ലണ്ടൻ: സ്വന്തം ലേഖകൻ

ഒരാഴ്ചയോളമായി  കാനഡയിൽ കാണാതായ മലയാളി യുവാവ്  ഫിന്റോ ആൻറണിയെ മരിച്ചനിലയിൽ കണ്ടെത്തി. ദുരൂഹ സാഹചര്യത്തിൽ കാറിനുള്ളിലാണ് മൃതദേഹം കണ്ടെത്തിയത്. 

മലയാറ്റൂർ നീലീശ്വരം സ്വദേശി ഫിന്റോ ആൻറണിയെ  ജിപിഎസ് സംവിധാനമുള്ള വാഹനം അടക്കമാണു കഴിഞ്ഞ 5 മുതൽ കാണാതായത്.

കാനഡയിലെ കാൽഗറിയിൽ നിന്ന് ഒരാഴ്ചയായി കാണാതായ 39 വയസ്സുള്ള മലയാളി യുവാവിനെ  കണ്ടെത്താൻ പോലീസ് പൊതുജനങ്ങളുടെ സഹായം തേടിയിരുന്നു.

മലയാറ്റൂരിനടുത്തു നീലേശ്വരം സ്വദേശി പുതുശേരി ഫിന്റോ ആന്റണിയെ, 39, കാണാനില്ലെന്നു കാനഡ പൊലീസാണു റിപ്പോർട്ട് ചെയ്‌തത്. കഴിഞ്ഞ 12 വർഷമായി ജിന്റോ കാനഡയിലുണ്ട്.

ഭാര്യയും 2 കുട്ടികളും നാട്ടിൽ നിന്ന് കാൽഗറിയിലെ  വീട്ടിൽ എത്തിയിട്ട് 6 മാസം മാത്രമേ ആയിട്ടുള്ളൂ. നീലേശ്വരം പൂണേലി ധന്യയാണു ഭാര്യ. അതിനിടയിലാണ് ഇങ്ങനെയൊരു ദുരനുഭവം.

ഏപ്രിൽ 5 ശനിയാഴ്ച വൈകുന്നേരം 5 മണിയോടെ ലൂക്കാസ് ക്ലോസ് NW ലെ 100 ബ്ലോക്കിലുള്ള വീട്ടിൽ നിന്ന് ഇറങ്ങിയപ്പോഴാണ് ഫിന്റോയെ അവസാനമായി കണ്ടത്. 

ആൽബെർട്ട ലൈസൻസ് പ്ലേറ്റ് CTR 9938 ഉള്ള ഒരു കറുത്ത 2024 റാം 3500 പിക്കപ്പ് ട്രക്ക് ഓടിച്ചാണ് ഫിന്റോ വീട്ടിൽ നിന്നും പോയത്. ഇതിന് ജിപിഎസ് സൗകര്യവുമുണ്ട്. 

അന്നുമുതൽ ഫിന്റോ കുടുംബവുമായി ബന്ധപ്പെട്ടിട്ടില്ല. സാധാരണ ഇടയ്ക്കിടയ്ക്ക് ഫോൺ വിളിക്കുമായിരുന്നു. എന്നാൽ കാണാതാകുമ്പോൾ ഫോൺ കൂടെ കൊണ്ടുപോയിരുന്നില്ല.

ഫിന്റോയുടെ മരണത്തിൽ ദുഹതയുണ്ടെന്ന് ബന്ധുക്കൾ ആരോപിക്കുന്നു. കാനഡയിലെ പ്രാദേശിക മാധ്യമങ്ങളിൽ ആത്മഹത്യ ആണെന്ന രീതിയിൽ റിപ്പോർട്ടുകളും വന്നിട്ടുണ്ട്.

എന്നാൽ പോലീസ് ഇതിനെക്കുറിച്ച് വ്യക്തമായ വിവരം ഇതേവരെ പുറത്തുവിട്ടിട്ടില്ല. പോസ്റ്റുമോർട്ടം റിപ്പോർട്ട് വന്നശേഷം കൂടുതൽ വിവരങ്ങൾ അറിയിക്കുമെന്നാണ് കരുതുന്നത്.