നെ പ്രോത്സാഹിപ്പിക്കുകയും പിന്തുണയ്ക്കുകയും ചെയ്ത നമ്മുടെ സ്വന്തം ലാലേട്ടനും ഒരുപാട് നന്ദി. എത്ര വർഷം കഴിഞ്ഞാലും ഒരു കാര്യം മാറാൻ പോകുന്നില്ല. ബിഗ് ബോസ് സീസൺ 7 ലെ വിജയി അനുമോൾ തന്നെയാണ്. എനിക്ക് കിട്ടേണ്ട കപ്പ് എനിക്ക് കിട്ടി. അതിൽ എന്നും അഭിമാനമുണ്ട് എത്ര വർഷം കഴിഞ്ഞാലും ആ 100 ദിവസങ്ങളും ആ കപ്പും എന്റെ ജീവിതത്തിൽ എന്നും ഒരു വലിയ ഓർമ്മയായിരിക്കും'', എന്നായിരുന്നു അനുമോളുടെ വാക്കുകൾ.
മലയാളിയ്ക്ക് ഇന്നും മറക്കാനാകാത്ത വേര്‍പാടാണ് കലാഭവന്‍ നവാസിന്റേത്. മിമിക്രി വേദികളിലൂടെ ആരംഭിച്ച്, പിന്നീട് മലയാളികളുടെ നിത്യ ജീവിതത്തിന്റെ ഭാഗമായി മാറിയ കലാകാരനായിരുന്നു അദ്ദേഹം. നവാസിനെപ്പോലെ തന്നെ മലയാളിയ്ക്ക് സുപരിചിതയാണ് ഭാര്യ രഹ്ന. ഇന്ന് നവാസിന്റെ ഓര്‍മകള്‍ക്കൊപ്പം ജീവിക്കുകയാണ് രഹ്ന.
നവാസിനൊപ്പമുള്ള ചിത്രം പങ്കുവച്ചു കൊണ്ട് രഹ്ന കുറിച്ച വാക്കുകള്‍ ആരാധകരുടെ മനസിലൊരു നോവാവുകയാണ്. താനും നവാസും അവസാനമായി ഒരുമിച്ച്, പങ്കെടുത്തൊരു പരിപാടിയില്‍ നിന്നുള്ള ചിത്രമാണ് രഹ്ന പങ്കുവച്ചത്. ഇതായിരുന്നു തങ്ങളുടെ അവസാനത്തെ കൂടിക്കാഴ്ചയെന്നാണ് രഹ്ന പറയുന്നത്.
''ഇതായിരുന്നു നമ്മളുടെ അവസാനത്തെ കൂടിക്കാഴ്ച. ശരിയായി യാത്ര പറയാന്‍ പോലും സാധിച്ചില്ല എന്ന് അറിയുന്നതാണ് ഏറ്റവും വേദനിപ്പിക്കുന്ന കാര്യം'' എന്നാണ് രഹ്ന കുറിച്ചിരിക്കുന്നത്. പിന്നാലെ കമന്റിലൂടെ നിരവധി പേരാണ് രഹ്നയെ ആശ്വസിപ്പിക്കാനെത്തുന്നത്. ' സമാധാനിക്ക് ഇത്ത, റബ്ബ് നല്‍കുന്നതെന്തും നമ്മള്‍ നേരിട്ടല്ലേ പറ്റൂ. അതിന്റെ ഹെവിനെസ് അറിയാം, വാപ്പ പോയതോടെ അനുഭവിച്ചു കൊണ്ടിരിക്കുവാണ്. പക്ഷേ സഹിച്ചല്ലേ പറ്റു നമുക്ക്' എന്നായിരുന്നു ഒരു കമന്റ്.
നേരത്തെ, തന്റേയും നവാസിന്റേയും വിവാഹ വാര്‍ഷികത്തിന് രഹ്ന പങ്കുവച്ച കുറിപ്പും ചര്‍ച്ചയായിരുന്നു. 'ഇന്ന് ഞങ്ങളുടെ വിവാഹ വാര്‍ഷികം ആണ്. നവാസ്ക്കയുടെ ആത്മാവിന്റെ കൈ പിടിച്ച് ഇന്നും ഞാന്‍ തൈ നട്ടു , വര്‍ഷങ്ങളായി ചെയ്തു വരുന്നത് കൊണ്ട് ചെയ്യാതിരിക്കാനും പറ്റുന്നില്ല മനസ്സിന്റെ വിഷമം കാരണം ചെയ്യാനും പറ്റുന്നില്ല. ചില സമയത്ത് വിധി നമ്മുടെ ഹൃദയത്തെ കീറിമുറിക്കും ഈശ്വരന്‍ അത് ഹീല്‍ ആക്കും, പക്ഷെ ആ പാടുകള്‍ നമ്മുടെ മനസ്സില്‍ അങ്ങിനെ കിടക്കും' എന്നായിരുന്നു രഹ്ന കുറിച്ചത്.
''ഞാനും മക്കളും നടുക്കടലില്‍ പെട്ട അവസ്ഥയാണ് എത്രനേരം നടുക്കടലില്‍ പിടിച്ചു നില്‍ക്കാന്‍ പറ്റും എന്ന് എനിക്കറിയില്ല. നവാസ്ക്ക പോയി ഇത്രയും നാളായിട്ടും ആര്‍ക്കും ഒരു ബാധ്യതയും ആയിട്ടില്ല. അത് പടച്ചവന്‍ എന്നെ ഒന്ന് താങ്ങിപിടിച്ചതുകൊണ്ടാണ്. മരണം വരെ ആരില്‍ നിന്നും ഒന്നും വാങ്ങാതെ ഇങ്ങനെ തന്നെ മുന്നോട്ടുപോണം എന്നാണ് ആഗ്രഹം, അതിനു ഞാന്‍ വര്‍ക്ക് ചെയ്തേ പറ്റൂ'' എന്നുമായിരുന്നു രഹ്നയുടെ കുറിപ്പ്.
അടുത്തിടെയാണ് താൻ കാൻസറിനെതിരെ പോരാടുകയാണെന്ന് സോഷ്യൽ മീഡിയ താരം രേണു സുധി വെളിപ്പെടുത്തിയത്. ചികിത്സ സംബന്ധിച്ച വിവരങ്ങളും രേണു സോഷ്യൽ മീഡിയയിലൂടെ പങ്കുവെയ്ക്കുന്നുണ്ട്. കീമോ സെഷൻസ് പൂർത്തിയാക്കി പതിയെ പഴയ ജീവിതത്തിലേക്ക് തിരിച്ചുവന്നു കൊണ്ടിരിക്കുകയാണ് രേണുവിപ്പോൾ.
ഇപ്പോഴിതാ ബിഗ് ബോസിൽ വെച്ച് മോഹൻലാൽ ചോദിച്ച ഒരു ചോദ്യവും അതിന് താൻ നൽകിയ മറുപടിയും ജീവിതത്തിൽ അറംപറ്റിയതുപോലെ സംഭവിച്ചിരിക്കുകയാണെന്ന് പറയുകയാണ് രേണു സുധി. ഇതു സംബന്ധിച്ച് ഓൺലൈൻ മാധ്യമങ്ങളുടെ ചോദ്യത്തിന് മറുപടി നൽകുകയായിരുന്നു താരം.
എന്നാൽ താനിപ്പോൾ സന്തോഷവതിയാണെന്നും ദൈവം തന്നെ ഇതുവരെ എത്തിച്ചെന്നും രേണു കൂട്ടിച്ചേർത്തു. ''ലാലേട്ടൻ അന്നു ചോദിച്ചത് ജീവിതത്തിൽ അറം പറ്റിയതു പോലെയായിപ്പോയി. മൊട്ടയടിച്ചു. ഇപ്പോൾ മുടിയൊക്കെ വളരുന്നുണ്ട്. ഈ കാണുന്നതൊക്കെ വിഗ്ഗാണ്. പക്ഷേ, ദൈവം എന്നെ ഇത്രത്തോളം നിർത്തിയതിൽ ഞാൻ ഹാപ്പിയാണ്. ഒരുപാട് നല്ല ആളുകളുടെ പ്രാർഥന, വഴിപാട്, നേർച്ച ഇതൊക്കെയാണ് എന്നെ മുൻപോട്ട് കൊണ്ടുപോകുന്ന ശക്തി".- രേണു പറഞ്ഞു.
ബിഗ് ബോസ് മലയാളം റിയാലിറ്റി സീസൺ 7 ലെ മത്സരാർഥിയായിരുന്നു രേണു സുധി. ഷോയിലെ വീക്കെൻഡ് എപ്പിസോഡിലായിരുന്നു മോഹൻലാൽ രേണുവിനോട് ഇക്കാര്യം പറഞ്ഞത്. "തലമുടി മൊട്ടയടിക്കാൻ റെഡിയാണോ?" എന്നായിരുന്നു ചോദ്യം. ഇല്ല ലാലേട്ടാ, ഇപ്പോൾ ഉള്ളതു തന്നെ എക്സ്റ്റെൻഷൻ വെച്ചതാണ് എന്നായിരുന്നു ചിരിയോടെ രേണുവിന്റെ മറുപടി.
രേണുവിന്റെ മറുപടി കേട്ട് മോഹൻലാൽ ചിരിക്കുന്നതും വിഡിയോയിൽ കാണാം. മാനസികമായി പ്രയാസങ്ങളുണ്ടെന്നും തനിക്ക് കുട്ടികളെ കാണണമെന്നും ഷോയിൽ തുടരാൻ കഴിയുന്നില്ലെന്നും പറഞ്ഞ് ബിഗ് ബോസ് ഹൗസിൽ നിന്ന് 34-ാം ദിവസം രേണു സ്വമേധയാ പുറത്തു പോകുകയായിരുന്നു.
സ്റ്റേജ് ഷോകളിലും സിനിമയിലും ഒന്നിച്ച് അഭിനയിച്ച്, ഒടുവിൽ ജീവിതത്തിലും ഒന്നായവരാണ് നവാസും രഹ്നയും. ഒരു വർഷം മുൻപാണ് ഹൃദായാഘാതത്തെത്തുടർന്ന് നവാസ് മരണപ്പെടുന്നത്. നവാസിനെക്കുറിച്ച് സംസാരിക്കുമ്പോഴെല്ലാം പലരും ഓർക്കുന്നൊരു മുഖമാണ് രഹ്നയുടേതും. ഇപ്പോഴിതാ തങ്ങളുടെ വിവാഹ വാർഷിക ദിനത്തിൽ രഹ്ന പങ്കുവെച്ച ഹൃദയസ്പർശിയായ പോസ്റ്റാണ് പലരുടെയും ശ്രദ്ധ നേടുന്നത്.
''ഇന്ന് ഞങ്ങളുടെ വിവാഹ വാർ‌ഷികം ആണ്. നവാസ്ക്കയുടെ ആത്മാവിന്റെ കൈ പിടിച്ച് ഇന്നും ഞാൻ തൈ നട്ടു, വർഷങ്ങളായി ചെയ്തു വരുന്നത് കൊണ്ട് ചെയ്യാതിരിക്കാനും പറ്റുന്നില്ല, മനസ്സിന്റെ വിഷമം കാരണം ചെയ്യാനും പറ്റുന്നില്ല. ചില സമയത്ത് വിധി നമ്മുടെ ഹൃദയത്തെ കീറിമുറിക്കും ഈശ്വരൻ അത് heal ആക്കും, പക്ഷെ ആ പാടുകൾ നമ്മുടെ മനസ്സിൽ അങ്ങിനെകിടക്കും. ഞാനും മക്കളും നടുക്കടലിൽ പെട്ട അവസ്ഥയാണ് എത്രനേരം നടുക്കടലിൽ പിടിച്ചു നിൽക്കാൻ പറ്റും എന്ന് എനിക്കറിയില്ല. നവാസ്ക്ക പോയി ഇത്രയും നാളായിട്ടും ആർക്കും ഒരു ബാധ്യതയും ആയിട്ടില്ല. അത് പടച്ചവൻ എന്നെ ഒന്ന് താങ്ങിപിടിച്ചതുകൊണ്ടാണ്. മരണം വരെ ആരിൽനിന്നും ഒന്നും വാങ്ങാതെ ഇങ്ങനെ തന്നെ മുന്നോട്ടുപോണം എന്നാണ് ആഗ്രഹം, അതിനു ഞാൻ ജോലി ചെയ്തേ പറ്റൂ'', എന്നാണ് വിവാഹ ചിത്രങ്ങൾ പങ്കുവെച്ചുകൊണ്ട് രഹ്ന കുറിച്ചത്.
2002ലായിരുന്നു നവാസിന്റെയും രഹ്നയുടെയും വിവാഹം. ഇവർക്ക് മൂന്ന് മക്കളുണ്ട്. വിവാഹശേഷം അഭിനയത്തിൽ നിന്ന് ഇടവേളയെടുത്ത രഹ്ന, വർഷങ്ങൾക്കുശേഷം 'ഇഴ' എന്ന ചിത്രത്തിലൂടെ അഭിനയരംഗത്തേയ്ക്ക് തിരിച്ചെത്തിയിരുന്നു. ഈ സിനിമയിൽ നവാസിന്റെ നായികയായാണ് രഹ്ന അഭിനയിച്ചത്. ഇപ്പോൾ ഹാപ്പി ലൂപ്പ് എന്ന ചിത്രത്തിലും രഹ്ന അഭിനയിക്കുന്നുണ്ട്. കരിയറിൽ സജീവമായി തുടരുന്നതിനിടെയാണ് നവാസിന്റെ അപ്രതീക്ഷിത മരണം. 'പ്രകമ്പനം' എന്ന സിനിമയുടെ ചിത്രീകരണത്തിനായി ചോറ്റാനിക്കരയിലെത്തിയ നവാസിന് ഹോട്ടൽ മുറിയിൽ വെച്ച് ഹൃദായാഘാതം സംഭവിക്കുകയായിരുന്നു. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
ബിഗ് ബോസിലൂടെ മലയാളികള്‍ക്ക് പ്രിയങ്കരായി മാറിയവരാണ് ആദിലയും നൂറയും. ലെസ്ബിയന്‍ പങ്കാളികളായ ഇവരും ഷോയിലൂടെ നേടിയത് വലിയ സ്വീകാര്യതയാണ്. ഷോയ്ക്കിടെ സഹതാരം ഇരുവരേയും വീട്ടില്‍ കയറ്റില്ലെന്ന് പറഞ്ഞപ്പോള്‍ അവതാരകനായ മോഹന്‍ലാല്‍ തന്റെ വീട്ടിലേക്ക് ക്ഷണിച്ചത് വലിയ ചര്‍ച്ചയായി മാറിയിരുന്നു. ബിഗ് ബോസ് പുതിയ സീസണ്‍ പകുതിയിലെത്തി നില്‍ക്കുമ്പോള്‍ മോഹന്‍ലാലിന്റെ അന്നത്തെ ക്ഷണം എന്തായെന്ന് പറയുകയാണ് ആദിലയും നൂറയും.
തങ്ങളുടെ യൂട്യൂബ് ചാനലില്‍ പങ്കുവച്ച വിഡിയോയിലൂടെയായിരുന്നു ആദിലയുടേയും നൂറയുടേയും പ്രതികരണം. മോഹന്‍ലാല്‍ പിന്നീട് വിളിച്ചോ, വീട്ടിലേക്ക് ക്ഷണിച്ചോ എന്നൊക്കെ പലരും ചോദിക്കാറുണ്ടെന്നും അതിനാലാണ് ഇപ്പോള്‍ മറുപടി നല്‍കുന്നതെന്നും ആദിലയും നൂറയും പറയുന്നു.
''പിള്ളേരെ ലാലേട്ടന് വിളിച്ചോ എന്ന് ഇപ്പോഴും പലരും ചോദിക്കുന്നുണ്ട്. ലാലേട്ടന് ഫിനാലെയ്ക്ക് കണ്ടപ്പോള്‍ യു ആര്‍ ഓള്‍വെയ്‌സ് വെല്‍ക്കം എന്ന് പറഞ്ഞിരുന്നു. രണ്ടു പേരുടേയും സമയം നോക്കിയിട്ട് ഒരു ദിവസം രണ്ട് കൂട്ടരും കാണുമെന്നും ഒരുമിച്ച് ഭക്ഷണം കഴിക്കാമെന്നും പറഞ്ഞിരുന്നു. ഷോയില്‍ നില്‍ക്കുമ്പോഴും ലാലേട്ടന് പറഞ്ഞിരുന്നു. ഫിനാലെയ്ക്കും പറഞ്ഞിരുന്നു'' എന്നാണ് ആദില പറയുന്നത്.
''അവസാന വര്‍ഷം ഡിസംബറില്‍ ലാലേട്ടന് ഓക്കെ ആയിട്ടുള്ളൊരു ഡേറ്റ് പറഞ്ഞിരുന്നു മീറ്റ് ചെയ്യാന്‍ വേണ്ടി. പക്ഷെ ആ സമയത്താണ് ലാലേട്ടന്റെ അമ്മയ്ക്ക് വയ്യാതായത്. അതിനാല്‍ നീട്ടി നീട്ടിവെക്കേണ്ടി വന്നത്. പിന്നെ അങ്ങോട്ട് ഓരോ ചടങ്ങുകളും കാര്യങ്ങളും ഉണ്ടായിരുന്നല്ലോ. അങ്ങനെ പോയി പോയി, അത് വര്‍ക്കായില്ല'' എന്നും ആദില പറഞ്ഞു.
ലാഗ് വന്നു. രണ്ടു പേര്‍ക്കും. ലാലേട്ടന് തിരക്കുള്ള മനുഷ്യന്‍ അല്ലേ. ഞങ്ങളും പിന്നെ ഫോളോ അപ്പ് ചെയ്യാന്‍ പോയില്ലെന്നാണ് നൂറ പറയുന്നത്. നടക്കുമ്പോള്‍ നടക്കട്ടെ. സമയം ഉണ്ടല്ലോ. ലാലേട്ടന് പറഞ്ഞതാണ്. ലാലേട്ടന് ഓര്‍മയുമുണ്ടാകും. അത് അതിന്റെ സമയത്ത് നടക്കുമെന്ന് ആദിലയും പറയുന്നു. മോഹന്‍ലാലിന്റെ ക്ഷണം മുന്‍കൂട്ടി തയ്യാറാക്കിയ തിരക്കഥയാണോ എന്ന ചോദ്യത്തിനും ഇരുവരും മറുപടി പറയുന്നുണ്ട്.
''ഒരിക്കലും സ്‌ക്രിപ്റ്റഡ് ആയിരുന്നില്ല. അദ്ദേഹം മനസില്‍ നിന്നുമാണത് പറഞ്ഞത്. ഇഷ്ടത്തോടെയാണ് പറഞ്ഞത്. വിളിക്കേണ്ട സാഹചര്യവും വന്നതാണ്. പക്ഷെ ഓരോ സാഹചര്യങ്ങള്‍ മൂലം തെന്നിമാറിപ്പോയതാണ്.'' എന്നാണ് നൂറ പറഞ്ഞത്. ''നമ്മളെ സപ്പോര്‍ട്ട് ചെയ്ത എപ്പിസോഡിനെ തുടര്‍ന്ന് ലാലേട്ടന് സൈബര്‍ അറ്റാക്ക് കിട്ടിയിരുന്നു. അത് കഴിഞ്ഞിട്ടും ഒരു മനുഷ്യന്‍ ഫിനാലെയ്ക്ക് കണ്ടപ്പോള്‍ വിളിക്കുന്ന് ആരെങ്കിലും പറഞ്ഞു കൊടുത്തിട്ടാകുമെന്ന് തോന്നുന്നില്ല. അങ്ങനെയെങ്കില്‍ മിണ്ടാതിരുന്നാല്‍ മതിയല്ലോ. ഞങ്ങളെ ക്ഷണിച്ചിരുന്നു.അതിന്റെ സമയം ആകുമ്പോള്‍ മീറ്റ് ചെയ്യും'' എന്നാണ് ആദില പറയുന്നത്.
BUSINESS
ചന്ദ്രനിൽ മനുഷ്യരുടെ സ്ഥിരസാന്നിധ്യം ഉറപ്പാക്കാനുള്ള പദ്ധതികളുമായി നാസ. ഇതിന്റെ ഭാഗമായി പുതുതലമുറ ബഹിരാകാശ സഞ്ചാരികളെ തിരഞ്ഞെടുക്കുന്നതിനായി അപേക്ഷ ക്ഷണിച്ചു. നിലവിൽ ഹ്രസ്വകാല ദൗത്യങ്ങൾക്കായി മാത്രമാണ് മനുഷ്യർ ചന്ദ്രനിലെത്തുന്നത്. എന്നാൽ ഭാവിയിൽ ചന്ദ്രനിൽ സ്ഥിരമായ മനുഷ്യവാസ കേന്ദ്രം സ്ഥാപിക്കുകയാണ് നാസയുടെ ലക്ഷ്യം. അവിടെ താമസിച്ച് വിവിധ ഗവേഷണങ്ങളിലും ദൗത്യങ്ങളിലും പങ്കാളികളാകാൻ കഴിയുന്നവരെയാണ് ഇപ്പോൾ തേടുന്നത്.
നാസയുടെ ആർട്ടെമിസ് പദ്ധതിയുടെ ഭാഗമായ ദൗത്യങ്ങൾക്ക് പിന്തുണ നൽകുന്നതിനൊപ്പം ഭാവിയിൽ മനുഷ്യരെ ചൊവ്വയിലേക്ക് അയയ്ക്കുന്നതിനുള്ള സാങ്കേതികവിദ്യയും അനുഭവപരിചയവും വികസിപ്പിക്കാനും പുതിയ ബഹിരാകാശ സഞ്ചാരികളുടെ സേവനം പ്രയോജനപ്പെടുത്തും. ദീർഘകാലം ഭൂമിയിൽനിന്ന് അകന്ന് ബഹിരാകാശത്ത് കഴിയാൻ ആവശ്യമായ ശാരീരികവും മാനസികവുമായ ശേഷി വളർത്തിയെടുക്കുന്നതിനുള്ള കഠിന പരിശീലനവും തിരഞ്ഞെടുക്കപ്പെടുന്നവർക്ക് ലഭിക്കും.
അമേരിക്കൻ പൗരന്മാർക്ക് മാത്രമാണ് അപേക്ഷിക്കാൻ അവസരം. സയൻസ്, ടെക്നോളജി, എൻജിനീയറിങ്, മാത്തമാറ്റിക്സ് (STEM) വിഷയങ്ങളിൽ ബിരുദാനന്തര ബിരുദവും കുറഞ്ഞത് മൂന്ന് വർഷത്തെ തൊഴിൽപരിചയവും ഉണ്ടായിരിക്കണം. മെഡിക്കൽ ബിരുദമുള്ളവർക്കും നിശ്ചിത ഡോക്ടറൽ യോഗ്യതയുള്ളവർക്കും പൈലറ്റുമാർക്കും അപേക്ഷിക്കാം. ഡിസംബർ നാലിന് രാവിലെ 10.29 (ഇന്ത്യൻ സമയം) വരെയാണ് അപേക്ഷ സമർപ്പിക്കാനുള്ള സമയപരിധി.
ദീർഘകാല ബഹിരാകാശ ദൗത്യങ്ങൾക്ക് അനുയോജ്യരാണോ എന്ന് നാസയുടെ മെഡിക്കൽ സംഘം ആദ്യം പരിശോധിക്കും. ഈ ഘട്ടം വിജയിക്കുന്നവരെ തുടർന്നുള്ള വിവിധ പരീക്ഷണങ്ങൾക്കും വിലയിരുത്തലുകൾക്കും വിധേയരാക്കും. നേതൃപാടവം, സംഘമായി പ്രവർത്തിക്കാനുള്ള കഴിവ്, ആശയവിനിമയ മികവ്, സമ്മർദങ്ങൾ കൈകാര്യം ചെയ്യാനുള്ള ശേഷി തുടങ്ങിയവയും തിരഞ്ഞെടുപ്പിൽ നിർണായകമാകും.
തിരഞ്ഞെടുക്കപ്പെടുന്നവർക്ക് ഹൂസ്റ്റണിലെ നാസയുടെ ജോൺസൺ സ്പേസ് സെന്ററിൽ ഏകദേശം രണ്ടുവർഷം നീളുന്ന പ്രാഥമിക പരിശീലനം നൽകും. ബഹിരാകാശത്ത് നടന്ന് പ്രവർത്തനങ്ങൾ നടത്തുക, പേടകങ്ങൾ നിയന്ത്രിക്കുക, വിമാനങ്ങൾ പറത്തുക, റോബോട്ടിക് ഉപകരണങ്ങൾ പ്രവർത്തിപ്പിക്കുക തുടങ്ങിയവ പരിശീലനത്തിന്റെ ഭാഗമായിരിക്കും. ചന്ദ്രനിലെ ദീർഘകാല ദൗത്യങ്ങളിൽ നേരിടേണ്ടിവരുന്ന വെല്ലുവിളികൾക്കായി ഇവരെ സജ്ജരാക്കുകയാണ് പരിശീലനത്തിന്റെ ലക്ഷ്യം.
ആർട്ടെമിസ് പദ്ധതിയുടെ ഭാഗമായി 2028-ൽ മനുഷ്യരെ വീണ്ടും ചന്ദ്രനിലെത്തിക്കാനാണ് നാസ ലക്ഷ്യമിടുന്നത്. ഭാവിയിൽ ചന്ദ്രനിൽ സ്ഥിരമായ മനുഷ്യസാന്നിധ്യം ഉറപ്പാക്കുന്നതിനുള്ള അടിത്തറ പാകുന്നതായിരിക്കും ഈ ദൗത്യങ്ങൾ. ഭൂമിക്കപ്പുറത്തേക്ക് മനുഷ്യവാസം വ്യാപിപ്പിക്കാനുള്ള ശ്രമങ്ങളിൽ നിർണായക ചുവടുവയ്പ്പായാണ് പുതിയ ബഹിരാകാശ സഞ്ചാരി തിരഞ്ഞെടുപ്പിനെ കാണുന്നത്.
ആര്‍ട്ടിഫിഷ്യല്‍ ഇന്റലിജന്‍സ് രംഗത്തെ മത്സരം ശക്തമാകുന്നതിനിടെ പുതിയ രണ്ട് എഐ മോഡലുകള്‍ അവതരിപ്പിച്ച് ആന്ത്രോപിക്. ക്ലോഡ് ഫേബിള്‍ 5.2, ക്ലോഡ് മിത്തോസ് 5.2 എന്നിവയാണ് കമ്പനി പുറത്തിറക്കിയത്. എഐയുടെ വികസനം മന്ദഗതിയിലാക്കണമെന്ന് കമ്പനി സിഇഒ ഡാരിയോ അമോഡെയ് ആവശ്യപ്പെട്ടതിന് ശേഷമുള്ള ആദ്യത്തെ പ്രധാന മോഡല്‍ അവതരണമാണിത്. കമ്പനിയുടെ പ്രാരംഭ ഓഹരി വില്‍പ്പനയായ ഐപിഒ സംബന്ധിച്ച ഒരുക്കങ്ങള്‍ പുരോഗമിക്കുന്നതിനിടെയാണ് പുതിയ നീക്കം.
മുന്‍ പതിപ്പുകളെ അപേക്ഷിച്ച് 30 ശതമാനം വരെ വേഗത്തില്‍ മറുപടികള്‍ നല്‍കാന്‍ പുതിയ മോഡലുകള്‍ക്ക് കഴിയുമെന്നാണ് ആന്ത്രോപിക്കിന്റെ അവകാശവാദം. ഫേബിള്‍ 5.1, മിത്തോസ് 5.1 പതിപ്പുകളെ അപേക്ഷിച്ച് 20 ശതമാനം കുറഞ്ഞ ചെലവിലും ഇവ ഉപയോഗിക്കാം. ഒരു ദശലക്ഷം ഇന്‍പുട്ട് ടോക്കണുകള്‍ക്ക് എട്ട് ഡോളറും ഔട്ട്പുട്ട് ടോക്കണുകള്‍ക്ക് 40 ഡോളറുമാണ് പുതിയ നിരക്ക്. കോഡിങ്, യുക്തിപരമായ വിശകലനം, ചിത്രങ്ങള്‍ തിരിച്ചറിയുന്നതിനും മനസിലാക്കുന്നതിനുമുള്ള കഴിവ് തുടങ്ങിയ മേഖലകളില്‍ പുതിയ മോഡലുകള്‍ മെച്ചപ്പെട്ട പ്രകടനം കാഴ്ചവയ്ക്കുന്നതായും കമ്പനി പറയുന്നു.
പരീക്ഷണഘട്ടത്തില്‍ സങ്കീര്‍ണമായ സോഫ്റ്റ്വെയര്‍ മാറ്റങ്ങള്‍ പൂര്‍ത്തിയാക്കാനും തുടക്കം മുതല്‍ മൂന്ന് പ്രവര്‍ത്തനക്ഷമമായ ഇലക്ട്രോണിക് ഉപകരണങ്ങള്‍ രൂപകല്‍പന ചെയ്യാനും ഇവ സഹായിച്ചു. തമോഗര്‍ത്തങ്ങളുടെ ഭൗതികശാസ്ത്രവുമായി ബന്ധപ്പെട്ട പരിഹരിക്കപ്പെടാത്ത രണ്ട് പ്രശ്‌നങ്ങളില്‍ പുരോഗതി കൈവരിക്കാനും റോബോട്ടിക്‌സ് പരീക്ഷണങ്ങളില്‍ മികച്ച പ്രകടനം കാഴ്ചവയ്ക്കാനും മോഡലുകള്‍ക്ക് സാധിച്ചു. ഫെര്‍മാറ്റിന്റെ അവസാന സിദ്ധാന്തത്തിന്റെ തെളിവ് ഗണിതശാസ്ത്രപരമായി ഔപചാരികമാക്കാന്‍ 30 മണിക്കൂര്‍ മാത്രമാണ് വേണ്ടിവന്നതെന്നും ആന്ത്രോപിക് അവകാശപ്പെടുന്നു.
രണ്ട് മോഡലുകളും ഒരേ അടിസ്ഥാന എഐ സാങ്കേതികവിദ്യയിലാണ് നിര്‍മിച്ചിരിക്കുന്നതെങ്കിലും സുരക്ഷാ നിയന്ത്രണങ്ങളിലും ലഭ്യതയിലും വ്യത്യാസമുണ്ട്. അപകടസാധ്യതയുള്ള സൈബര്‍ സുരക്ഷാ, ജൈവശാസ്ത്ര ഗവേഷണ ആവശ്യങ്ങള്‍ക്കുള്ള ഉപയോഗം പരിമിതപ്പെടുത്തുന്ന സുരക്ഷാ സംവിധാനങ്ങളോടെയാണ് ഫേബിള്‍ 5.2 എത്തുന്നത്. അതിനാല്‍ കൂടുതല്‍ ഉപയോക്താക്കള്‍ക്ക് ഇത് ലഭ്യമാകും. എന്നാല്‍ താരതമ്യേന കുറഞ്ഞ സുരക്ഷാ നിയന്ത്രണങ്ങളുള്ള മിത്തോസ് 5.2, സൈബര്‍ സുരക്ഷാ, ബയോമെഡിക്കല്‍ ഗവേഷണ മേഖലകളില്‍ പ്രവര്‍ത്തിക്കുന്ന പരിശോധനയ്ക്ക് വിധേയമായ സ്ഥാപനങ്ങള്‍ക്ക് മാത്രമാണ് ലഭിക്കുക.
പരമ്പരാഗത ചാറ്റ്‌ബോട്ട് ഉപയോഗത്തിനപ്പുറം സങ്കീര്‍ണമായ ജോലികള്‍ ചെയ്യുന്നതിനാണ് പുതിയ മോഡലുകള്‍ രൂപകല്‍പന ചെയ്തിരിക്കുന്നത്. ഒരേസമയം നിരവധി എഐ ഏജന്റുകളെ ഉപയോഗിച്ച് കോഡ് എഴുതാനും പരിശോധിക്കാനും തിരുത്താനും ഫേബിള്‍ 5.2ന് സാധിക്കും. ആയിരത്തിലധികം എഐ ഏജന്റുകളെ ഉപയോഗിച്ച് എട്ട് ദിവസംകൊണ്ട് പ്രവര്‍ത്തനക്ഷമമായ ഒരു ഓപ്പറേറ്റിങ് സിസ്റ്റം നിര്‍മിച്ചതായും കമ്പനി വെളിപ്പെടുത്തി. ഇതേ രീതിയില്‍ ആയിരം ഏജന്റുകളെ ഉപയോഗിച്ച് ഫെര്‍മാറ്റിന്റെ അവസാന സിദ്ധാന്തത്തിന്റെ തെളിവ് ഔപചാരികമാക്കുന്നതിനും ശാസ്ത്രജ്ഞരെ സഹായിച്ചു.
സൈബര്‍ സുരക്ഷാ ഗവേഷണത്തിനും സോഫ്റ്റ്വെയറുകളിലെ സുരക്ഷാ വീഴ്ചകള്‍ കണ്ടെത്തുന്നതിനും അവ പരിഹരിക്കുന്നതിനും മിത്തോസ് 5.2 കൂടുതല്‍ അനുയോജ്യമാണെന്നാണ് കമ്പനിയുടെ വിലയിരുത്തല്‍. ജീന്‍ തെറാപ്പി ഗവേഷണങ്ങളില്‍ ഉപയോഗിക്കുന്ന അഡിനോ അസോസിയേറ്റഡ് വൈറസുകളുമായി ബന്ധപ്പെട്ട 34 പ്രോട്ടീന്‍ ഘടനകളില്‍ 28 എണ്ണവും വിജയകരമായി മാതൃകയാക്കാനും മോഡലിന് സാധിച്ചു.
നിലവില്‍ ക്ലോഡ്, ക്ലോഡ് കോഡ്, എപിഐ എന്നിവയുള്‍പ്പെടെയുള്ള ആന്ത്രോപിക്കിന്റെ പ്ലാറ്റ്ഫോമുകളില്‍ ഫേബിള്‍ 5.2 ലഭ്യമാണ്. ആമസോണ്‍ വെബ് സര്‍വീസസ്, ഗൂഗിള്‍ ക്ലൗഡ്, മൈക്രോസോഫ്റ്റ് അസ്യൂര്‍ എന്നിവ വഴിയും ഡെവലപ്പര്‍മാര്‍ക്ക് ഇത് ഉപയോഗിക്കാം. അതേസമയം, മിത്തോസ് 5.2 എല്ലാ ഉപയോക്താക്കള്‍ക്കും ലഭ്യമാക്കിയിട്ടില്ല. ആന്ത്രോപിക് നടത്തുന്ന പരിശോധനാ നടപടികള്‍ പൂര്‍ത്തിയാക്കുന്ന സ്ഥാപനങ്ങള്‍ക്കാണ് നിലവില്‍ ഇതിലേക്ക് പ്രവേശനം അനുവദിക്കുക.
ആപ്പിളിന്റെ എഐ (AI) സേവനങ്ങൾക്ക് അധിക പണം ഈടാക്കാനൊരുങ്ങി കമ്പനി. ഇതിന്റെ ഭാഗമായി 50 ഡോളറിന്റെ പുതിയ പാക്കേജ് ഇന്ത്യയിലും അവതരിപ്പിച്ചു. Creator Studio ആപ്പുകളിലെ ആർട്ടിഫിഷ്യൽ ഇന്റലിജൻസ് (AI) സേവനങ്ങളുടെ സൗജന്യ പ്രതിമാസ ഉപയോഗ പരിധി അവസാനിക്കുന്നവർക്കായാണ് പുതിയ പാക്കേജ്. കൂടുതൽ സേവനങ്ങൾ ഉപയോഗിക്കാനായി 49.99 ഡോളറിന്റെ (ഏകദേശം 4,500 രൂപ) Intelligence Usage Pack ആണ് കമ്പനി അവതരിപ്പിച്ചിരിക്കുന്നത്. ഒറ്റത്തവണ പണമടച്ച് വാങ്ങാവുന്ന ഈ പാക്ക് ഇന്ത്യയിലും ലഭ്യമാക്കിയിട്ടുണ്ട്.
Creator Studio സബ്‌സ്‌ക്രിപ്ഷൻ ഉപയോഗിക്കുന്നവർക്ക് നിലവിൽ പ്രതിമാസം നിശ്ചിത അളവിൽ എഐ ഫീച്ചറുകൾ സൗജന്യമായി ഉപയോഗിക്കാൻ സാധിക്കും. ചിത്രങ്ങൾ സൃഷ്ടിക്കുക, അവതരണങ്ങൾ തയ്യാറാക്കുക തുടങ്ങിയവയാണ് പ്രധാനമായും ഇതിലൂടെ ചെയ്യാനാവുക. സൗജന്യ ഉപയോഗം അവസാനിച്ചാൽ അധികമായി എഐ സേവനങ്ങൾ ഉപയോഗിക്കാനാണ് പുതിയ പാക്കേജ് അവതരിപ്പിച്ചിരിക്കുന്നത്. അധിക പണം അടച്ച് ഈ പാക്കേജ് വാങ്ങി എഐ സേവനങ്ങൾ ഉപയോഗിക്കാം.
ഒറ്റത്തവണ പണമടച്ച് വാങ്ങുന്ന ഈ പാക്കേജിന് ഒരു വർഷമാണ് കാലാവധി. ഉപയോക്താവിന്റെ ആപ്പിൾ അക്കൗണ്ടുമായാണ് പാക്ക് ബന്ധിപ്പിക്കുക.
ഏറ്റവും പുതിയ Logic Pro അപ്‌ഡേറ്റിലൂടെയാണ് ആപ്പിൾ ഈ സംവിധാനം ആദ്യമായി അവതരിപ്പിച്ചത്. ആപ്പിന്റെ മെനു ബാറിലെ Intelligence Features വിഭാഗത്തിൽ പ്രവേശിച്ച് ഉപയോഗപരിധി പരിശോധിക്കാം. സൗജന്യ പരിധി അവസാനിച്ചാൽ Buy More Usage എന്ന ഓപ്ഷൻ ലഭ്യമാകും. അതിലൂടെ പുതിയ പാക്കേജ് വാങ്ങാം. Final Cut Pro, Pixelmator Pro, iWork സ്യൂട്ട് തുടങ്ങിയ Creator Studio ആപ്പുകളിലേക്കും നവംബറിൽ തന്നെ ഈ സംവിധാനം വ്യാപിപ്പിക്കാനാണ് ആപ്പിളിന്റെ നീക്കം.
HEALTH
ശരീരത്തിന് ആവശ്യമായ പ്രോട്ടീൻ ലഭ്യമാക്കാനുള്ള ലളിതമായ മാർഗങ്ങളിലൊന്നാണ് മുട്ട. പ്രഭാതഭക്ഷണമായും വ്യായാമത്തിനുശേഷമുള്ള ഭക്ഷണമായും പുഴുങ്ങിയ മുട്ട പതിവായി കഴിക്കുന്നവരുണ്ട്. തിരക്കുള്ള ദിവസങ്ങളിൽ സമയം ലാഭിക്കാൻ ഒരേസമയം കുറച്ച് മുട്ടകൾ പുഴുങ്ങി ഫ്രിഡ്ജിൽ സൂക്ഷിക്കുന്നതും സാധാരണമാണ്. പുഴുങ്ങിയതുകൊണ്ടുമാത്രം മുട്ട ദീർഘകാലം കേടാകാതെ ഇരിക്കില്ല. പാകം ചെയ്തശേഷം എങ്ങനെ കൈകാര്യം ചെയ്യുന്നു, എവിടെ സൂക്ഷിക്കുന്നു തുടങ്ങിയ കാര്യങ്ങളും പ്രധാനമാണ്. പുഴുങ്ങിയ മുട്ട എത്ര ദിവസം കേടുകൂടാതെ ഇരിക്കും? ഫ്രീസറിൽ സൂക്ഷിക്കുന്നത് സുരക്ഷിതമാണോ? മുട്ടയുടെ ഗുണനിലവാരവും ഭക്ഷ്യസുരക്ഷയും ഉറപ്പാക്കാൻ ശ്രദ്ധിക്കേണ്ട കാര്യങ്ങൾ എന്തൊക്കെയാണ്?
അമേരിക്കൻ കൃഷിവകുപ്പിന്റെ ഭക്ഷ്യസുരക്ഷാ വിഭാഗമായ USDAയുടെ മാർഗനിർദേശപ്രകാരം നന്നായി പുഴുങ്ങിയ മുട്ട ഫ്രിഡ്ജിൽ സൂക്ഷിച്ചാൽ ഒരാഴ്ചവരെ ഉപയോഗിക്കാം. മുട്ടത്തോട് നീക്കാത്തതും തോട് കളഞ്ഞതുമായ മുട്ടകൾക്ക് ഈ നിർദേശം ബാധകമാണ്.
എന്നാൽ പുഴുങ്ങിയ മുട്ട അധികനേരം പുറത്തുവെക്കരുത്. പാകം ചെയ്തശേഷം രണ്ട് മണിക്കൂറിനുള്ളിൽ ഫ്രിഡ്ജിൽ എത്തിക്കണം. അന്തരീക്ഷ താപനില 32 ഡിഗ്രി സെൽഷ്യസിന് മുകളിലാണെങ്കിൽ ഈ സമയം ഒരു മണിക്കൂറായി കുറയും. അതിനുശേഷം ഫ്രിഡ്ജിൽ വെച്ചാലും മുട്ട സുരക്ഷിതമാണെന്ന് ഉറപ്പിക്കാനാവില്ല.
പുഴുങ്ങിയ മുട്ട ഫ്രിഡ്ജിൽ വെക്കുമ്പോൾ ഉടൻ തോട് കളയേണ്ടതില്ല. ഉപയോഗിക്കുന്നതിന് തൊട്ടുമുമ്പ് തോട് നീക്കുന്നതാണ് സൗകര്യപ്രദം. നേരത്തേ തോട് കളഞ്ഞ മുട്ട വൃത്തിയുള്ളതും അടച്ചുവയ്ക്കാവുന്നതുമായ പാത്രത്തിൽ സൂക്ഷിക്കണം. മുട്ട മറ്റു ഭക്ഷണസാധനങ്ങളുമായി നേരിട്ട് സമ്പർക്കത്തിൽ വരാതിരിക്കാനും ശ്രദ്ധിക്കണം.
പുഴുങ്ങിയ മുട്ട ഫ്രീസറിൽ സൂക്ഷിക്കുന്നത് ശുപാർശ ചെയ്യപ്പെടുന്ന രീതിയല്ല. USDAയുടെ FoodSafety.gov മാർഗനിർദേശങ്ങൾ പ്രകാരം, ഫ്രീസറിൽ വെക്കുമ്പോൾ മുട്ടയുടെ വെള്ളയ്ക്ക് റബ്ബർ പോലുള്ള കട്ടിയുള്ള ഘടന ലഭിക്കാനും രുചിയിലും ഗുണനിലവാരത്തിലും മാറ്റമുണ്ടാകാനും സാധ്യതയുണ്ട്. അതിനാൽ അടുത്ത ദിവസങ്ങളിൽ കഴിക്കാനുള്ള മുട്ട ആവശ്യാനുസരണം പുഴുങ്ങി ഫ്രിഡ്ജിൽ സൂക്ഷിക്കുന്നതാണ് ഉചിതം.
പുഴുങ്ങിയ മുട്ട രണ്ട് മണിക്കൂറിനുള്ളിൽ ഫ്രിഡ്ജിൽ എത്തിക്കുകയാണ് ആദ്യം ചെയ്യേണ്ടത്. ചൂടുള്ള കാലാവസ്ഥയിൽ ഇക്കാര്യത്തിൽ പ്രത്യേക ജാഗ്രത വേണം. വൃത്തിയുള്ളതും അടച്ചുവയ്ക്കാവുന്നതുമായ പാത്രത്തിൽ മുട്ട സൂക്ഷിക്കുക. ഫ്രിഡ്ജിൽ സ്ഥിരമായ തണുപ്പ് ലഭിക്കുന്ന ഭാഗത്ത് വെക്കുന്നതാണ് നല്ലത്. ഫ്രിഡ്ജിന്റെ ഡോറിൽ സൂക്ഷിക്കുന്നത് ഒഴിവാക്കാം. കഴിക്കാൻ ആവശ്യമായ മുട്ട മാത്രം പുറത്തെടുക്കുകയും ബാക്കിയുള്ളവ ദീർഘനേരം മുറിയിലെ താപനിലയിൽ വെക്കാതിരിക്കുകയും വേണം.
മുട്ടയ്ക്ക് അസാധാരണമായ ദുർഗന്ധം അനുഭവപ്പെടുക, നിറത്തിൽ വ്യത്യാസം കാണുക, പുറത്ത് അസ്വാഭാവികമായ ഒട്ടിപ്പിടിത്തം ഉണ്ടാകുക തുടങ്ങിയവ കേടായതിന്റെ സൂചനകളാകാം. ഇത്തരം മാറ്റങ്ങൾ ശ്രദ്ധയിൽപ്പെട്ടാൽ മുട്ട കഴിക്കരുത്. അതേസമയം, ദുർഗന്ധമില്ലെന്ന കാരണത്താൽ മാത്രം മുട്ട സുരക്ഷിതമാണെന്ന് ഉറപ്പിക്കാനും കഴിയില്ല. സൂക്ഷിച്ച കാലയളവും സംഭരണരീതിയും പരിഗണിക്കണം.
മുട്ടയുടെ വെള്ളയും മഞ്ഞക്കരുവും പൂർണമായി ഉറയ്ക്കുന്നതുവരെ നന്നായി പുഴുങ്ങണം. പാകം ചെയ്യുന്നതിന് മുമ്പും ശേഷവും കൈകളും ഉപയോഗിക്കുന്ന പാത്രങ്ങളും വൃത്തിയായി സൂക്ഷിക്കണം. പുഴുങ്ങിയ മുട്ട മുറിച്ചശേഷം ദീർഘനേരം പുറത്തുവെക്കാതെ ഫ്രിഡ്ജിൽ സൂക്ഷിക്കുക.
ഓഫീസിലേക്കോ യാത്രയ്ക്കോ മുട്ട കൊണ്ടുപോകുന്നവർ സാധാരണ ബാഗിൽ മണിക്കൂറുകളോളം സൂക്ഷിക്കുന്നത് ഒഴിവാക്കണം. തണുപ്പ് നിലനിർത്താൻ കഴിയുന്ന ഇൻസുലേറ്റഡ് ബാഗും ഐസ് പാക്കും ഉപയോഗിക്കുന്നത് സുരക്ഷിതമാണ്.
ചുരുക്കത്തിൽ, പുഴുങ്ങിയ മുട്ട ഫ്രിഡ്ജിൽ ഒരാഴ്ചവരെ സൂക്ഷിക്കാമെങ്കിലും ശരിയായ രീതിയിൽ തണുപ്പിച്ച് സൂക്ഷിക്കണമെന്നത് നിർണായകമാണ്. ഫ്രീസറിൽ വെക്കുന്നതിനേക്കാൾ ഫ്രിഡ്ജിൽ സൂക്ഷിച്ച് നിശ്ചിത സമയത്തിനുള്ളിൽ ഉപയോഗിക്കുന്നതാണ് നല്ലത്.
PRAVASI VARTHAKAL
