മോട്ടോ എഐയുടെ പിന്തുണയോടെ ആംഗ്യ-അധിഷ്ഠിത വീഡിയോ റെക്കോർഡിംഗ് സൗകര്യമുള്ള പുതിയ റേസർ 60 സ്മാർട്ട്‌ഫോൺ പുറത്തിറക്കി മോട്ടറോള. 100 ശതമാനം ട്രൂ കളർ ക്യാമറയും, ആംഗ്യ-അധിഷ്ഠിത വീഡിയോ റെക്കോർഡിംഗ് സൗകര്യവുമുള്ള ലോകത്തിലെ ആദ്യ സ്മാർട്ട്‌ഫോണെന്ന നേട്ടമാണ് റേസർ 60 ഇതിനോടകം കൈവരിച്ചിരിക്കുന്നത്. ഉപഭോക്താക്കൾക്ക് ആംഗ്യത്തിലൂടെ മാത്രം,സ്‌ക്രീനിൽ തൊടാതെ തന്നെ വീഡിയോ റെക്കോർഡ് ചെയ്യാനും ചിത്രങ്ങൾ പകർത്താനും ഇതിലൂടെ സാധിക്കും. പ്രീമിയം പേൾ മാർബിളും ഫാബ്രിക് ഫിനിഷുകളും ഉൾക്കൊള്ളുന്ന ഇന്ത്യയിലെ ആദ്യത്തെ ഫ്‌ലിപ്പ് ഫോൺ കൂടിയായ റേസർ 60 യിൽ 6.9ഇഞ്ച് എൽടിപിഒ എൽഇഡി ഡിസ്പ്ലേ, 3.6 ഇഞ്ച് എക്സ്റ്റേണൽ ഡിസ്പ്ലേ, പ്രോ-ഗ്രേഡ് 50എംപി ക്യാമറ, ക്വാഡ് പിക്‌സൽ സാങ്കേതികവിദ്യയുള്ള 32എംപി ഓട്ടോഫോക്കസ് ഫ്രണ്ട് ക്യാമറ എന്നിവയാണ് മറ്റ് പ്രത്യേകതകൾ. 8ജിബി +256 ജിബി വേരിയന്റിന് 49,999 രൂപയാണ് വില. ജൂൺ 4 മുതൽ ഇവ വിപണിയിൽ ലഭ്യമാകും.

ബലതാരമായി മലയാള സിനിമയിൽ അരങ്ങേറ്റം കുറിച്ചുകൊണ്ട് പ്രേക്ഷകർക്കിടയിൽ തന്റേതായ സ്ഥാനം വളർത്തിയെടുത്ത നിവേദ തോമസ് ഇപ്പോൾ തെലുങ്കിലും താരമാണ്.14 വർഷങ്ങൾക്ക് ശേഷം പ്രഖ്യാപിക്കുന്ന തെലങ്കാന സർക്കാരിന്റെ സംസ്ഥാന ചലച്ചിത്ര അവാർഡിൽ, മികച്ച നടിക്കുള്ള പുരസ്‌കാരമാണ് നിവേദ സ്വന്തമാക്കിയിരിക്കുന്നത്. നന്ദ കിഷോറിന്റെ സംവിധാനത്തിൽ കഴിഞ്ഞ വർഷം പുറത്തിറങ്ങിയ '35 ചിന്ന കഥ കാതു' എന്ന ചിത്രത്തിലെ പ്രകടനത്തിനാണ് ഈ അവാർഡ് തേടിയെത്തിയത്. ഒരു സാധാരണ കുടുംബത്തിലെ വീട്ടമ്മയും രണ്ടു കുട്ടികളുടെ അമ്മയുമായ സരസ്വതി എന്ന വേഷം വളരെ തൻമയത്വത്തോടു കൂടിയാണ് നിവേദ ചിത്രത്തിൽ അവതരിപ്പിച്ചത്. ആ കഥാപാത്രത്തിന്റെ എല്ലാ വികാരങ്ങളെയും, അതേ ആഴത്തിൽ മനസ്സിലാക്കാൻ സാധിക്കുന്ന അഭിനയമാണ് അതിൽ എടുത്തുപറയേണ്ടത്. നിവേദ തന്റെ സമൂഹമാധ്യമങ്ങളിലൂടെ അവാർഡ് വാർത്ത പങ്കുവച്ചതോടെ, ഏറ്റവും അർഹതപ്പെട്ട അവാർഡ് എന്നാണ് പേക്ഷകർ അതിനെ വിശേഷിപ്പിച്ചത്. ഇതേ ചിത്രത്തിന് വേണ്ടി, കഥാപാത്രത്തിന്റെ പൂർണ്ണതയെ കണക്കിലെടുത്തു കൊണ്ട് നടി തന്റെ ശരീരഭാരം വർദ്ധിപ്പിച്ചിരുന്നു.എന്നാൽ ഇതിന്റെ പേരിൽ പൊതുവേദികളിലും, സമൂഹമാധ്യമങ്ങളിലും ബോഡി ഷെയ്മിങ്ങിനും, സൈബർ ബുള്ളിയിങ്ങിനും ഇരയാകുന്ന അവസ്ഥ വരെ നേരിടേണ്ടി വന്നു. ഇപ്പോൾ ഈ സിനിമയും,നിവേദയുടെ കഥാപാത്രവും വലിയ ചർച്ചയാകുമ്പോൾ ഇത്രയും നാളും വിമർശിച്ചവർക്കുള്ള ഒരു തിരിച്ചടിയായിത്തന്നെ ഈ പുരസ്‌കാരനേട്ടത്തെ കാണാൻ കഴിയും.

ഐപിഎൽ 18-ാം സീസണിലെ ഒന്നാം ക്വാളിഫയറിൽ പഞ്ചാബ് കിങ്സിനെ അനായാസം തോൽപ്പിച്ചു കൊണ്ട് ഫൈനൽ തട്ടകത്തിലേക്കുള്ള വഴി വെട്ടിയിരിക്കുകയാണ് റോയൽ ചലഞ്ചേഴ്സ് ബാംഗളൂരു.പഞ്ചാബിലെ മുള്ളൻപൂരിൽ ഇന്നലെ അരങ്ങേറിയ മത്സരത്തിൽ എട്ട് വിക്കറ്റ് വിജയത്തിലാണ് ഫൈനലിലേക്കുള്ള ചവിട്ടുപടി ആർസിബി ഉറപ്പിച്ചത്.ടോസ് നഷ്ടപ്പെട്ട് ബാറ്റിങ്ങിനിറങ്ങിയ പഞ്ചാബ് നേടിയ 102 റൺസ് എന്ന വിജയദൂരം പത്ത് ഓവർ ബാക്കിനിൽക്കേ തന്നെ രണ്ട് വിക്കറ്റ് നഷ്ടത്തിൽ ആർസിബി പിടിച്ചെടുത്തു. 27 ബോളിൽ 56 റൺസെടുത്ത് , അർത്ഥസെഞ്ച്വറി നേടിയ ഫിൽ സാൾട്ട് ആയിരുന്നു ഇന്നലത്തെ താരം. ഐപിഎൽ ചരിത്രത്തിൽ തന്നെ ഏറ്റവും കുറഞ്ഞ സമയം കൊണ്ട് ഫിൽ സാൾട്ട് നേടിയ അർത്ഥസെഞ്ച്വറിയും ഇതാണ്.വിരാട് കോഹ്ലി (12),മയങ്ക് അഗർവാൾ (13),രജത് പാട്ടീദാർ (15) എന്നിങ്ങനെയായിരുന്നു  മറ്റു ബാറ്റിംഗ് സ്കോറുകൾ.ബോളർമാരുടെ തകർപ്പൻ പ്രകടനമാണ് വിജയത്തിലേക്ക് വഴി വച്ച മറ്റൊരു പ്രധാന ഘടകം.ജോഷ് ഹെയ്സൽവുഡും,സുയാഷ് ഷർമയും മൂന്ന് വിക്കറ്റ് വീതം തകർത്തപ്പോൾ യാഷ് ദയാലിന്റെ രണ്ട് വിക്കറ്റും വിജയത്തിലേക്കുന്ന നിർണ്ണായക പങ്കു വഹിച്ചു. ഈ സീസണിലെ ഒന്നാം സ്ഥാനക്കാരായി മുന്നേറിക്കൊണ്ടിരുന്ന പഞ്ചാബിന് 14.1 ഓവറിൽ 101 റൺസ് മാത്രം നേടി പുറത്താകേണ്ടി വന്നെങ്കിലും, അവസരങ്ങൾ ഇനിയും അവസാനിച്ചിട്ടില്ല. ഇന്ന് നടക്കുന്ന ഗുജറാത്ത് ടൈറ്റൻസ് - മുംബൈ ഇന്ത്യൻസ് എലിമിനേറ്റർ കളിയിലെ വിജയികളെ രണ്ടാം ക്വാളിഫയറിൽ കീഴ്പ്പെടുത്താനായാൽ ഫൈനൽ എന്ന സ്വപ്നം പഞ്ചാബിനും നേടാനാകും. 2016 ന് ശേഷം ആദ്യമായി കലാശക്കളിയിലേക്ക് അവസരം ലഭിക്കുമ്പോൾ, ആർസിബി ഇറങ്ങുന്ന നാലാമത്തെ ഫൈനൽ പോരാട്ടമാണിത്. ഇതുവരെയും നേടാൻ സാധിക്കാത്ത ഐപിഎൽ കപ്പ് എന്ന ലക്ഷ്യം ഇത്തവണ വിജയാരവങ്ങളോടെ സ്വന്തമാക്കാൻ കഴിയുമെന്ന പ്രതീക്ഷയിലാണ് ആരാധകർ.

ഓരോ കാലഘട്ടത്തിലെയും സിനിമക്കും, സംഗീതത്തിനുമൊപ്പം മാറിവരുന്ന ഒന്നാണ് അക്കാലത്തെ ചെറുപ്പക്കാരുടെ സ്റ്റൈലും നടപ്പുമെല്ലാം. അങ്ങനെ മറക്കാൻ കഴിയാത്ത മൈക്കിൾ ജാക്സൺ കാലത്തിലേക്കും, ആ ഡാൻസും സ്റ്റൈലും കണ്ട് ഹരം കയറിയ ഒരു പറ്റം ചെറുപ്പക്കാരിലേക്കും പ്രേക്ഷകരെ കൂട്ടിക്കൊണ്ട് പോകാനായി പുതിയ ചിത്രം'മൂൺ വാക്' ഇന്ന് മുതൽ തീയേറ്ററുകളിൽ പ്രദർശനം ആരംഭിച്ചു. മാജിക്‌ ഫ്രെയിംസ്, ആമേൻ മൂവി മൊണാസ്ട്രി,ഫയർ വുഡ് ഷോസ് എന്നീ ബാനറുകളിൽ ലിജോ ജോസ് പെല്ലിശ്ശേരി അവതരിപ്പിക്കുന്ന ചിത്രം ലിസ്റ്റിൻ സ്റ്റീഫന്റെയും,ജസ്നി അഹമ്മദിന്റെയും നിർമ്മാണത്തിൽ നവാഗതനായ വിനോദ് എ കെ യാണ് സംവിധാനം ചെയ്തിരിക്കുന്നത്. വിനോദ്, മാത്യു വർഗീസ്, സുനിൽ ഗോപാലകൃഷ്ണൻ കൂട്ടുകെട്ടിൽ തിരക്കഥയൊരുക്കിയിരിക്കുന്ന ചിത്രത്തിൽ പുതുമുഖങ്ങളായ അനുനാഥ്, ഋഷി കൈനിക്കര, സിദ്ധാർഥ്,സുജിത് പ്രഭാകർ, അർജുൻ മണിലാൽ എന്നീ മികവുറ്റ കലാകാരന്മാർക്കു പുറമെ ശ്രീകാന്ത് മുരളി, വീണ നായർ,സഞ്ജന ദോസ്,മീനാക്ഷി രവീന്ദ്രൻ എന്നിവരും മറ്റു പ്രധാന വേഷങ്ങളിലെത്തും. ഡാൻസിനെ ഒരു വികാരമായി നെഞ്ചിലേറ്റിയ  ചെറുപ്പക്കാരുടെ കഥ പറയുന്ന ചിത്രം പഴമയുടെ രസച്ചരടിലൂടെയാണ് സഞ്ചരിക്കുന്നത്.ഒരു കാലഘട്ടത്തെ അടയാളപ്പെടുത്തുന്നതിലൂടെ നൊസ്റ്റാൾജിയയുടെയും, സൗഹൃദത്തിന്റയും മനോഹാരിത സ്ക്രീനിലേക്ക് കൊണ്ടുവരാൻ 'മൂൺ വാക് 'നു കഴിഞ്ഞുവെന്നാണ് പ്രേക്ഷകരുടെ പ്രതികരണം.

വിശക്കുന്നവർക്ക് ഒരു നേരത്തെ ഭക്ഷണം നൽകുന്നതിനായി മലബാർ ഗ്രൂപ്പ് ആരംഭിച്ച 'ഹംഗർ ഫ്രീ വേൾഡ്' പദ്ധതിയിൽ ഈ വർഷത്തിനുള്ളിൽ 2.5 കോടി ഭക്ഷണപ്പൊതികൾ വിതരണം ചെയ്യും. മെയ് 28 ന് ഡൽഹി ജൻപഥിലെ ഡോ. അംബേദ്കർ ഇന്റർനാഷണൽ സെന്ററിൽ നടന്ന സിഎസ്ആർ ദിനാഘോഷ ചടങ്ങിൽ ഈ വർഷത്തെ സിഎസ്ആർ പരിപാടികൾ നീതി ആയോഗ് മുൻ സിഇഒയും ജി–20 പ്രതിനിധിയുമായ അമിതാഭ് കാന്ത് ഉദ്ഘാടനം ചെയ്തു. ഇതേദിവസം രാജ്യത്തെ എല്ലാ മലബാർ ഗോൾഡ് ആൻഡ് ഡയമണ്ട്‌സ് ഷോറൂമുകളിലും സിഎസ്ആർ ദിനത്തോടാനുബന്ധിച്ച് വിവിധ പരിപാടികൾ സംഘടിപ്പിച്ചു. മലബാർ ഗോൾഡ് ആൻഡ് ഡയമണ്ട്സ് ചെയർമാൻ എം. പി അഹമ്മദ്, വൈ‌സ് ചെയർമാൻ അബ്ദുൽ സലാം, കെ. പി ഇന്ത്യൻ ഓപ്പറേഷൻസ് എംഡി അഷർ. ഒ, ഗ്രൂപ്പ് എക്സിക്യൂട്ടീവ് ഡയറക്ടർമാരായ നിഷാദ് എ കെ,കെ പി വീരൻകുട്ടി, ഗ്രൂപ്പ് ഡയറക്ടർ അബ്ദുള്ള ഇബ്രാഹിം പി എ, തണൽ ചെയർമാൻ ഡോ. ഇദ്രിസ് വി, നോർത്ത് സോണൽ ഹെഡ് ജിഷാദ് എൻ കെ എന്നിവർ ചടങ്ങിൽ പങ്കെടുത്തു. മലബാർ ഗ്രൂപ്പ് സിഎസ്ആർ പ്രവർത്തനങ്ങൾക്ക് വേണ്ടി ഒരു വർഷം ചെലവഴിക്കുന്ന തുകയിൽ 60 ശതമാനവും പട്ടിണിയും ദാരിദ്ര്യവും അകറ്റുന്ന പദ്ധതികൾക്കായാണ് മാറ്റിവയ്ക്കുന്നത്. ഹംഗർ ഫ്രീ വേൾഡ് പദ്ധതിയോടനുബന്ധിച്ച് ഇന്ത്യയിലും വിദേശത്തുമായി 70,000 ഭക്ഷണപ്പൊതികളാണ് ഒരു ദിവസം വിതരണം ചെയ്യുന്നത്‌. ഇന്ത്യയിലെ 20 സംസ്ഥാനങ്ങളിലെ 167 കേന്ദ്രങ്ങളിലായി ദിനംപ്രതി 60,000 ആളുകൾക്ക് പോഷക സമൃദ്ധമായ ഭക്ഷണപ്പൊതികൾ വിതരണം ചെയ്യുന്നു. ഇതിന് പുറമെ, ആഫ്രിക്കൻ രാജ്യമായ സാംബിയയിലെ മൂന്ന് സ്കൂളുകളിലെ 10,000 വിദ്യാർത്ഥികൾക്കും സാംബിയ സർക്കാരുമായി സഹകരിച്ച് ദിവസേന ഭക്ഷണം നൽകുന്നുണ്ട്. കോഴിക്കോട് ആസ്ഥാനമായി പ്രവർത്തിക്കുന്ന പ്രമുഖ സന്നദ്ധ സംഘടനയായ (എൻജിഒ) തണലുമായി സഹകരിച്ചാണ്  ഈ പദ്ധതി നടപ്പാക്കുന്നത്‌. ജനങ്ങൾ കൈകോർത്താൽ ലോകത്തിലെ പട്ടിണിയകറ്റാൻ കഴിയുമെന്ന സന്ദേശമാണ് ‘ഹംഗർ ഫ്രീ വേൾഡ്’ പദ്ധതിയിലൂടെ സമൂഹത്തിന് നൽകുന്നതെന്ന് മലബാർ ഗ്രൂപ്പ് ചെയർമാൻ എം പി അഹമ്മദ് പറഞ്ഞു. “മലബാർ ഗ്രൂപ്പിന് ചെയ്യാൻ കഴിയുന്നതിന്റ പരമാവധി ഞങ്ങൾ ചെയ്യുന്നു. മറ്റ് സ്ഥാപനങ്ങളും സംഘടനകളും ഈ വഴിക്ക് ചിന്തിച്ചാൽ വലിയ മാറ്റമുണ്ടാക്കാൻ കഴിയും.ഭക്ഷണപ്പൊതി ഒരു താൽകാലിക പരിഹാരമാണ്.ഉത്പാദനം വർദ്ധിപ്പിച്ചും, കൂടുതൽ തൊഴിലവസരങ്ങൾ സൃഷ്ടിച്ചും സമൂഹത്തിൽ സാമ്പത്തിക വളർച്ച ഉണ്ടാക്കുകയാണ് ആത്യന്തികമായി വേണ്ടത്. അതൊരു ദീർഘകാല പരിഹാരമാണ്.ലോകത്ത് 29.5 കോടി ജനങ്ങൾ പട്ടിണി നേരിടുന്നുണ്ടെന്നാണ് ഐക്യരാഷ്ട്ര സംഘടനയുടെ കണക്കുകൾ വ്യക്തമാക്കുന്നത്.അവരുടെ വിശപ്പകറ്റാനുള്ള ശ്രമങ്ങൾ നാളത്തേക്ക് മാറ്റിവയ്ക്കാൻ കഴിയില്ല.അതുകൊണ്ടാണ് ഭക്ഷണം വിതരണം ചെയ്യുന്ന പരിപാടി മലബാർ ഗ്രൂപ്പ് ഏറ്റെടുത്തത് " എന്നും അദ്ദേഹം കൂട്ടിച്ചേർത്തു.